ប្រទេសថៃ ៖ យោងតាមក្រុមហ៊ុន CBRE Thailand បានឲ្យដឹងថា កង្វះខាតដីក្នុងទីតាំងសំខាន់ៗសម្រាប់ការសាងសង់ និងការកើនឡើងនៃតម្លៃដី បានជំរុញឲ្យអ្នកវិនិយោគងាកមកកាន់អគារចាស់ៗសម្រាប់ជួសជុល ឬកែច្នៃឲ្យក្លាយជាគម្រោងថ្មីៗវិញ ។
អ្នកស្រី Aliwassa Pathnadabutr នាយកគ្រប់គ្រងបាននិយាយថា ទីផ្សារអចលនទ្រព្យនឹងមើលឃើញអគារចាស់ៗទទួលបានប្រជាប្រិយភាពក្នុងទីតាំងសំខាន់ៗដែលជាកន្លែងមានកង្វះខាតដៃ និងដីមានតម្លៃខ្ពស់ ។
អ្នកស្រីបានបន្តថា អ្នកវិនិយោគខ្លះក៏ពិចារណាលើសណ្ឋាគារឬការិយាល័យសម្រាប់ជួស ជុលផងដែរ ។
យោងតាមក្រុមហ៊ុនCBRE បានឲ្យដឹងទៀតថា តម្លៃដីកាលពីឆ្នាំមុនបានកើនឡើងខ្ពស់ជាងគេគឺមកត្រឹម១,៩លានបាតក្នុងតំបន់ Chidlom-Ploenchit-Lumpini តម្លៃ១,៧៥លានបាតលើផ្លូវ Sukhumvit និង ១,៤៥លានបាតក្នុងតំបន់ Silom-Sathon ។
យោងតាមប្រភពមួយមកពីទីផ្សារអច-លនទ្រព្យក៏បានឲ្យដឹងថា តម្លៃដីនឹងកើនឡើងដល់កម្រិតខ្ពស់ជាងគេផងដែរក្នុងឆ្នាំនេះ ប្រសិនបើដីលើផ្លូវWireless Road ដែលជាកម្មសិទ្ធិរបស់ស្ថានទូតអង់គ្លេស ត្រូវបានលក់ចេញ ។
ក្នុងពេលបច្ចប្បន្ននេះ មានក្រុមហ៊ុនពីរដែលកំពុងតែប្រកួតប្រជែងគ្នាគឺ Central Group និង TCC Group ។
ប្រភពខាងលើបាននិយាយថា Central Group អាចនឹងទទួលបានជ័យលាភីក្នុងការដេញថ្លៃ ព្រោះពួកគេត្រូវបានរាយការណ៍ថាហ៊ានចំណាយប្រាក់ខ្ពស់ជាង ។
ជាមួយក្នុងនេះផងដែរ ក្រុមហ៊ុនខាងលើត្រូវការដីនេះដែលនៅជាប់ផ្សារទំនើប Central Embassy ដែលត្រូវបានសាងសង់លើដីរបស់ Central Group ។
ខណៈដែលតម្លៃដីបន្តមានការកើនឡើង តម្លៃខុនដូថ្មីៗក៏នឹងបន្តកើនឡើងផងដែរ ។ ក្នុងកំឡុងឆ្នាំ២០១០ ដល់២០១៦ តម្លៃខុនដូបានកើនឡើងជាមធ្យម១០,៩%ក្នុងមួយឆ្នាំឯណោះ។
ក្នុងកំឡុងពេលត្រីមាសទី៤នាឆ្នាំមុន ចំនួនខុនដូដែលបានសម្រេចការសាងសង់ក្នុងតំបន់កណ្តាលក្រុងបានកើនឡើង៨,៧% បើធៀបនឹងឆ្នាំ២០១៥ ស្មើនឹង១២២.៤០៤យូនីត ខណៈដែល២៥.០០០យូនីតទៀត នឹងត្រូវបានសម្រេចនាពេលអនាគត ។
ខុនដូដែលនៅក្នុងតំបន់ឆ្ងាយពីកណ្តាលក្រុង និងជាយក្រុងក៏បានកើនឡើង១៥% ស្មើនឹង៤៦២.៦៩២យូនីតផងដែរ ដោយមាន ១១១.៧០០យូនីតទៀត នឹងត្រូវបានសម្រេចនាពេលអនាគត ៕
ចែករំលែកព័តមាននេះ