ខេត្តកំពង់ស្ពឺ ៖ ក្រុមចាប់ល្បឿនរថយន្តត្រូវបានរងការរិះគន់ខ្លាំងថា ធ្វើការមិនមានតម្លាភាព ដោយដាក់ឱ្យមានអ្នកចាំកាន់កាមេរ៉ាពួននៅកន្លែងកំបាំងមួយ ហើយបាញ់ចាប់ល្បឿនពីក្រោយ ដោយមិនឱ្យអ្នកបើកបរដឹងឡើយ ដែលការធ្វើដូច្នេះ ហាក់បីដូចជាធ្វើបង្កើនប្រាក់ពីការផាកពិន័យឱ្យបានច្រើនទៅវិញ ។
ប្រភពពីពលរដ្ឋបានប្រាប់នៅព្រឹកថ្ងៃទី២ មីនា ស្ថិតនៅចំណុចលើផ្លូវជាតិលេខ៤ ន្លោះគីឡូម៉ែត្រលេខ៤២ និង៤៣ ក្នុងភូមិរំលោងប្រឃ្លះ សង្កាត់សុពណ៌ទេព ក្រុងច្បារមន ខេត្តកំពង់ស្ពឺ ថា គឺមានក្រុមនគរបាលចរាចរណ៍ខេត្តមួយក្រុម ដែលដឹកនាំដោយលោកមាស សុខុម ជានាយរងការិយាល័យចរាចរណ៍ ក្រោមការបញ្ជាផ្ទាល់ពីលោកតាប់ លន ស្នងការរងទទួលបន្ទុក ។
ប្រភពបន្តថា នៅព្រឹកថ្ងៃទី២ មីនា នេះ ដោយសារមានការប្រញាប់ផងនោះ គាត់បានបើករថយន្តក្នុងល្បឿនលឿនគួរសម តែមិននឹកស្មានថា មានអ្នកកាន់កាមេរ៉ាចាំបាញ់ថតពីក្រោយនោះទេ រហូតទៅដល់ទិសដៅខាងមុខ ស្រាប់តែមានសមត្ថកិច្ចស្ទាក់ឱ្យឈប់ដោយប្រាប់ថា រថយន្តរបស់គាត់បើកលើសល្បឿនកំណត់ ។ ដូច្នេះ ត្រូវផាកពិន័យ៤០០០០រៀល ដោយសារយល់ថា ខ្លួនមានកំហុសគាត់សុខចិត្ត បង់លុយដោយមិនប្រកែកតវ៉ាអ្វីឡើយ ។ តែអ្វីដែលគាត់ហួសចិត្ត មិនគួរណានគរបាលចរាចរណ៍ធ្វើចរិតដូចចោរអ៊ីចឹងសោះ គឺលាក់បំពួនខ្លួនក្នុងកន្លែងស្ងាត់កំបាំង ហើយចាំបាញ់ចាប់ល្បឿនពីក្រោយទៅវិញ ។ បើចាំបាញ់ចាប់ល្បឿនពីមុខគាត់មិនថានោះទេ វើបែបនេះមិនខុសពីចោរចាំលួចអីវ៉ាន់អ្នកស្រុកនោះទេ ។
ពាក់ព័ន្ធនឹងការលើកឡើងនេះដែរ លោកតាប់ លន បានប្រាប់តាមទូរស័ព្ទមកកាន់អ្នកព័ត៌មានយើងថា ការពិតកាមេរ៉ាចាប់ល្បឿនអាចចាប់ពីមុខ ក៏បានចំហៀងក៏បាន និងពីក្រោយក៏បាន ។
ដោយឡែក មានការរិះគន់ថា ក្រុមចាប់ល្បឿនទាំងនេះ បើអ្នកណាមានលុយបង់គ្រប់ចំនួន គឺគេចេញវិក័យបត្រ ឱ្យតែបើមិនមានលុយបង់គ្រប់ចំនួនទេ បង់លុយក្រោមតុបាន តែមិនមានវិក័យបត្រចេញឱ្យឡើយ ។ ពលតដ្ឋបានសំណូមពរទៅលោកស្នងការនគរបាលខេត្ត សូមមេត្តាត្រួតពិនិត្យភាពអសកម្មនេះផង បើបណ្តែតបណ្តោយតទៅទៀតនោះ ភាពអសកម្មនឹងបន្តកើតមានជាក់ជាមិនខានឡើយ។
ជាងនេះទៅទៀត មហាជនបានសំណូមពរដល់លោកអភិបាលខេត្ត សូមមេត្តាដាក់វិធានការតឹងរឹងបន្តដល់ក្រុមអស់លោកនគរបាលចរាចរណ៍នេះផង ចៀសវាងប៉ះពាល់ដល់សេចក្តីថ្លៃថ្នូររបស់ខេត្តកំពង់ស្ពឺ ព្រោះតែអស់លោកប៉ុន្មាននាក់នេះ ។
ចែករំលែកព័តមាននេះ