រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ក្មេងស្ទាវមួយក្រុមដែលមានគ្នាជាច្រើននាក់បានជិះម៉ូតូចូលទៅវា.យតប់ជាមួយក្មេងស្ទាវមួយក្រុមទៀត ដែលមានគ្នាតិចជាង ធ្វើឲ្យក្មេងស្ទាវដែលមានគ្នាតិចជាងវា.យត្រឡប់មកវិញ បណ្ដាលឲ្យខ្ទេចម៉ូតូមួយគ្រឿង បង្កឲ្យមានការភ្ញាក់ផ្អើលដល់សមត្ថកិច្ចចុះអន្តរាគមន៍កាលពីវេលាម៉ោង៣និង៣០នាទីទៀបភ្លឺ ថ្ងៃទី២០ ខែកញ្ញា ឆ្នាំ២០២២ នៅត្រង់ចំណុចក្នុងស្ថានីយប្រេងឥន្ធនៈ តូតាល់ តាមបណ្ដោយផ្លូវសហព័ន្ធរុស្ស៊ី ស្ថិតក្នុងសង្កាត់អូបែកក្អម ខណ្ឌសែនសុខ។
តាមប្រភពពីយុវជនជាម្ចាស់ម៉ូតូដែលត្រូវក្មេងស្ទាវវា.យកម្ទេច បានរៀបរាប់ប្រាប់ឲ្យដឹងថា នៅមុនពេលកើតហេតុ ពួកគេមានគ្នា៣នាក់ជិះម៉ូតូ២គ្រឿង ដោយមួយគ្រឿងម៉ាក ហុងដាឌ្រីម ស៊េរីឆ្នាំ២០២២ ពណ៌ខ្មៅ ពាក់ស្លាកលេខ ព្រៃវែង1T-0572 និងមួយគ្រឿងទៀតម៉ាក វីននឺ ពណ៌ក្រហម ពាក់ស្លាកលេខ ភ្នំពេញ1JK-6225 គឺពួកគេបានជិះចេញពីក្លិបកម្សាន្ត ហ្គោឡាញ ក្នុងបំណងជិះទៅផ្ទះវិញ នៅផ្លូវ២០០៤។
ប្រភពដដែលបន្តថា លុះពេលដែលជិះដល់ចំណុចកើតហេតុ ពួកគេក៏បានជិះចូលទៅចាក់សាំង ប៉ុន្តែមិនទាន់បានចាក់ផង ស្រាប់តែមានក្មេងស្ទាវមួយក្រុម មានគ្នាជាច្រើននាក់ជិះម៉ូតូជាង១០គ្រឿង ចូលមកធ្វើការវា.យតប់មកលើពួកខ្លួនតែម្តង។ ភ្លាមៗនោះ ដោយពួកខ្លួនភ័យស្លន់ស្លោពេក ក៏ជិះម៉ូតូរត់គេចខ្លួនបានមួយគ្រឿង ចំណែកឯម៉ូតូហុងដាឌ្រីមមួយគ្រឿងទៀត ជិះគេចខ្លួនមិនរួច ក៏ត្រូវបានក្មេងស្ទាវទាំងនោះ វា.យកម្ទេច បណ្ដាលឲ្យរងការខូចខាតយ៉ាងដំណំ ហើយក្មេងស្ទាវទាំងអស់នោះ ក៏បាននាំគ្នាជិះគេចខ្លួនចេញពីកន្លែងកើតហេតុបាត់ស្រមោលតែម្ដង។
បើតាមប្រភពព័ត៌មានពីបុគ្គលិកផ្នែកចាក់សាំងនៅក្នុងស្ថានីយប្រេងឥន្ធនៈកើតហេតុបានរៀបរាប់ប្រាប់ឲ្យដឹងថា នៅមុនពេលកើតហេតុ មានក្មេងស្ទាវប្រុសស្រីជាង១០នាក់ ជិះម៉ូតូ៦ទៅ៧គ្រឿង បានជិះទៅឈប់ចតនៅក្នុងស្ថានីយប្រេងឥន្ធនៈកើតហេតុ ។ រយៈពេល២០នាទីក្រោយមក ក៏ស្រាប់តែក្មេងស្ទាវប្រុសៗមួយក្រុមទៀត មានគ្នាជាង២០នាក់ ជិះម៉ូតូជាង១០គ្រឿង ក្នុងនោះក៏មានយុវជនជាម្ចាស់ម៉ូតូរងគ្រោះផងដែរ បានជិះចូលទៅវា.យតប់ក្មេងស្ទាវដែលមានគ្នាតិចជាង ដែលឈប់ចតនៅក្នុងស្ថានីយប្រេងឥន្ធនៈកើតហេតុ។
បុគ្គលិកខាងលើបន្តថា ប៉ុន្តែក៏ត្រូវការបានក្មេងស្ទាវដែលមានគ្នាតិចជាងនោះ វា.យតប់ត្រឡប់មកវិញ ធ្វើឲ្យក្មេងស្ទាវដែលមានច្រើនជាងនាំគ្នាជិះម៉ូតូគេចខ្លួន ដោយរត់ចោលម៉ូតូរបស់យុវជនរងគ្រោះនោះ ហើយក៏ត្រូវបានក្មេងស្ទាវដែលមានគ្នាតិចជាងនោះវា.យកម្ទេចម៉ូតូនោះ បណ្តាលឲ្យខូចខាតយ៉ាងដំណំ រួចក៏នាំគ្នាជិះគេចខ្លួនបាត់ស្រមោលអស់តែម្តង។
ក្រោយពេលកើតហេតុ ក៏មានសមត្ថកិច្ចមូលដ្ឋានចុះមកធ្វើការអន្តរាគមន៍ និងនាំយុវជនទាំង៣នាក់នោះ ទៅកាន់ប៉ុស្តិ៍នរគបាលរដ្ឋបាលអូបែកក្អម ដើម្បីធ្វើការសាកសួរ និងចាត់ការទៅតាមនីតិវិធីជាបន្តទៀត៕
ចែករំលែកព័តមាននេះ