ខេត្តតាកែវ៖​ គិតចាប់ពីឆ្នាំ​១៩៧៩រហូតដល់ដើមឆ្នាំ​​ ២០១៧នេះ ​​ប្រជាពលរដ្ឋរស់នៅក្នុងមូលដ្ឋាន​ភូមិព្រៃឈ្នួល​ ឃុំ​រវៀង​​ ​ស្រុកសំរោង​ ​ទើបតែបានទទួល​កាដូដ៏ពិសេស​ពី​លោក​ ញ៉ែម​ ស្រល់​​ អភិបាលស្រុកសំរោង​ ​ដែលស្ថាបនាផ្លូវលំដីស​​ មួយខ្សែមានប្រវែង​ជាង​៣គីឡូម៉ែត្រ​ ​តភ្ជាប់ពីផ្លូវជាតិលេខ២​ ​ចូលទៅក្នុងភូមិរបស់ពួកគាត់​ ។ ​

ជាមួយនឹងកាដូសម្រាប់ប្រជាពលរដ្ឋក្នុងភូមិព្រៃឈ្នូលនាពេលនេះ​ ​បងប្អូនប្រជាពលរដ្ឋ​ទាំងអស់ ​បានសម្តែងនូវទឹកចិត្តសប្បាយរីករាយ​និងត្រេតអរយ៉ាងខ្លាំង​​ ជាពិសេស​បងប្អូនអ្នកភូមិ​បានលើកឡើងថា​ ​ជាង៣០ឆ្នាំមកហើយ​ ​មូលដ្ឋានពួកគាត់មិនដែលទទួលបានការស្ថាបនាផ្លូវ​និងអភិវឌ្ឍន៍​អ្វី​នោះទេ​ ​ដោយឆ្លងកាត់​ចៅហ្វាយស្រុកសំរោង​ជាច្រើនរូបមកហើយ ។​ តែចាប់តំាងពីលោក ញ៉ែម ស្រល់ ​ឡើងកាន់តំណែងជាអភិបាលស្រុកសំរោងប៉ុន្មានឆ្នាំនោះមក ​​លោកបានយកចិត្តទុក្ខដាក់ ​យល់សុខទុក្ខពលរដ្ឋ​និងអភិវឌ្ឍន៍មូលដ្ឋាន​ជាច្រើនរាប់ទំាងការស្ថាបនាផ្លូវលំខាងលើ ។ ​

ប្រជាពលរដ្ឋក្នុងភូមិព្រៃឈ្នួលទាំងមូល​បានថ្លែងអំណរគុណយ៉ាងជ្រាលជ្រៅបំផុតដល់​លោក​ ញ៉ែម​ ស្រល់​​ អភិបាលស្រុកសំរោង​ចំពោះការគិតគូរ​ពីការលំបាក​នឹង ដឹង​សុខទុក្ខប្រជាពលរដ្ឋ​ដែល​បានស្ថាបនាផ្លូវលំមួយខ្សែ​ ​តភ្ជាប់ពីផ្លូវជាតិលេខ២​​ ចូលទៅក្នុងមូលដ្ឋានរបស់ពួកគាត់ដោយភ្ជាប់គ្នាទៅ​ដល់ភូមក្រាំងធ្នង់ថែមទៀត។

ពួកគាត់បានលើកឡើងបន្តថា​ ​កន្លងមកពួកគាត់ពិបាកធ្វើដំណើរខ្លាំងណាស់​ ​ជាពិសេសកូនៗរបស់ពួកគាត់ពិបាក​ក្នុងការធ្វើដំណើរទៅសិក្សាដែលមានចម្ងាយឆ្ងាយពី​លំនៅដ្ឋាន ​​ហើយផ្លូវលំបាក​ មានជង្ហុក​ ​ហើយពេលរដូវវស្សាវិញនោះ​ ​គឺផ្លូវមួយខ្សែនេះជិះកង់និងម៉ូតូស្ទើរមិនរួចផង​ ។ ​

ក្រោយពីទទួលបានកាដូផ្លូវមួយខ្សែពី​លោកអភិបាលស្រុកសំរោងនោះរួចមក​​ ពួកគាត់បានទទូចស្នើសុំទៅលោក​ ​ឡាយ​ វណ្ណៈ​​ អភិបាលខេត្តតាកែវនិងរាជរដ្ឋាភិបាល​មេត្តាជួយស្ថាបនាផ្លូវនេះបន្ថែមទៀត​ ​ដោយពួកគាត់សុំដល់លោកអភិបាលខេត្ត​ជួយក្រាលក្រួសក្រហម​ ​ឬក៏ក្រាលថ្មមិុច​ទៅលើផ្លូវមួយខ្សែ​ដែលលោកអភិបាលស្រុក​ស្ថាបនារួចរាល់នោះ​ ​ដើម្បីរក្សាបាននៅគុណភាពកាន់តែប្រសើរ ​និងងាយស្រួលក្នុងការធ្វើដំណើរ​​ ហើយពួកគាត់ក៏បានស្នើសុំអោយលោកអភិបាល​ស្រុក​និងអភិបាល​ខេត្តបន្តជួយអភិវឌ្ឍន៍​​ ដូចជាស្ថាបនាផ្លូវ​ ​និងជីកប្រឡាយ​ ។ ល។ ​ក្នុងមូលដ្ឋានភូមិព្រៃឈ្នួល​ ​នេះអោយបានកាន់តែច្រើនបន្ថែមទៀត ៕