រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា«ក្នុងរយៈពេលប៉ុន្មានឆ្នាំចុងក្រោយនេះ សេដ្ឋកិច្ចកម្ពុជាបានកើនឡើងជានិច្ច
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា«ក្នុងរយៈពេលប៉ុន្មានឆ្នាំចុងក្រោយនេះ សេដ្ឋកិច្ចកម្ពុជាបានកើនឡើងជានិច្ច ដោយសម្រេចបានកំណើនក្នុងរង្វង់៧%ក្នុងមួយឆ្នាំ ហើយរំពឹងថាដល់ឆ្នាំ២០១៨ កំណើននេះនឹងនៅថេរក្នុងរង្វង់៧% ដដែល ។
យ៉ាងណាក៍ដោយនៅក្នុងពិធីបើកសន្និសីទចក្ខុវិស័យប្រទេសកម្ពុជា ឆ្នាំ២០១៧ លើប្រធានប្រធានបទ «ការឈានឡើងនៃសង្វាក់តម្លៃឧស្សាហូបនីយកម្ម ដើម្បីកំណើន និងការអភិវឌ្ឍក្នុងសម័យឌីជីថល» នៅសណ្ឋាគារសូហ្វីតែលភ្នំពេញ ភូគីត្រា នាព្រឹកថ្ងៃទី០២ មីនា ២០១៧នេះ សម្តេចតេជោនាយករដ្ឋមន្ត្រី ក៍បានបញ្ជាក់ដែរថា សេដ្ឋកិច្ចកម្ពុជាក៍ប្រឈមមុខទៅនឹងហានិភ័យមួយចំនួនដូចជាការងើបឡើងវិញនូវតម្លៃប្រេង និងទំនិញនៅលើទីផ្សារអន្តរជាតិ ភាពមិនប្រាកដប្រជាពាក់ព័ន្ធការតម្លើង អត្រាការប្រាក់គោលរបស់ធនាគារកណ្តាលអាមេរិក ការចាកចេញរបស់អង់គ្លេសពីសហគមន៍អឺរ៉ុប និងអនាគតរបស់សហភាពអឺរ៉ុប ហានិភ័យនៃការធ្លាក់ចុះ នៃកំណើនសេដ្ឋកិច្ចចិន និងការថមថយកំណើនរបស់បណ្តាសេដ្ឋកិច្ចនៃប្រទេសកំពុងរីកលូតលាស់ ភាពចម្រូងចម្រាសក្នុងការធ្វើពាណិជ្ជកម្ម រវាងប្រទេសចិន និងរដ្ឋការរបស់ប្រធានាធិបតីអាមេរិកថ្មី ក៏ដូចជាការកើនឡើងនូវកម្តៅភូមិសាស្ត្រនយោបាយជាដើម។
បើតាមសម្តេចតេជោ ហ៊ុន សែន ដើម្បីជំរុញកំណើនសេដ្ឋកិច្ចឲ្យបាន៧% ដែលនឹងអាចឲ្យកម្ពុជាសម្រេចបាននូវចក្ខុវិស័យ ប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមានចំណូលខ្ពស់នៅឆ្នាំ២០៥០ គឺត្រូវរួមគ្នាខិតខំអនុវត្តគោល នយោបាយអភិវឌ្ឍន៍ឧស្សាហកម្មឆ្នាំ២០១៥-២០២៥ ដែលរាជរដ្ឋាភិបាលបានដាក់ចេញ និងត្រូវចាត់ទុកថាជា «យុទ្ធសាស្ត្រកំណើនថ្មី» ដែលជាមគ្គុទ្ទេសន៍ជំរុញការអភិវឌ្ឍវិស័យឧស្សាហកម្មនៅកម្ពុជា ការធ្វើពិពិធកម្មសេដ្ឋកិច្ច ការពង្រឹងសមត្ថភាពប្រកួតប្រជែង និង ការលើកកម្ពស់ផលិតភាព ដើម្បីឈានឡើងទៅកាន់ទួលថ្មីមួយទៀត ក្នុងខ្សែចង្វាក់ នៃតម្លៃបន្ថែមក្នុងតំបន់ និងសកលលោក៕
ចែករំលែកព័តមាននេះ