ពុទ្ធោ ! កំពុងដើរឆ្លងផ្លូវត្រូវរថយន្តបុកស្លា.ប់ភ្លាម
ខេត្តពោធិ៍សាត់ ៖ បុរសម្នាក់ ខណៈកំពុងដើរឆ្លងផ្លូវកាលពីវេលាម៉ោង៧ និង៣០នាទីយប់ ថ្ងៃទី២១ ខែកុម្ភៈ ឆ្នាំ២០១៧ ស្រាប់តែរថយន្ត១គ្រឿងបានបើកមកបុកបណ្ដាលឲ្យ …
ខេត្តពោធិ៍សាត់ ៖ បុរសម្នាក់ ខណៈកំពុងដើរឆ្លងផ្លូវកាលពីវេលាម៉ោង៧ និង៣០នាទីយប់ ថ្ងៃទី២១ ខែកុម្ភៈ ឆ្នាំ២០១៧ ស្រាប់តែរថយន្ត១គ្រឿងបានបើកមកបុកបណ្ដាលឲ្យស្លាប់ភ្លាមៗនៅលើផ្លូវជាតិលេខ៥ ចន្លោះគីឡូម៉ែតលេខ១៩៨ ១៩៩ ស្ថិតក្នុងភូមិអណ្ដូងក្រសាំង ឃុំស្នាមព្រះ ស្រុកបាកាន ។
លោកវរៈសេនីយ៍ត្រី ស៊ឹម រ័ត្ន អនុប្រធានការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្ត បានឲ្យដឹងថា ជនរងគ្រោះឈ្មោះ ស៊ីម សែន ភេទប្រុស អាយុ៣៤ឆ្នាំ រស់នៅភូមិ-ឃុំកើតហេតុខាងលើ ។ នៅយប់កើតហេតុ ជនរងគ្រោះបានដើរឆ្លងផ្លូវជាតិលេខ៥ពីជើងទៅត្បូង ខណៈទើបតែដើរឆ្លងគំនួសផ្លូវស្រាប់តែរថយន្ត១គ្រឿងបោះពួយយ៉ាងលឿនពីលិចទៅកើតបុកចំយ៉ាងពេញទំហឹងបណ្ដាលឲ្យជនរងគ្រោះស្លាប់ភ្លាមៗនៅនឹងកន្លែងកើតហេតុ ហើយរថយន្ដបង្កបានបើកគេចខ្លួនបាត់ស្រមោល ដោយពុំមានអ្នកណាស្គាល់ថាម៉ាកអ្វី និងពាក់ស្លាកលេខប៉ុន្មាននោះទេ គ្រាន់តែដឹងថា រថយន្ដនោះជារថយន្ដធុនតូចប៉ុណ្ណោះ ។
លោកឲ្យដឹងទៀតថា បន្ទាប់ពីកើតហេតុភ្លាម សមត្ថកិច្ចមូលដ្ឋាន និងសមត្ថកិច្ចខេត្តបានទំនាក់ទំនងគ្នាក្នុងការស្ទាក់ចាប់រថយន្ដបង្កគ្រោះថ្នាក់នោះដែរ ប៉ុន្តែទំនងជាចូលពួននៅកន្លែងណាមួយបាត់ ទើបសមត្ថកិច្ចចាប់មិនបាន ហើយពេលនេះកំពុងតាមស្រាវជ្រាវ ។ ចំណែកសពជនរងគ្រោះបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅគេហដ្ឋាននៃសព ដែលស្ថិតនៅក្នុងភូមិអណ្ដូងក្រសាំង ឃុំស្នាមព្រះ ស្រុកបាកាន ៕
ចែករំលែកព័តមាននេះ