ខេត្តកំពង់ស្ពឺ ៖ បើតាមប្រភពព័ត៌មានបាបឱ្យដឹងថា យ៉ាងហោចណាស់មានមនុស្ស៣នាក់បានរងរបួសព្រោះតែហានប្រថុយបើកគោយន្តដឹកឈើឆ្លងកាត់ភ្លើងដែលកំពុងតែឆេះស្លឹកអំពៅបណ្តាលឱ្យរងរបួសជាទំងន់ ។ ក្រោយកើតហេតុអ្នកភូមិបានជួយសង្គ្រោះយកប្រទាល និងថ្នាំមកជួយបិទកន្លែងរលាករហូតបានធូរស្បើយក៏នាំជនរងគ្រោះត្រឡប់ទៅផ្ទះវិញតែម្តង ។
ករណីនេះកើតឡើងកាលពីវេលាម៉ោង១៦និង១០នាទីថ្ងៃទី១ មីនា ឆ្នាំ២០១៧ នៅចំណុចចំការអំពៅ ជិតអូរអញ្ចា១ ឃុំតាសាល ស្រុកឱរ៉ាល់ ខេត្តកំពង់ស្ពឺ ។ ជនរងគ្រោះដោយសារហេតុការណ៍បើកគោយន្តឆ្លងកាត់ភ្លើងខាងលើ ទី១-ឈ្មោះ អ៊ុន ហម ភេទប្រុស អាយុ៤៨ឆ្នាំ, ទី២-ឈ្មោះ អ៊ុន រត្ន័ថា ភេទប្រុស អាយុ២៣ឆ្នាំ, ទី៣-ឈ្មោះ អ៊ុន ពន្លឺ ភេទប្រុស អាយុ១៤ឆ្នាំ អ្នកទាំង៣រស់នៅរស់ភូមិក្រាំងពោធិ៍ ឃុំអូរ ស្រុកភ្នំស្រួច ។
លោកវរសេនីយ៍ត្រី ប៊ុត ប៊ុនធឿន អធិការនគរបាលស្រុកឱរ៉ាល់បានឱ្យដឹងនៅព្រឹកថ្ងៃទី២ មីនា ឆ្នាំ២០១៧ ថាមុនពេលកើតហេតុ៣នាក់ឪពុកកូនបានបើកគោយន្តដឹកឈើមកពីឱរ៉ាល់លើដោយលួចលាក់ឆ្លងកាត់តាមផ្លូវក្រុមហ៊ុនខាងលើ លុះមកដល់ចំណុចកើតហេតុភ្លើងកំពុងតែឆេះស្លឹកអំពៅដែលខាងក្រុមហ៊ុនទើបកាប់ បណ្តាលឱ្យឆេះរលាកទាំង៣នាក់ឪពុកកូនតែម្តង ។
លោកអធិការបន្តថា តាមការសាកសួរគឺពេលបើកគោយន្តមកដល់ ពេលឃើញភ្លើងកំពុងឆេះបុរសជាឪពុកបានប្រាប់កូនដែលជាអ្នកបើកគោយន្តថា ឱ្យត្រឡប់ក្រោយ តែកូនរបស់គាត់ថា ខ្លាចសមត្ថកិច្ចចាប់ក៏ប្រថុយបើកឆ្លងកាត់ភ្លើងដែលកំពុងឆេះទើបជួបគ្រោះថ្នាក់បែបនេះ ។
ក្រោយកើតហេតុអ្នកភូមិបាននាំគ្នាជួយសង្គ្រោះដោយអ្នកខ្លះយកប្រទាលកន្ទុយក្រពើមកលាបពីលើដើម្បីកាត់បន្ថយភាពឈឺចាប់ ។ ក្រោយការជួយសង្គ្រោះរបស់ប្រជាពលរដ្ឋរហូតបានធូរស្បើយ ហើយនៅល្ងាចថ្ងៃដដែលក៏នាំឪពុកកូនបើកគោយន្តត្រឡប់ទៅផ្ទះបាត់តែម្តង ៕
ចែករំលែកព័តមាននេះ