ស្ទាវឈាមរាវ២នាក់និងនារីម្នាក់ទំនាស់ហិង្សាជាមួយប្រជាការពារសាលាខណ្ឌ
រាជធានីភ្នំពេញ ៖ ករណីហិង្សាទំនាស់គ្នារវាងបុរស២នាក់ និងនារីម្នាក់ជាមួយប្រជាការពារសាលាខណ្ឌដង្កោបានបង្កឱ្យបុរសម្នាក់រងរបួសដៃខាងស្តាំ…
រាជធានីភ្នំពេញ ៖ ករណីហិង្សាទំនាស់គ្នារវាងបុរស២នាក់ និងនារីម្នាក់ជាមួយប្រជាការពារសាលាខណ្ឌដង្កោបានបង្កឱ្យបុរសម្នាក់រងរបួសដៃខាងស្តាំ ។ ហេតុការណ៍នេះបង្កឱ្យមានការភ្ញាក់ផ្អើលនៅវេលាម៉ោង៩និង៣០នាទីយប់ ថ្ងៃទី១ មីនា ឆ្នាំ២០១៧ ស្ថិចនៅចំណុចភូមិបាគូ សង្កាត់ដង្កោ ខណ្ឌដង្កោ ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឱ្យដឹកថា មុនពេលកើតហេតុពួកគាត់មិនដឹងថា មានរឿងអ្វីនោះទេ ស្រាប់តែឃើញបុរសបីនាក់ដែលគេស្គាល់ថា ជាប្រជាការពាររបស់សាលាខណ្ឌដង្កោបានជិះម៉ូតូ២គ្រឿងធ្វើដំណើរតាមផ្លូវ២១៧ក្នុងទិសដៅពីជើងទៅត្បូង ខណៈនោះក៏ស្រាប់តែមានឃើញម៉ូតូម៉ាកហ្ស៊ុយស៊ុគីនិក ពណ៌លឿងបិតតែមខ្មៅ ជិះដោយក្មេងស្ទាវបីនាក់ក្នុងនោះមានស្រីម្នាក់បានជិះមកក្នុងទិសដៅស្របគ្នា លុះមកដល់ចំណុចកើតហេតុបក្សពួកទាំងសងខាងបានធ្វើការវាយប្រតាយប្រតប់គ្នាទៅវិញទៅមក ហើយភ្លាមៗនោះនារីម្នាក់ក្នុងចំណោមបក្សពួកបីបានរត់គេខ្លួនបាត់នៅសល់តែបុរស២នាក់បានរត់ទៅចូលក្នុងផ្ទះប្រជាពលរដ្ឋនៅក្បែរនោះ លុះបន្តិចក្រោយមកគេឃើញមានរថយន្តរបស់សាលាខណ្ឌដង្កោមួយគ្រឿងបានដឹកមនុស្សមួយក្រុមមកកន្លែងកើតហេតុ រួចហើយបាននាំគ្នាព្រួតវាយទៅលើបុរសម្នាក់ក្នុងចំណោមបក្សពួក២នាក់បណ្តាលឱ្យរងរបួសដៃខាងស្តាំរួចក៏បានយកខ្នោះមកដាក់បុរសម្នាក់នោះរួចដាក់ក្នុងរថយន្តដឹកយកទៅប៉ុស្តិ៍នគរបាលខណ្ឌដង្កោ ។
នៅពេលមកដល់ប៉ុស្តិ៍នគរបាលភាគីខាងម៉ូតូនិចដែលមានគ្នាបីនាក់ប្រុស២នាក់ និងស្រីម្នាក់បាននិយាយថា ពួកគេមានគ្នាបីនាក់បានចេញពីម្តុំសាលាកសិកម្មចំការដូងគោល បំណងទៅលេងផ្ទះបងប្អូនដែលនៅក្បែរកន្លែងកើតហេតុខាងលើ ដោយបានជិះម៉ូតូម៉ាកហ្ស៊ុយស៊ុគីនិក ពណ៌លឿងបិតតែមខ្មៅ ពាក់ស្លាកលេខ ភ្នំពេញ1CL-194O បានធ្វើដំណើរតាមផ្លូវ២១៧ ក្នុងទិសដៅពីជើងទៅត្បូង ខណៈមកដល់ចំណុចកើតហេតុក៏ស្រាប់តែមានបុរសបីនាក់ដែលគេស្គាល់ថា ជាប្រជាការពាររបស់សាលាខណ្ឌដង្កោបានជិះម៉ូតូ២គ្រឿងធ្វើដំណើរស្របទិសគ្នា ពេលនោះបានជិះមកជិតពួកគេរួចហើយបានយកជើងអូសដីឡើងហុយសំពោង ហើយមើលមុខពួកគេទៀត ។ ពេលនោះដោយសារតែពួកគេរៀងស្រវឹងបន្តិចផងក៏និយាយស្រែកឱ្យទៅខាងប្រជាការពាររបស់សាលាខណ្ឌដង្កោថា មើលមុខអី ក្រោយពីឮសម្រែកនេះរួចមកខាងប្រជាការពារក៏ខឹងបាននាំគ្នាឈប់ម៉ូតូមកព្រួតវាយទៅពួកគេ រួចហើយបានទាំងហៅគ្នីគ្នាមួយរថយន្តបន្ថែមទៀតមកធ្វើការឃាត់ខ្លួន និងវាយខ្នោះដៃពួកគេតែម្តង ហើយបានយកទូរសព្ទដៃម៉ាក Iphone 5 របស់ពួកគេមួយគ្រឿងទៀត និងបានដាក់ពួកគេក្នុងរថយន្តដឹកយកទៅប៉ុស្តិ៍នគរបាលដង្កោដើម្បីធ្វើការសាកសួរតែម្ដង ។
ដោយឡែកខាងប្រជាការពាររបស់សាលាខណ្ឌដង្កោវិញបាននិយាយថា ពួកគេមានគ្នារបីនាក់បានចេញពីកន្លែងធ្វើការនៅសាលាខណ្ឌដង្កោគោលបំណងត្រលប់ទៅផ្ទះវិញនៅម្តុំភូមិបាគូ សង្កាត់ដង្កោ ខណ្ឌដង្កោ បានជិះម៉ូតូ២គ្រឿងម៉ាក ស្មាសមួយគ្រឿង និងម៉ូតូដឹកស្មៅគោមួយគ្រឿង បានធ្វើដំណើរតាមផ្លូវ២១៧ក្នុងទិសដៅពីជើងទៅត្បូង ស្រាប់តែមានបុរស២នាក់ និងនារីម្នាក់បានជិះម៉ូតូម៉ាកហ្ស៊ុយស៊ុគីនិកមកជិតពួកគេរួចហើយបានស្រែកឱ្យពួកគេ ថាមើលមុខអី ស្រាប់តែពេលនោះខាងម៉ូតូនិចបានជិះទៅមុខបន្តិចរួចឈប់ម៉ូតូបំរុងធ្វើស៊ីពួកគេ ដោយខាងម៉ូតូនិចនិងបានយកមួកសុវត្ថិភាពវាយទៅលើពួកគេមុនទើបពួកគេ និងបានបោះដៃតាមវិទ្យុទាក់ទង ឱ្យកម្លាំងគ្នីគ្នាគេមកជួយឃាត់ខ្លួនបុរសទាំងនោះព្រមទាំងម៉ូតូមួយគ្រឿងយកទៅសាកសួរនៅប៉ុស្តិ៍នគរបាលដង្កោតែម្ដងទៅ ។
ក្រោយពេលសមត្ថកិច្ចសាកសួរជនបង្កទាំងសងខាងរួចហើយក៏មិនមានអ្នកណាប្តឹងខាងណានោះទេគឺសុំចែកផ្លូវគ្នាទៅផ្ទះរៀងៗខ្លួន ស្របពេលនោះសមត្ថកិច្ចក៏ធ្វើការណែនាំអប់រំទៅភាគីទាំងសងខាងដោយបានដាក់បន្ទុកឱ្យទៅខាងប្រជាការពាររបស់សាលាខណ្ឌដង្កោ រឿងយកខ្នោះទៅដាក់គេនោះគឺមិនត្រឹមត្រូវនោះទេ គឺខ្នោះនេះគេប្រើសំរាប់តែសមត្ថកិច្ច និងមន្ត្រីកងរាជអាវុធហត្ថតែប៉ុណ្ណោះ ដែលមានសិទ្ធិដាក់ខ្នោះគេបាន ៕
ចែករំលែកព័តមាននេះ