រាជធានីភ្នំពេញ ៖ នៅលើសង្វៀនទូរទស្សន៍ស៊ីអិនស៊ី ថ្ងៃសៅរ៍ទី៤ មីនា ខាងមុខនេះ កីឡាករជើងខ្លាំងកម្ពុជា៣រូបត្រូវបានគេរៀបចំឱ្យជួបប្រកួតជាមួយកីឡាករបរទេស។ អ្នកនិយមទស្សនាកីឡាប្រដាល់ភាគច្រើន
រាជធានីភ្នំពេញ ៖ នៅលើសង្វៀនទូរទស្សន៍ស៊ីអិនស៊ី ថ្ងៃសៅរ៍ទី៤ មីនា ខាងមុខនេះ កីឡាករជើងខ្លាំងកម្ពុជា៣រូបត្រូវបានគេរៀបចំឱ្យជួបប្រកួតជាមួយកីឡាករបរទេស។ អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើលយ៉ាងអន្ទះសារដោយសារតែពួកគេចង់ដឹងថា កីឡាករកម្ពុជាទាំង៣រូបនេះអ្នកណាសម្រេចគោលដៅអ្នកណាទទួលការអាម៉ាស់នៅលើសង្វៀន ខណៈកីឡាករបរទេសសុទ្ធតែមានសមត្ថភាពខ្លាំងពិបាកផ្ដួលបែបហ្នឹងនោះ ។
គូអន្តរជាតិទី១ កីឡាករ សរ រាជសីហ៍ មកពីក្លិបមោងឫស្សីមរតកគុនខ្មែរខេត្តបាត់ដំបង ត្រូវប្រកួតជាមួយកីឡាករថៃឈ្មោះ ភិតបូផា ស.សក្ដិជ្រើន ក្នុងប្រភេទទម្ងន់៦៩គីឡូក្រាម ។ សរ រាជសីហ៍ មានកម្ពស់១,៧២ម៉ែត្រ ធ្លាប់ប្រកួតបាន៦៤ដង ឈ្នះ៤៨ដង ចាញ់១៥ដង ស្មើ១ដង និងធ្លាប់ផ្ដួលគូប្រកួតឱ្យសន្លប់បាន៩ដង ក្នុងពេលកីឡាករថៃមានកម្ពស់១,៧២ម៉ែត្រដូចគ្នា ធ្លាប់ប្រកួតបាន៩០ដង ឈ្នះ៧០ដង ចាញ់១៧ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន៨ដង ។ គូនេះដោយសារតែមិនធ្លាប់ជួបគ្នាទើបគេពិបាកប៉ាន់ស្មានថានរណាខ្លាំងជាងនរណា ដូច្នេះមានតែរង់ចាំមើលការប្រកួតជាក់ស្ដែងនៅលើសង្វៀនប៉ុណ្ណោះ ។
គូអន្តរជាតិទី២ កីឡាករ ពៅ សក្ដិសិទ្ធ មកពីក្លិបតាព្រហ្មមានជ័យ ត្រូវប្រកួតជាមួយកីឡាករអាមេរិកឈ្មោះSpencer Lamnamoon ក្នុងប្រភេទទម្ងន់៧១គីឡូក្រាម ។ ពៅ សកិ្ដសិទ្ធ មានកម្ពស់១,៧០ម៉ែត្រ ធ្លាប់ប្រកួតបាន៨១ដង ឈ្នះ៤៧ដង ចាញ់២៧ដង ស្មើ៦ដង និងធ្លាប់ផ្ដួលគូប្រកួតឱ្យសន្លប់បាន១៥ដង ក្នុងពេលកីឡាករអាមេរិកមានកម្ពស់១,៧៧ម៉ែត្រ ធ្លាប់ប្រកួតបាន៣០ដង ឈ្នះ២០ដង ចាញ់៨ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៨ដង ។ កីឡាករអាមេរិករូបនេះទើបតែឈានជើងមកប្រកួតនៅស្រុកខ្មែរជាលើកទី១ប៉ុណ្ណោះ ដូច្នេះគេមិនទាន់ដឹងពីថ្វីដៃប្រកួតខ្លាំងប៉ុនណាទេ ។
គូអន្តរជាតិទី៣ កីឡាករ ឡុង សុភី មកពីក្លិបសាលវ័ន្តកីឡា ត្រូវជួបប្រកួតជាមួយកីឡាករថៃឈ្មោះ ស៊ូភើឆ័យ ប្រានស៊ីបហុកក្នុងប្រភេទទម្ងន់៦៧គីឡូក្រាម ។ ឡុង សុភី មានកម្ពស់១,៧៥ម៉ែត្រ ធ្លាប់ប្រកួតបាន១២២ដង ឈ្នះ៩៣ដង ចាញ់២៦ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន៤៤ដង ក្នុងពេលកីឡាករថៃមានកម្ពស់១,៧២ម៉ែត្រ ធ្លាប់ប្រកួតបាន១១០ដង ឈ្នះ៨០ដង ចាញ់២៥ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់បាន១០ដង ។ គូនេះពិបាកទស្សន៍ទាយខ្លាំងណាស់ព្រោះសុទ្ធតែជាជើងខ្លាំងលំដាប់ជួរមុខដូចគ្នា ហើយកីឡាករថៃរូបនេះក៏ធ្លាប់មកប្រកួតនៅលើសង្វៀនស្រុកខ្មែរជាច្រើនលើករួចមកហើយដែរនិងមានវិជ្ជាគុនខ្លាំងពិបាកប៉ាន់ស្មាន ។
ចំណែកគូប្រកួតមិត្តភាពវិញកីឡាករ ជ័យ ស៊ីនេត មកពីក្លិបឃ្លាំងមឿងកីឡា ប្រកួតជាមួយ កីឡាករ វ៉ើន វ៉ាន់ មកពីក្លិបពន្លឺសាមគ្គីខេត្តបាត់ដំបង៕
ចែករំលែកព័តមាននេះ