រាជធានីភ្នំពេញ ៖ បុរសម្នាក់ត្រូវបានសមត្ថកិច្ចចាប់ខ្លួនបានភ្លាមៗកាលពីវេលាម៉ោង១០ និង១០នាទីព្រឹក ថ្ងៃទី២១ ខែកុម្ភៈ ឆ្នាំ២០១៧ ខណៈកំពុងធ្វើសកម្មភាព …
រាជធានីភ្នំពេញ ៖ បុរសម្នាក់ត្រូវបានសមត្ថកិច្ចចាប់ខ្លួនបានភ្លាមៗកាលពីវេលាម៉ោង១០ និង១០នាទីព្រឹក ថ្ងៃទី២១ ខែកុម្ភៈ ឆ្នាំ២០១៧ ខណៈកំពុងធ្វើសកម្មភាពគាស់ផ្ទះប្រធានផ្សារ «វិនមីង» ដែលមានទីតាំងនៅក្នុងផ្សារ «វីនមីង» ស្ថិតនៅជាប់របងសួនឧស្សាហកម្មកាណាឌីយ៉ា ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ម្ចាស់ផ្ទះដែលត្រូវចោរគាស់យកទូរស័ព្ទនោះឈ្មោះ ផេង វុត្ថា ភេទប្រុស មុខរបរជាប្រធានផ្សារ «វិនមីង» ស្នាក់នៅកន្លែងកើតហេតុខាងលើ ។ ចំណែកជនសង្ស័យដែលត្រូវចាប់ខ្លួនឈ្មោះ តុល សារ៉ាត់ ភេទប្រុស អាយុ២៤ឆ្នាំមុខរបរជាងផ្សារដែក ស្នាក់នៅបន្ទប់ជួលនៅក្នុងភូមិព្រៃព្រីងជើង សង្កាត់ចោមចៅ ខណ្ឌពោធិ៍ សែនជ័យ មានស្រុកកំណើតនៅ ស្រុកត្រាំងកក់ ខេត្តតាកែវ គាស់យកបានតែទូរស័ព្ទម៉ាកអាយហ្វូន១គ្រឿង និងណូគា១គ្រឿងប៉ុណ្ណោះ ។
ប្រភពព័ត៌មានបានឲ្យដឹងថា មុនពេលកើតហេតុ ម្ចាស់ផ្ទះមិនបាននៅផ្ទះនោះទេ ដោយបានចាក់សោរទ្វារត្រឹមត្រូវមុននឹងគាត់ចាកចេញទៅធ្វើការនៅក្រៅ ខណៈនោះជនសង្ស័យខាងលើបានធ្វើសកម្មភាពគាស់ផ្ទះ ក្នុងបំណងចូលទៅធ្វើសកម្មភាពលួចយកទ្រព្យសម្បត្តិ ប៉ុន្តែលួចយកបានតែទូរស័ព្ទដៃ២គ្រឿងប៉ុណ្ណោះ ។ ខណៈនោះម្ចាស់ផ្ទះបានមើលឃើញតាមកាមេរ៉ាសុវត្ថិភាពដែលភ្ជាប់តាមទូរស័ព្ទដៃឃើញជនសង្ស័យកំពុងធ្វើសកម្មភាពគាស់បន្ទប់ ក៏បានរាយការណ៍ទៅនគរបាលប៉ុស្ដិ៍ចោមចៅ ចុះទៅឃាត់ខ្លួនភ្លាមៗតែម្តង ។
ក្រោយពេលចាប់ខ្លួន ជនសង្ស័យត្រូវបាននាំទៅធ្វើការសាកសួរនៅប៉ុស្តិ៍ចោមចៅ ដើម្បីកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ