រាជធានីភ្នំពេញ ៖ នៅរសៀលថ្ងៃសៅរ៍ ទី២៥ កុម្ភៈ ស្អែកនេះ ប្រដាល់អន្តរជាតិរបស់ខារ៉ាបាវរដូវកាលទី២ វគ្គសន្សំពិន្ទុប្រចាំសប្ដាហ៍រវាងកីឡាករកម្ពុជា និងបរទេសកាន់តែមានសភាពក្ដៅគគុកទៀតហើយ ដោយសារកីឡាករម្នាក់ៗសុទ្ធតែចង់ក្លាយទៅជាបេក្ខភាពឡើងទៅប្រកួតក្នុងវគ្គពាក់កណ្ដាលផ្ដាច់ព្រ័ត្រ ។ សមាសភាពកីឡាករកម្ពុជាដែលឡើងប្រកួតដណ្ដើមឱកាសនេះ គឺកីឡាករឡុង សុវណ្ណឌឿន និងកីឡាករ រឿង សោភ័ណ្ឌ ត្រូវប៉ះប្រកួតជាមួយកីឡាករថៃ និងឡាវ ដែលមានការទទួលស្គាល់ថាខ្លាំង ។
ព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់របស់ភេសជ្ជៈខារ៉ាបាវវគ្គ២នេះ ត្រូវគេមើលឃើញថា មានការគាំទ្រដាច់ឆ្ងាយតែម្ដង បើធៀបនឹងការប្រកួតអន្តរជាតិកាលពីវគ្គ១ ដោយសារតែសមាសភាពកីឡាករទាំងខាងកម្ពុជា និងខាងបរទេសសុទ្ធតែមានកម្រិតល្អ ហើយមើលទៅម្នាក់ៗខំបញ្ចេញថ្វីដៃគួរឱ្យទាក់ទាញរៀងខ្លួន ។ កីឡាករកម្ពុជា២រូបរួមមានជើងខ្លាំង ឡុង សុវណ្ណឌឿន និង រឿង សោភ័ណ្ឌ នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃ និងឡាវ នៅរសៀលថ្ងៃសៅរ៍ស្អែកនេះ ។
កីឡាករកម្ពុជាត្រូវបានអះអាងថា សម្ងំហ្វឹកហាត់មិនខុសគ្នានោះទេ ដោយសារតែចង់គ្រងតំណែងជាម្ចាស់ខ្សែក្រវាត់អន្តរជាតិរបស់ខារ៉ាបាវនិងទទួលបានប្រាក់លាន អមដោយកិត្តិយសមុខមាត់ ។ ទោះបីយ៉ាងណា គេមិនទាន់ដឹងថា កីឡាករណាមួយនឹងមានលទ្ធភាពយកឈ្នះនៅសប្ដាហ៍នេះទេ ដោយសារតែភាគីទាំងសងខាងសុទ្ធតែបានត្រៀមទុកពីចម្ងាយ ហើយជាមួយនឹងប្រវត្តិចាញ់ខ្លះ ឈ្នះខ្លះ សុទ្ធតែជាលក្ខខណ្ឌដែលធ្វើឱ្យពួកគេត្រូវការស្ដារមុខមាត់ ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជាជើងខ្លាំង២រូបខាងលើ នឹងបើកឆាកប្រយុទ្ធ
សម្រាប់សប្ដាហ៍ទី៤នៅក្នុងព្រឹត្តិការណ៍ដណ្ដើមខ្សែក្រវាត់ជើងឯកខារ៉ាបាវ ។
កីឡាករ ឡុង សុវណ្ណឌឿន មកពីក្លិបឡុងសាលវ័ន្តកីឡា ប៉ះប្រកួតជាមួយកីឡាករថៃកេង កាត់ ក្នុងនាមជាគូបើកឆាកអន្តរជាតិ ។ លោកជឿជាក់ថា កីឡាករ ឡុង សុវណ្ណឌឿន នឹងមិនភ្លាត់ឱ្យចាញ់សម្រាប់ការប្រកួតនេះទេ ព្រោះបើប្រកួតឈ្នះនឹងឈានទៅវគ្គផ្ដាច់ព្រ័ត្រ ។
លោកថា កីឡាកររូបនេះនឹងត្រូវការឈ្នះដើម្បីលុបលាងភាពអាម៉ាស់ និងដើម្បីយកឱកាសទៅប្រកួតយកខ្សែក្រវាត់ ខណៈដែលការប្រកួតនេះបើចាញ់ក្រៅពីបាត់ប្រាក់លានក៏ប៉ះពាល់ដល់ប្រជាប្រិយភាព ។ លោករំពឹងថា ការប្រកួតបើកឆាករបស់គូអន្តរជាតិនេះ នឹងទាក់ទាញចំណាប់អារម្មណ៍ខ្លាំងក្លា ដោយសារកីឡាករថៃគឺត្រូវការឈ្នះដើម្បីឈានឡើងទៅវគ្គបន្ត ហើយកីឡាករកម្ពុជាក៏ត្រូវការសង្គ្រោះប្រជាប្រិយភាព ។
កីឡាករ កេង កាត់ ធ្លាប់ប្រកួត៩៤លើក ឈ្នះ៨២លើក ចាញ់១១លើក និងស្មើ១លើក ក្នុងពេលដែលកីឡាករកម្ពុជាឆ្លងកាត់ការប្រកួតរហូតដល់៩៨លើក ឈ្នះ៨៣លើក ចាញ់១០លើក និងស្មើ៥លើក ។
សម្រាប់កីឡាករ រឿង សោភ័ណ្ឌ លោកញាណ សុធី បញ្ជាក់ថា គេត្រូវឡើងប្រកួតជាមួយកីឡាករឡាវឈ្មោះថា អ៊ូឡាន ក្នុងការដណ្ដើមឱកាសឡើងទៅវគ្គផ្ដាច់ព្រ័ត្រដូចគ្នា សម្រាប់ព្រឹត្តិការណ៍អន្តរជាតិខារ៉ាបាវនេះ ។ លោកថា ឆ្លងកាត់ការប្រកួតកន្លងមកកីឡាកររូបនេះនៅមិនទាន់ច្បាស់ថា នឹងបានឡើងទៅដណ្ដើមខ្សែក្រវាត់ឬយ៉ាងណានោះទេ ដោយសារតែគូប្រកួតដែលបានឡើងក្នុងវគ្គនេះក៏សុទ្ធតែខ្លាំងមិនធម្មតា ។ លោកថា កីឡាករឡាវធ្លាប់ប្រកួត៦៧លើក ឈ្នះ៥៥លើក និងចាញ់១២លើក ក្នុងពេលកីឡាករកម្ពុជាធ្លាប់ប្រកួតបានដល់១៤៦លើក ឈ្នះ១២៩លើក ចាញ់១៥លើក និងស្មើ២លើក ទើបលោករំពឹងថា បទពិសោធន៍ល្អជាងរបស់កីឡាករកម្ពុជានៅតែឈ្នះសម្រាប់វគ្គនេះ ដោយសារតែការប្រកួតនាពេលកន្លងមកធ្លាប់ឈ្នះឡាវក្នុងវគ្គសន្សំពិន្ទុម្ដងហើយ ។ យ៉ាងណាមិញ គេនៅមិនទាន់ប្រាកដថា សមត្ថភាពរបស់កីឡាកររឿង សោភ័ណ្ឌ នឹងអាចយកឈ្នះលើគូប្រកួតជាលើកទី២នៅថ្ងៃស្អែកទេ ក្នុងពេលដែលកីឡាករឡាវក៏មិនមែនធម្មតានោះទេ បើផ្អែកទាំងកម្លាំង បច្ចេកទេស និងសមត្ថភាពក្នុងពេលប៉ះគ្នាលើកមុនដែលមិនធម្មតាដែរ ។ ម្នាក់ៗបានត្រឹមចាំមើលពីការប្រកួតមួយនេះប៉ុណ្ណោះក្នុងពេលដែលរឿង សោភ័ណ្ឌ ក៏ចង់ឈ្នះមិនអាចចាញ់ ហើយកីឡាករឡាវក៏ចង់ឈ្នះមិនអាចចាញ់ ។ គូនេះត្រូវគេមើលឃើញថានឹងស៊ីសាច់ហុតឈាម ដោយសារតែអ្នកឈ្នះបានឡើងវគ្គបន្ត ហើយអ្នកចាញ់ត្រូវប្រឈមបាត់ឱកាសសម្រាប់វគ្គផ្ដាច់ព្រ័ត្រដើម្បីគ្រងតំណែងជាម្ចាស់ខ្សែក្រវាត់ ៕
ចែករំលែកព័តមាននេះ