អ្នកកាសែតតាមហ្វេសប៊ុកលោក សាន្ត ប៊ុនធឿន ជួបគ្រោះអកុសល
ខេត្តកំពង់ស្ពឺ ៖ លោក សាន្ត ប៊ុនធឿន ដែលអ្នកលេងហ្វេសប៊ុកបានស្គាល់ និងឃើញលោកធ្វើដំណើរទៅគ្រប់ច្រកល្ហកក្នុងប្រទេស ធ្វើសម្ភាសន៍ជាមួយបុគ្គលមួយចំនួន
ខេត្តកំពង់ស្ពឺ ៖ លោក សាន្ត ប៊ុនធឿន ដែលអ្នកលេងហ្វេសប៊ុកបានស្គាល់ និងឃើញលោកធ្វើដំណើរទៅគ្រប់ច្រកល្ហកក្នុងប្រទេស ធ្វើសម្ភាសន៍ជាមួយបុគ្គលមួយចំនួន
ខេត្តកំពង់ស្ពឺ ៖ លោក សាន្ត ប៊ុនធឿន ដែលអ្នកលេងហ្វេសប៊ុកបានស្គាល់ និងឃើញលោកធ្វើដំណើរទៅគ្រប់ច្រកល្ហកក្នុងប្រទេស ធ្វើសម្ភាសន៍ជាមួយបុគ្គលមួយចំនួនដែលកំពុងកើតមានបញ្ហាចោទប្រកាន់គ្នា ឬពីបុគ្គលដែលល្បីផ្សេងៗ ធ្វើឱ្យសង្គមមានការចាប់អារម្មណ៍ តាមរយៈការបង្ហោះជាវីដេអូឃ្លីបនោះ ពេលនេះលោកបានរងរបួសជាមួយអ្នកបើកបររថយន្តម្នាក់ទៀត ក្នុងគ្រោះថ្នាក់ចរាចរណ៍មួយរវាងរថយន្តកាមរីឆ្លាម និងរថយន្តហ៊ីណូសណ្តោងកុងតឺន័រ ។
ហេតុការណ៍គ្រោះថ្នាក់នេះ បានកើតឡើងកាលពីវេលាម៉ោង៤និង៤៥នាទីទៀបភ្លឺថ្ងៃទី១៧ ខែកុម្ភៈ តាមផ្លូវជាតិលេខ៤ ចន្លោះគីឡូម៉ែត្រលេខ៨៦និងលេខ៨៧ ស្ថិតក្នុងភួមិទី១ ឃុំត្រែងត្រយឹង ស្រុកភ្នំស្រួច ។ អ្នកបើកបររថយន្តកាមរីឆ្លាមឈ្មោះ ទុយ សុភត្រា ភេទប្រុស អាយុ២៧ឆ្នាំ រងរបួសធ្ងន់ និងលោក សាន្ត ប៊ុនធឿន អាយុ៤៤ឆ្នាំ ដែលរួមដំណើររងរបួសក្បាលរយះហូរឈាមកក្លាក់មិនស្រាលប៉ុន្មានទេ ។ ចំណែកអ្នកបើកបររថយន្តសណ្តោង មិនស្គាល់អត្តសញ្ញាណបានរត់គេចខ្លួនដាក់មេប្រូចបាត់ ។
ប្រភពពីសមត្ថកិច្ចបានស្រង់សម្តីសាក្សីថា រថយន្តកាមរីបើកបរពីលិចទៅកើត លុះទៅដល់ចំណុចខាងលើ ស្រាប់តែបុកគ្នាជាមួយរថយន្តហ៊ីណូសណ្តោងកុងតឺន័របណ្តាលឱ្យអ្នកជិះក្នុងរថយន្តកាមរីរងរបួស និងឃើញចុះពីរថយន្តហៅអ្នកដំណើរតាមផ្លូវ ឱ្យជួយចាប់អ្នកបើកបររថយន្តហ៊ីណូ ។ ជាមួយនេះ បានយកទូរស័ព្ទថតរូបភាពបង្ហោះលើហ្វេសប៑ុកទៀតផង ឃើញដូចនៅរហ័សរហួននៅឡើយ ដែលឃើញដូច្នោះអ្នកបើកបររថយន្តហ៊ីណូក៏រត់គេចខ្លួនបាត់កាន់តែលឿនថែមទៀត ។
លោកអនុសេនីយ៍ឯក ប្រាក់ ប៊ុនឡៃ នាយប៉ុស្តិ៍នគរបាលរដ្ឋបាលត្រែងត្រយឹង បានឱ្យដឹងថា រថយន្តកាមរីឆ្លាម ពណ៌ទឹកមាស ពាក់ផ្លាកលេខ ភ្នំពេញ ២D-៨៦០៤ ធ្វើដំណើរពីលិចទៅកើត ទៅបុកជាមួយរថយន្តហ៊ីណូពណ៌បៃតងចាស់ ពាក់ផ្លាកលេខ ភ្នំពេញ៣A-៣០៤៨ ដែលធ្វើដំណើរបញ្ច្រាសទិសគ្នាបណ្តាលឱ្យរថយន្តកាមរីធ្លាក់ទៅម្ខាងផ្លូវតែម្តង ។
ដោយឡែកលោក សាន្ត ប៊ុនធឿន បានរៀបរាប់ថា មុនពេលកើតហេតុរូបលោកនិងក្រុមការងារត្រឡប់មកពីខេត្តព្រះសីហនុទៅភ្នំពេញវិញ លុះមកដល់ចំណុចខាងលើ លោកមើលទៅរថយន្តសណ្តោងកុងតឺន័ររេចង្កូតហាក់ដូចជាអ្នកបើកបរងងុយដេក ។ ពេលនោះ លោកបានប្រាប់អ្នកបើកបររថយន្តរបស់លោកថា សុំឱ្យមានការប្រុងប្រយ័ត្ន ប៉ុន្តែនិយាយមិនទាន់ចប់ផង រថយន្តកុងតឺន័របានរេចង្កូតមករករថយន្តលោក ។ ក្នុងស្ថានភាពបែបនេះ អ្នកបើកបររថយន្តរបស់លោកព្យាយាមគេចដែរ ប៉ុន្តែនៅតែមិនផុត ហើយរថយន្តកុងតឺន័របានមកបុករថយន្តលោកពេញទំហឹងតែម្តង ។
មន្ត្រីនគរបាលចរាចរណ៍និយាយថា ពេលសមត្ថកិច្ចចុះទៅដល់លោក សាន្ត ប៊ុនធឿន មិនបានផ្តល់ការសហការទេ គឺលោកគិតតែថតវីដេអូសុំឱ្យមិត្តភក្តិក្នុងបណ្តាញសង្គមហ្វេសប៊ុកជួយអន្តរាគមន៍ទៅវិញ ។ លុះក្រោយពីថតវីដេអូបង្ហោះហើយ លោក សាន្ត ប៊ុនធឿន ក៏ឡើងជិះរថយន្តតាក់ស៊ីទៅភ្នំពេញបាត់តែម្តង ។
ដោយឃើញដូច្នេះ សមត្ថកិច្ចបានត្រឹមធ្វើកំណត់ហេតុវាស់វែង និងអូសរថយន្តទាំង២គ្រឿងមកកាន់អធិការដ្ឋាននគរបាលស្រុក រង់ចាំស្រាវជ្រាវរកម្ចាស់រថយន្តហ៊ីណូឱ្យចូលខ្លួនមកដោះស្រាយជាមួយភាគីលោក សាន្ត ប៊ុនធឿន តាមនីតិវិធីច្បាប់ ៕
ចែករំលែកព័តមាននេះ