ខេត្ដព្រះសីហនុ ៖ បង្គោលស្មាច់ដែលត្រូវបានគេបោះវាតទីចូលក្នុងបឹងកង្កែបក្បែរឆ្នេរសមុទ្ររាម នៅតែបន្តលបលួចបោះចូលបន្ថែមទៀត បន្ទាប់ពីជំនាញជលផលបាន
ខេត្ដព្រះសីហនុ ៖ បង្គោលស្មាច់ដែលត្រូវបានគេបោះវាតទីចូលក្នុងបឹងកង្កែបក្បែរឆ្នេរសមុទ្ររាម នៅតែបន្តលបលួចបោះចូលបន្ថែមទៀត បន្ទាប់ពីជំនាញជលផលបានធ្វើការហាមឃាត់ និងឱ្យធ្វើកិច្ចសន្យាបញ្ឈប់កាលពីថ្ងៃទី២៣ កុម្ភៈកន្លងទៅថ្មីៗនេះ ។
ក្រុមប្រជាពលរដ្ឋជាច្រើនគ្រួសារ បានសម្តែងការខកចិត្ត និងហាក់អស់ជំនឿ ដោយស្នើយ៉ាងទទូចដល់មន្ត្រីពាក់ព័ន្ធថ្នាក់លើ ជាពិសេសប្រមុខរាជរដ្ឋាភិបាល សូមមេត្តាចាត់វិធានការជាបន្ទាន់លើក្រុមអ្នកមានអំណាចដែលកំពុងប្រព្រឹត្ដល្មើសច្បាប់ បោះបង្គោលស្មាច់នៅក្នុងបឹងធម្មជាតិ (បឹងកង្កែប) ដែលមានទីតាំងស្ថិតក្នុងភូមិអ៊ុងក្នុង (ភូមិចំកាដូង) ឃុំរាម ស្រុកព្រៃនប់ បើទោះបីជាមន្ត្រីជំនាញចុះហាមឃាត់ធ្វើកិច្ចសន្យាបញ្ឈប់សកម្មភាពយ៉ាងណាក៏ដោយ ដែលសកម្មភាពនេះ បានធ្វើឱ្យពួកគាត់មានការសង្ស័យថា មានការឃុបឃិតគ្នាជាមួយមន្ត្រីពាក់ព័ន្ធមួយចំនួនហើយមើលទៅ ។
លោក ថា ឡុង ដែលអះអាងថាជាម្ចាស់ទីតាំងនេះបានឱ្យដឹងថា លោកបោះបង្គោលចូលក្នុងបឹងនេះមានគោលបំណងចិញ្ចឹមក្រែងឈាម ។ មូលហេតុដែលគាត់នៅតែបន្តធ្វើដោយសារបងរបស់គាត់ឈ្មោះភានៅភ្នំពេញឱ្យធ្វើ តែគេមិនដឹងថា ឈ្មោះភានោះមានអំណាចធំ ឬលុយធំយ៉ាងណាទេ ទើបនៅតែអាចបញ្ជាឱ្យធ្វើទៅតាមអំពើចិត្ដរបស់ខ្លួន ។
គួររំលឹកថា នៅព្រឹកថ្ងៃទី២៣ កុម្ភៈ ក្រុមប្រជាពលរដ្ឋជាច្រើនគ្រួសារអមដោយមន្ត្រីជំនាញជលផល និងអាជ្ញាធរផងដែរបានចុះទៅហាមឃាត់ និងឱ្យដកបង្គោលស្មាច់ ដែលបានលបលួចបោះចូលទៅក្នុងបឹងកង្កែប ចេញវិញបន្ទាប់ពីបានបោះរួចហើយបានចំនួន១៦០បង្គោល ។
លោក ឯម ភា នាយសង្កាត់ជលផលព្រៃនប់ បានឱ្យដឹងគ្រាដែលលោកចុះពិនិត្យកិច្ចការនេះថា មិនអនុញ្ញាតឱ្យបុគ្គលណារំលោភយកបឹងនេះបានជាដាច់ខាត ។ បង្កោលដែលបានបោះចូលបឹងនេះនឹងត្រូវដកចេញវិញទាំងអស់ តែការធ្វើកិច្ចសន្យាមិនបានប៉ុន្មានថ្ងៃផង លោកថា ឡុង បានបន្តបោះបង្គោលចូលបឹងនេះដដែល ។ ជាមួយនឹងបញ្ហានេះលោកឯម ភា ផ្នែករដ្ឋបាលជលផលព្រៃនប់ហាក់ដូចជាមានការស្ទាក់ស្ទើរក្នុងការបំភ្លឺ ដោយចោទលើបញ្ហាសេវាទូរស័ព្ទ និងឱ្យបន្តសួរទៅលោក នេន ចំរើន នាយខណ្ឌវិញ ។
ចំណែកលោក នេន ចំរើន នាយខណ្ឌរដ្ឋបាលជលផលកំពង់សោមវិញក៏មិនទាន់បកស្រាយជុំវិញការទន្ទ្រានខាងលើនេះបានដែរនៅថ្ងៃទី២៧ កុម្ភៈនេះ ដោយលោកបានប្រាប់តាមទូរស័ព្ទថា លោកជាប់សន្និបាតនៅសៀមរាប២ថ្ងៃ រង់ចាំលោកមកកំពង់សោមវិញទើបអាចនិយាយបាន ។ ករណីខាងលើនេះ បើមិនមានការទប់ស្កាត់ទេ ផ្ទៃបឹងធម្មជាតិដែលសម្បូរទៅដោយព្រៃកោងកាងដ៏ខៀវស្រងាត់មួយនេះ ច្បាស់ជារួមតូចជាបន្តបន្ទាប់ដោយសារការបោះបង្គោលរំលោភយក ៕
ចែករំលែកព័តមាននេះ