រាជធានីភ្នំពេញ ៖ អង្កការ បង្ការរបួសអាស៊ី បានបញ្ជាក់ថា ជារៀងរាល់ឆ្នាំ អ្នកស្លាប់ដោយសារគ្រោះថ្នាក់ចរាចរណ៍ នៅកម្ពុជាប្រមាណ ១២ភាគរយ គឺជាសិស្ស-និស្សិត ហើយប្រមាណពាក់កណ្តាល នៃពួកគាត់(០៦ភាគរយ) គឺជាសិស្សានុសិស្ស នៅកម្រិតអនុវិទ្យាល័យ និងវិទ្យាល័យ ។
លោក គឹម បញ្ញា នាយកអង្គការមូលនិធិបង្ការរបួសអាស៊ី ប្រចាំប្រទេសកម្ពុជា បានលើកឡើងក្នុងពិធីបើកទិវាសុវត្ថិភាពចរាចរណ៍ និងការប្រកាសផ្តើមអនុវត្តសកម្មភាពសុវត្ថិ ភាពចរាចរណ៍ នៅវិទ្យាល័យ ហ៊ុន សែន ត្រសេកកោង ស្ថិតក្នុងខេត្តកំពត នាព្រឹក ថ្ងៃទី២២ ខែកញ្ញា ឆ្នាំ២០២២ បានគូសបញ្ជាក់ថា សិស្សានុសិស្ស ទទួលរងប៉ះពាល់បំផុត ដោយសារតែពួកគាត់ទើបតែរៀន ឬចាប់ផ្តើមជិះយានជំនិះ ពុំមានបទពិសោធន៍គ្រប់គ្រាន់ ក្នុងការបើកបរ ហើយជួនកាល ពួកគាត់បានចូលរូមក្នុងឥរិយាបទមួយប្រកបដោយហានិភ័យខ្ពស់ ដូចជាមិនបានពាក់មួកសុវត្ថិភាព ការបើកបរក្នុងល្បឿនលើសកំណត់ និងការជែងក្នុងស្ថានភាពគ្រោះថ្នាក់ជាដើម ។
លោក គឹម បញ្ញា បានឲ្យដឹងបន្ថែមថា ការបាត់បង់នូវយុវជនវ័យក្មេង ឬសិស្ស-និស្សិតម្នាក់ វាមិនត្រឹមបង្កជាការទុក្ខលំបាក ក្នុងរង្វង់ក្រុមគ្រួសារ សាច់ញាតិប៉ុណ្ណោះទេ តែក៏បានបង្កជាបញ្ហាលំបាក និងការបាត់បង់ដល់សង្គមជាតិទាំងមូលទៀតផង ។
ក្នុងករណីជាច្រើន សិស្ស-និស្សិត ឬយុវជនដែលរងគ្រោះ ត្រូវសម្រាកថែទាំនៅមន្ទីរពេទ្យ និងផ្ទះរបស់ខ្លួនជាច្រើនថ្ងៃ-ខែ ឯខ្លះទៀតត្រូវធ្លាក់ខ្លួនពិការ បាត់បង់សមត្ថភាពពលកម្ម ខកខានការសិក្សារៀនសូត្រ តម្រូវឱ្យឱពុកម្តាយ ឬបងប្អូនសាច់ញាតិត្រូវទទួលបន្ទុកនៅមើលថែទាំជាប្រចាំ ។ល។ ជាឧទាហរណ៍ ដូចជាករណី នៃសិស្សានុសិស្សម្នាក់ នៅវិទ្យាល័យ ហ៊ុន សែន ត្រសេកកោង ដែលបានទទួលរងគ្រោះថ្នាក់ចរាចរណ៍ កាលពីពេលថ្មីៗនេះ ហើយត្រូវបានបញ្ជូនឱ្យទៅព្យាបាលនៅប្រទេស ជិតខាង និងមិនទាន់បានត្រលប់មកសិក្សារៀនសូត្រវិញនៅឡើយ ។
លោកប្រធាន អង្គការមូលនិធិបង្ការរបួសអាស៊ី រូបនោះ បន្តថា គ្រោះថ្នាក់ចរាចរណ៍ មិនមែនជាបញ្ហា ឬការប្រឈម ឬជាបន្ទុកឆ្លើយតបរបស់បុគ្គល-ក្រុម ឬស្ថាប័នណាតែឯងនោះទេ វាជាបញ្ហាប្រឈម និងភារកិច្ចរួមគ្នារបស់យើងទាំងអស់គ្នា ទាំងស្ថាប័នរាជរដ្ឋាភិបាល អាជ្ញាធរថ្នាក់ក្រោមជាតិ សង្គមស៊ីវិល វិស័យឯកជន ប្រព័ន្ធផ្សព្វផ្សាយ និងសាធារណៈជនទូទៅ ដែលជាអ្នកប្រើប្រាស់ផ្លូវក្នុងការបង្ការ និងកាត់បន្ថយបញ្ហាប្រឈមដ៏មហន្តរាយនេះ ។ ការលើកកម្ពស់សុវត្ថិភាពចរាចរណ៍សម្រាប់សិស្ស និស្សិត និងយុវជន ឬនិយាយបែបម្យ៉ាងទៀតថាការពារអនាគតសសរទ្រូង ជាអ្នកបន្តវេន និងជាធនធាន ដ៏សំខាន់របស់ប្រទេសជាតិ ពីគ្រោះថ្នាក់ចរាចរណ៍ គឺជាការការពារការខាតបង់សម្រាប់យើងទាំងអស់គ្នា ជាពិសេសការពារការខាតបង់របស់មាតាបិតា អាណាព្យាបាល សហគមន៍ រាជរដ្ឋាភិបាល និងសង្គមទាំងមូល ។
លោកបញ្ជាក់ថា ៖ «យើងខ្ញុំយល់ឃើញថា ទោះបីជាគ្រោះថ្នាក់ចរាចរណ៍ ដែលយើងចាត់ទុកថា ជាឃាតកលាក់មុខ ដ៏កាចសាហាវដែលអាចឆក់យកអាយុជីវិតមនុស្ស គ្រប់ពេលវេលា ដោយមិនរើសមុខ ពណ៌សម្បុរ អាយុ ឋានៈ តួនាទី ។ល។ ប៉ុន្តែយើងអាចបង្ការ និងកាត់បន្ថយគ្រោះថ្នាក់ ដ៏មហន្តរាយនេះបានយ៉ាងច្រើន បើយើងទាំងអស់គ្នាជាអ្នកពាក់ព័ន្ធមានស្មារតីរួមសហការគ្នា និងចាត់វិធានការឆ្លើយតបរួមគ្នា តាមលទ្ធភាព មធ្យោបាយ និងធនធានដែលខ្លួនមាន» ។
លោកបានបន្ថែមថា ក្នុងថ្ងៃនេះ អង្គការមូលនិធិបង្ការរបួសអាស៊ីប្រារព្ធឱ្យមានទិវាសុវត្ថិភាពចរាចរណ៍ និងការប្រកាសផ្តើមអនុវត្តសកម្មភាពសុវត្ថិភាពចរាចរណ៍ នៅវិទ្យាល័យ ហ៊ុន សែន ត្រសេកកោង ពោលគឺដើម្បីបង្កើនចំណេះដឹងរបស់សិស្សានុសិស្ស និងមាតាបិតាសិស្សឱ្យកាន់តែមានការយល់ដឹង និងយកចិត្តទុកដាក់ខ្លាំងឡើងអំពីសុវត្ថិភាពចរាចរណ៍ ជាពិសេសសម្រាប់ការធ្វើដំណើរនៅក្នុងអំឡុងពេលនៃពិធីបុណ្យភ្ជុំបិណ្ឌប្រពៃណីជាតិខាងមុខនេះ និងបង្កើតឱកាសឱ្យមានការពិភាក្សា លើកឡើងពីកង្វល់ និងសកម្មភាព ដើម្បីជួយឱ្យការធ្វើដំណើររបស់សិស្ស និស្សិត និងយុវជនកាន់តែមានសុវត្ថិភាពប្រសើរឡើង ។
ក្នុងឱកាសនោះដែរលោកជំទាវ មឹន មាណវីរដ្ឋលេខាធិការក្រសួងសាធារណការ នឹងជញ្ជូនក៏បានអំពាវនាវដល់ប្រជាពលរដ្ឋទាំងអស់សូមធ្វើការប្រុងប្រយ័ត្នពេលធ្វើដំណើរ ពិសេសត្រូវគោរពច្បាប់ចរាចរណ៍ទាំងអ្នកធ្វើដំណើររថយន្តធំ ម៉ូតូ៕
ចែករំលែកព័តមាននេះ