ខេត្តស្ទឹងត្រែង ៖ ពលរដ្ឋឡាវចំនួន៦នាក់រួម និងខ្មែរម្នាក់កំពុងស្ថិតនៅស្នងការនគរបាលខេត្ត ក្រោយនាំខ្លួនដោយកម្លាំងនគរបាលវរៈការពារព្រំដែនគោក៧០១…
ខេត្តស្ទឹងត្រែង ៖ ពលរដ្ឋឡាវចំនួន៦នាក់រួម និងខ្មែរម្នាក់កំពុងស្ថិតនៅស្នងការនគរបាលខេត្ត ក្រោយនាំខ្លួនដោយកម្លាំងនគរបាលវរៈការពារព្រំដែនគោក៧០១នៅចំណុចប៉ុស្តិ៍ដុងក្រឡចាស់ ស្ថិតក្នុងសង្កាត់ស្ទឹងត្រែង ក្រុងស្ទឹងត្រែង កាលពីរសៀលថ្ងៃទី២៧ កុម្ភៈ ឆ្នាំ២០១៧ ។
តាមការឱ្យដឹងពីនគរបាលការពារព្រំដែនគោក៧០១ថា ពលរដ្ឋឡាវ៦នាក់ខាងលើជាជនជាតិភាគតិចឡាវរស់នៅភូមិវន់សំផាន់ ស្រុកភូវង់ ខេត្តអត្តពឺ ប្រទេសឡាវ ។ ពួកគេបាននាំគ្នាថ្មើរជើងចេញពីទឹកដីរបស់ខ្លួនឆ្លងចូលតំបន់អូរតាក់ង៉ាវជាប់ព្រំប្រទល់ខេត្តអត្តពឺ និងខេត្តរតនគិរី ដោយមានពលរដ្ឋជនជាតិភាគតិចខ្មែរម្នាក់រស់នៅស្រុងតាវែងជាអ្នកនាំផ្លូវ ។
មន្ត្រីនគរបាលវរៈការពារព្រំដែនគោក៧០១ឱ្យដឹងបន្តថា ក្រោយកម្លាំងកងរាជអាវុធហត្ថប្រទះឃើញពួកគេលើដីខ្មែរ និងសង្ស័យឆ្លងដែនខុសច្បាប់អាវុធហត្ថបានជូនដំណឹងមកកម្លាំងវរៈ៧០១ចុះត្រួតពិនត្យលើលិខិតស្នាមពុំមានឯកសារកម្លាំងវរៈការពារព្រំដែនគោក៧០១ធ្វើការនាំខ្លួនទៅសាកសួរបន្តរាយការណ៍ជូនស្នងការនគរបាលខេត្ត លុះក្រោយសាកសួរនៅរសៀលថ្ងៃទី១ មីនា ទើបបន្តបញ្ជូនមកសាកសួរបន្ថែមនៅស្នងការដ្ឋាននគរបាលខេត្តហើយរហូតមកទល់ថ្ងៃទី២ មីនា មិនទាន់មានព័ត៌មានផ្លូវការណាមួយបន្ថែមនៅឡើយដែរ ខណៈដែលពលរដ្ឋឡាវ៦នាក់រួមខ្មែរម្នាក់កំពុងបន្តរង់ចាំដោះស្រាយតាមគោលការត្រឹមថ្នាក់ក្រោមជាតិ ។
ពលរដ្ឋជនជាតិភាគតិចឡាវ និងខ្មែរដែលត្រូវបាននាំខ្លួនសាកសួរនោះរួមមានទី១-ឈ្មោះ ប៊ុន យ៉ូន ភេទប្រុស អាយុ៦២ឆ្នាំ, ទី២-ឈ្មោះ ឡាំ យ៉ាវ ភេទប្រុស អាយុ៦៣ឆ្នាំ ទី៣-ឈ្មោះ ស៊ី ដង ភេទប្រុស អាយុ៥៣ឆ្នាំ, ទី៤-ឈ្មោះឃីម ហ៊ើន ភេទប្រុស អាយុ៤០ឆ្នាំ ទី៥-ឈ្មោះ យ៉ូន ម៉ៃ ភេទប្រុស អាយុ៣០ឆ្នាំ, ទី៦-ឈ្មោះ ហម តិល ភេទប្រុស អាយុ៧៣ឆ្នាំ អ្នកទាំង៦នាក់រស់នៅភូមិវន់សំផាន់ ស្រុកភូវង់ ខេត្តអត្តពឺ ប្រទេសឡាវ និងទី៧-ឈ្មោះ ហ៊ុន សាវី ភេទប្រុសអាយុ៣៧ឆ្នាំ ជាជនជាតិភាគតិចខ្មែររស់នៅភូមិប៉ាងគិត ឃុំតាវែងលើ ស្រុកតាវែង ខេត្តរតនគិរី ។
ក្រោយព័ត៌មានកម្លាំងនគរបាលវរៈការពារព្រំដែន៧០១ធ្វើការនាំខ្លួនពលរដ្ឋឡាវ និងខ្មែរសរុប៧នាក់ខាងលើពួកគេបានឆ្លើយថា ការឆ្លងដែនចូលកម្ពុជានោះដោយគ្រាន់ពួកគេនឹករលឹកបងប្អូនហើយថ្មើជើងកាត់ព្រៃតាមផ្លូវវៀងប៉ុណ្ណោះ ព្រោះជាទម្លាប់ពីដើមហើយពួកគេពុំមានលុយគ្រប់គ្រាន់សម្រាប់ធ្វើដំណើរស្របច្បាប់នោះទេ ។
ទន្ទឹមការនាំខ្លួនពលរដ្ឋឡាវទាំងនោះពលរដ្ឋខ្មែរម្នាក់ក៏ត្រូវបានកម្លាំងទាហានឡាវចាប់ខ្លួន ខណៈឆ្លងទៅលេងផ្ទះប្រពន្ធរបស់ខ្លួនដែលជាជនជាតិឡាវនៅ សេពៀន ស្រុកស្នាំសៃ ខេត្តអត្តពឺ ដែលបច្ចុប្បន្នកំពុងស្ថិតក្រោមការឃុំខ្លួននៅស្រុកស្នាំសៃមិនទានដោះលែងមកវិញនៅឡើយទេ ៕
ចែករំលែកព័តមាននេះ