រាជធានីភ្នំពេញ ៖ ស្នូរកណ្តឹងប្រកាសអាសន្នបានលាន់ឮឡើងក្នុងអគារថ្មីរបស់សាលារាជធានីទាំង១២ជាន់ បានធ្វើឱ្យក្រុមមន្ត្រីនាំគ្នារត់ចុះតាមជណ្តើរមកក្រោមរត់ចែកគ្នា
រាជធានីភ្នំពេញ ៖ ស្នូរកណ្តឹងប្រកាសអាសន្នបានលាន់ឮឡើងក្នុងអគារថ្មីរបស់សាលារាជធានីទាំង១២ជាន់ បានធ្វើឱ្យក្រុមមន្ត្រីនាំគ្នារត់ចុះតាមជណ្តើរមកក្រោមរត់ចែកគ្នាបាតជើងសព្រាតនៅវេលាម៉ោងជាង១១ព្រឹក ថ្ងៃទី២៨ កុម្ភៈ ។ខ្លះចុះមកដល់ដីហើយបានងើយមើលទៅលើ រកកន្លែងដែលបង្កឱ្យមានការប្រកាសអាសន្ននេះ តែរកមិនឃើញមានអ្វីគួរឱ្យកត់សម្គាល់នោះទេ ព្រោះកណ្តឹងរោទិ៍ប្រកាសអាសន្នបែបនេះ ដូចជាមានការឆេះជាន់ណាមួយ ។ល។
មន្ត្រីដែលនាំគ្នារត់ចុះមកដី និងខ្លះអើតតាមបង្អួចដោយសារតែផ្អើលនឹងកណ្តឹងប្រកាសអាសន្ននេះបានហួសចិត្តគ្រប់គ្នា ដោយសារតែ «ភ័យ» គ្មានឃើញហេតុផល ដោយសារតែកណ្តឹងប្រកាសអាសន្នដែលវាលោតខ្លួនឯង។ តាមក្រុមមន្ត្រីបានឱ្យដឹងថា ក្រោយកើតមានហេតុការណ៍ភ័យស្លន់ស្លោគ្រប់គ្នានេះ ក្រុមមន្ត្រីជំនាញបានធ្វើការត្រួតពិនិត្យបានរកឃើញថា គឺបណ្តាលមកពីការឆ្លងចរន្តអគ្គិសនី ដែលជាមូលហេតុធ្វើឱ្យកណ្តឹងប្រកាសអាសន្នរោទិ៍ ។
មានការកត់សម្គាល់ថា ក្នុងរយៈពេលចុងក្រោយនេះចរន្តអគ្គិសនីតែងមានការដាច់មួយភ្លេតៗជារឿយៗ ហើយពេលភ្លើងឆេះឡើងវិញមានការបុកខ្លាំងដែលប្រការនេះ ធ្វើឱ្យមានការព្រួយបារម្ភជាទូទៅសម្រាប់អ្នកប្រើប្រាស់បរិក្ខារអគ្គិសនីនានា ដែលប្រឈមនឹងការឆេះ ឬឆ្លងចរន្តអគ្គិសនីដោយសារតែការដាច់ហើយឆេះ ដូចគេបើកបិទ ។
ទោះបីជាបែបនេះក្តី បញ្ហាដាច់ភ្លើងមិនថាជាតំបន់លំនៅឋាន ឬក្រសួង មន្ទីរ ស្នាក់ការក្រុមហ៊ុនណាទេ មិនអាចស្វែងរកការបំភ្លឺ ឬទទួលបានការបំភ្លឺណាមួយពីមន្ត្រីជំនាញឡើយ ។
ក្នុងហេតុការណ៍ភ្ញាក់ផ្អើលនាំគ្នារត់ចុះពីអគារនេះផងដែរ នៅទីស្នាក់ការធំរបស់ធនាគារអេស៊ីលីដា ដែលមានទីតាំងនៅក្នុងខណ្ឌដូនពេញតាមបណ្តោយវិថីព្រះមុនីវង្ស ក្រុមបុគ្គលិកធនាគារនេះបានរត់ចុះមកក្រោមគ្រប់ៗគ្នា បន្ទាប់ពីទទួលបានព័ត៌មានថា ឆេះអគារ ។ ទោះបីជាបែបណា តាមសេចក្តីរាយការណ៍ថា ការភ្ញាក់ផ្អើលនោះ មានរយៈពេលខ្លីប៉ុណ្ណោះ ដោយសារមិនមានបញ្ហាធ្ងន់ធ្ងរកើតឡើងនោះទេ ។
តាមប្រភពក្រៅផ្លូវការថា ដោយសារតែជាងផ្សារដែក មិនមែនបណ្តាលមកពីការទុស្សេចរន្តអគ្គិសនីនោះឡើយ ៕
ចែករំលែកព័តមាននេះ