រាជធានីភ្នំពេញ ៖ នៅទីបំផុតការប្រកួតដណ្ដើមខ្សែក្រវាត់មាសនៅក្នុងប្រទេសថៃ កាលពីយប់ថ្ងៃទី២៦ ខែកុម្ភៈ ឆ្នាំ២០១៧ ម្ចាស់ខ្សែក្រវាត់ប្រាក់កម្ពុជា មឿន សុខហ៊ុច បានត្រឹមតែឡើងកំដររេញក្នុងជុំទី១ប៉ុណ្ណោះ ដោយសារតែប្រឹងតស៊ូណាស់ដែរ នៅតែចាញ់គូប្រកួតជាជនជាតិបារាំង ។ ក្រៅពីហាលអាវ កីឡាកររូបនេះ ក៏បាត់ឱកាសប្រកួតយកខ្សែក្រវាត់មាស និងទឹកប្រាក់រហូតដល់៣ម៉ឺនដុល្លារ ដែលនឹងប្រគល់ឱ្យអមជាមួយនឹងខ្សែក្រវាត់មាសនៅក្នុងព្រឹត្តិការណ៍ MAX Muy Thai នាយប់នោះផងដែរ ។
ការប្រកួតដែលបានធ្វើឡើងពេញរយៈពេល៣ទឹកយប់មិញនោះ កីឡាករកម្ពុជាខំណាស់ ដើម្បីដណ្ដើមឱកាសឆ្ពោះទៅប្រកួតដណ្ដើមខ្សែក្រវាត់មាសជាមួយកីឡាករបរទេស៣រូបទៀត ។ ការប្រកួតនេះ ត្រូវគេឃើញបន្តផ្ទាល់នៅទូរទស្សន៍ប៉ុស្ដិ៍លេខ៨ថៃ ដោយមានអ្នកលេងហ្វេសប៊ុកចែកចាយការផ្សាយបន្តផ្ទាល់ពីទូរទស្សន៍យ៉ាងគគ្រឹកគគ្រេងនៅពេលកីឡាករកម្ពុជា និងជនជាតិបារាំងប៉ះគ្នា ។ នេះជាការប្រកួតគ្នាដែលមានអ្នកតាមដានវិស័យប្រដាល់ចាប់អារម្មណ៍មិនក្រោមពាក់កណ្ដាលអ្នកចូលចិត្តប្រដាល់នោះទេ ដោយសារតែនោះជាជំនួបដ៏កម្ររបស់កីឡាករកម្ពុជាលើសង្វៀនអន្តរជាតិ ហើយជាការប៉ះគ្នាសម្រាប់ប្រកួតយកប្រាក់៣ម៉ឺនដុល្លារ និងខ្សែក្រវាត់មាស ។
ការប្រកួតនេះ ជាការលេចឡើងបន្ទាប់ពីកីឡាករទាំង៤រូបដែលមានឈ្មោះឡើងប្រកួតគ្នាយកខ្សែក្រវាត់មាស សុទ្ធតែបានបង្ហាញសមត្ថភាពយ៉ាងស្វិតស្វាញ ហើយប្រកួតបានខ្សែក្រវាត់ប្រាក់ក្ដោបក្ដាប់រៀងខ្លួន ។ ការប្រកួតដណ្ដើមខ្សែក្រវាត់មាសកាលពីថ្ងៃទី២៦នោះ មានអ្នកទស្សនាយ៉ាងណែនណាន់តាន់តាប់នៅក្នុងទីលានកីឡាមួយក្នុងខេត្តប៉ាតាយ៉ា ដោយគណៈកម្មការប្រដាល់អន្តរជាតិរបស់ប្រទេសថៃ ។ ព្រឹត្តិការណ៍នេះ កាលពីឆ្នាំ២០១៦ ថៃបានរៀបចំការប្រកួតដណ្ដើមខ្សែក្រវាត់ប្រាក់៤វគ្គផ្សេងគ្នា ដោយមានកីឡាករផ្នែកប្រដាល់សេរីមកពីគ្រប់ប្រទេសចូលរួម ។ គណៈកម្មការជ្រើសរើសបានម្ចាស់ខ្សែក្រវាត់ប្រាក់៤នាក់ ក្នុងការប្រកួត៤លើក ក្នុងនោះមានម្នាក់ជាកីឡាករកម្ពុជាមឿន សុខហ៊ុច ទើបការប្រកួតដណ្ដើមខ្សែក្រវាត់មាសរបស់គេ គឺអ្នកណាៗក៏ចាប់អារម្មណ៍ និងតាមដានដែរ ។
ការប្រកួតកាលពីយប់ថ្ងៃទី២៦ កុម្ភៈ ជាការរៀបចំឱ្យម្ចាស់ខ្សែក្រវាត់ប្រាក់ទាំង៤ប៉ះគ្នាជាថ្មី ដើម្បីប្រាកដថា អ្នកណាទទួលបានខ្សែក្រវាត់មាសមួយទៀត ។ ក្រៅពីម្ចាស់ខ្សែក្រវាត់ទាំង៤ កីឡាករកិត្តិយសមកពីប្រទេសផ្សេងៗ ក៏ឃើញប្រកួតគ្នាកំដរសង្វៀនផងដែរ ដោយគ្រាន់តែការប្រកួតគ្នារវាងពួកគេមិនសូវមានការចាប់អារម្មណ៍ដូចការប្រកួតរបស់កីឡាករម្ចាស់ខ្សែក្រវាត់ប្រាក់ទាំង៤ ។ ម្ចាស់ខ្សែក្រវាត់ប្រាក់ទាំង៤នោះរួមមាន កីឡាករកម្ពុជា មឿន សុខហ៊ុច កីឡាករ Guillaume Pascal ជនជាតិបារាំង កីឡាករ Luke Bar ជនជាតិវែល និងកីឡាករ Fabrice Delannon ជនជាតិហ្គាណា ។ កីឡាករទាំង៤តម្រូវឱ្យចាប់គូគ្នាប្រកួតដោយរូបមន្តចាញ់ធ្លាក់ៗ ហើយអ្នកឈ្នះបន្តឡើងប្រកួតដណ្ដើមយកទឹកប្រាក់ប្រមាណ៣ម៉ឺនដុល្លារ និងខ្សែក្រវាត់មាស ។ កីឡាករកម្ពុជាត្រូវប៉ះប្រកួតជាមួយកីឡាករជនជាតិបារាំង ហើយកីឡាករអឺរ៉ុបមកពីប្រទេសវែល និងកីឡាករហ្គាណាជាជនស្បែកខ្មៅត្រូវប៉ះគ្នា ។ ការប្រកួតនេះ មិនមានការកំណត់ឱ្យប្រកួតយកលេខ៣ និងលេខ៤ នោះឡើយ ទើបអ្នកចាញ់ក្លាយជាអ្នកហាលអាវ ហើយបាត់បង់ឱកាសគួរឱ្យស្ដាយ ។ ក្រោយប្រកួតចាញ់ កីឡាករមឿន សុខហ៊ុច ត្រូវគេឃើញខកបំណងខ្លាំងជាងអ្នកទស្សនាទៅទៀត ហើយបើកុំតែកម្លាំងរបស់គូប្រកួតល្អជាងប្រហែលជាគេមិនបាត់បង់ឱកាសបែបហ្នឹងនោះទេ អីុចឹងហើយទើបជារឿងសោកស្ដាយដែលគេប្រឹងហ្វឹកហាត់យ៉ាងអស់ពីសមត្ថភាពនៅមុនការប្រកួតចាប់ផ្ដើម តែបានត្រឹមតែកំដរគូប្រកួត ដោយមិនអាចដណ្ដើមយកទឹកប្រាក់៣ម៉ឺនដុល្លារ និងខ្សែក្រវាត់មាសដែលកម្មវិធីកំណត់ឱ្យ ។
កីឡាករ មឿន សុខហ៊ុច បានថ្លែងប្រាប់មុនឡើងយន្តហោះទៅប្រកួតនៅថៃថា លោកចំណាយមិនទទួលយកការប្រកួតក្នុងស្រុកមិនតិចនោះទេ ដើម្បីទុកកម្លាំង និងប្រឹងហ្វឹកហាត់ជាមួយអ្នកជំនាញ ទើបលោកហាក់សង្ឃឹមច្រើនដែរ មុនពេលការប្រកួតប៉ះគ្នា ។ ទោះបីយ៉ាងណា ការបរាជ័យរបស់លោកមិនត្រូវអ្នកគាំទ្រណាម្នាក់រិះគន់នោះទេ ដោយមានតែការលើកទឹកចិត្តដោយសារតែគេប្រឹងអស់ពីសមត្ថភាពទៅហើយ ប៉ុន្តែទៅមិនរួចជាមួយជនជាតិបារាំងត្រង់កម្លាំងតែម្ដង ។ ការប្រកួតត្រូវគេឃើញចាញ់ប្រៀបខ្លាំងឡើងក្នុងទឹកទី៣ ទើបធ្វើឱ្យអ្នកគាំទ្ររបស់ មឿន សុខហ៊ុច ក៏អស់ចិត្ត ដោយមិនមានអ្នកណាម្នាក់រិះគន់ចំពោះលទ្ធផល ។ ម្នាក់ៗសរសើរថា កីឡាករកម្ពុជារស់នៅតែផ្ទះជួល ខ្វះខាតលទ្ធភាពបំប៉នរាងកាយ តែអាចប្រកួតពេញ៣ទឹកជាមួយកីឡាករអន្តរជាតិរបស់បារាំង និងបានគ្រងតំណែងជាម្ចាស់ខ្សែក្រវាត់ប្រាក់តំណាងឱ្យកម្ពុជាទៅប្រកួតយកខ្សែក្រវាត់មាស គឺជារឿងកម្រណាស់សម្រាប់អ្វីដែលគេធ្វើបាន ។ នេះជាមុខមាត់ធំមួយដែលកម្ពុជា មានមុខឡើងប្រកួតក្នុងព្រឹត្តិការណ៍ជាទ្រង់ទ្រាយធំបែបនេះ បើទោះជាមានការសោកស្ដាយជុំវិញមិនបានខ្សែក្រវាត់មាស និងទឹកប្រាក់៣ម៉ឺនដុល្លារក៏ដោយ ៕
ចែករំលែកព័តមាននេះ