ពុទ្ធោ! ព្រោះតែរឿងខ្សែ.កមួយខ្សែ អតីតប្តីបើកម៉ូតូកង់បីទៅទិញទឹកអាស៊ីតជះលើប្រពន្ធ
- សៀមរាប
បុរសជាអ្នករត់ម៉ូតូកង់បីឥណ្ឌាម្នាក់ ត្រូវបានកម្លាំងសមត្ថកិច្ចនគរបាលក្រុងសៀមរាប ខេត្តសៀមរាប ធ្វើការឃាត់ខ្លួន
ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា បុរសជាអ្នករត់ម៉ូតូកង់បីឥណ្ឌាម្នាក់ ត្រូវបានកម្លាំងសមត្ថកិច្ចនគរបាលក្រុងសៀមរាប ខេត្តសៀមរាប ធ្វើការឃាត់ខ្លួនកាលពីថ្ងៃទី១៣ ខែកញ្ញា ឆ្នាំ២០២២ បន្ទាប់ពីបុរសរូបនោះប្រើទឹកអាស៊ីតជះដាក់អតីតប្រពន្ធ ព្រោះតែខឹងរឿងសុំខ្សែ.កផ្លាកទីនមិនឱ្យ។
សេចក្តីរាយការណ៍បន្តថា ជនសង្ស័យខាងលើមានឈ្មោះ ជុំ សារឿន ភេទប្រុស អាយុ៤៦ឆ្នាំ មុខរបររត់ម៉ូតូកង់បី ស្នាក់នៅបន្ទប់ជួល ស្ថិតក្នុងភូមិបន្ទាយចាស់ សង្កាត់ស្លក្រាម ក្រុង-ខេត្តសៀមរាប។
ទាក់ទិននឹងករណីខាងលើនេះ តាមសេចក្តីរាយការណ៍បានឲ្យដឹងថា នៅវេលាម៉ោង១១ព្រឹក ថ្ងៃទី១៣ ខែកញ្ញា ឆ្នាំ២០២២ ជនសង្ស័យបានជិះម៉ូតូកង់បី ពណ៌ស ស៊េរីឆ្នាំ២០១៨ ចេញពីបន្ទប់ជួលទៅរកទិញទឹកអាស៊ីត១ដប តម្លៃ៣០០០រៀល ពីតូបអាជីវករមួយកន្លែង នៅផ្សារលើធំថ្មី។
ប្រភពដដែលបន្តថា លុះពេលទិញទឹកអាស៊ីតរួចហើយ ជនសង្ស័យក៏បានដាក់តាមខ្លួន ក្នុងគោលបំណងទុកយកទៅជះលើជនរងគ្រោះឈ្មោះ អ៊ីម មុំ ភេទស្រី អាយុ៤៥ឆ្នាំ ដែលជាអតីតប្រពន្ធ មានទីលំនៅភូមិភ្នំក្រោម សង្កាត់សៀមរាប ក្រុង-ខេត្តសៀមរាប។
ប្រភពដដែលបន្តទៀតថា ហើយដើម្បីឲ្យកាន់តែមានភាពក្លាហាន និងចិត្តមោះមុតមុននឹងចេញទៅធ្វើសកម្មភាពនោះ ជនសង្ស័យក៏បានទិញស្រាបៀរចំនួន៦កំប៉ុងមកអង្គុយផឹកតែម្នាក់ឯង រហូតម៉ោងជាង៤រសៀលថ្ងៃដដែល ទើបជនសង្ស័យជិះម៉ូតូកង់បីសំដៅទៅផ្ទះជនរងគ្រោះតែម្តង។ ពេលជិះទៅដល់ចំណុចស្ថានីយប្រេងឥន្ទនៈមួយកន្លែង ក្បែររង្វង់មូលភ្នំក្រោមស្ថិតក្នុងភូមិភ្នំក្រោម សង្កាត់សៀមរាប ក្រុង-ខេត្តសៀមរាប ជនសង្ស័យក៏បានឃើញអតីតប្រពន្ធខ្លួនឈរម្នាក់ឯង ពេលនោះជនសង្ស័យបានទៅនិយាយសុំខ្សែ.ក១ខ្សែពីអតីតប្រពន្ធដែលជារបស់ខ្លួន ប៉ុន្តែជនរងគ្រោះមិនឲ្យ។
ប្រភពដដែលបន្តទៀតថា ដោយអំណាចនៃស្រាបៀរ៦កំប៉ុងចូលខ្លួន ធ្វើឲ្យជនសង្ស័យចិត្តដាច់ទាញដបទឹកអាស៊ីតពីលើម៉ូតូកង់បី រួចជះទៅលើជនរងគ្រោះ បណ្តាលឲ្យរលាកលើផ្ទៃមុខជនរងគ្រោះ និងខ្ចាយទៅលើខ្នងជនសង្ស័យខ្លួនឯងផងដែរ ព្រោះពេលជះនោះក្នុងស្ថានភាពស្រវឹង ហើយណាមួយទឹកអាស៊ីតដែលយកទៅប្រើនោះ ទំនងជាទឹកអាស៊ីតសម្រាប់ប្រើប្រាស់អាគុយ ជាប្រភេទខ្សោយ បានជាមិនអាចរលាកធ្ងន់ធរពេក ហើយបន្ទាប់ពីធ្វើសកម្មភាពរួច ជនសង្ស័យក៏បានបើកម៉ូតូកង់បីរត់គេចខ្លួនតែម្តងទៅ។
ក្រោយពេលកើតហេតុ ជនរងគ្រោះបានទៅប្តឹងសមត្ថកិច្ចឲ្យជួយចាត់ការលើករណីនេះ ដើម្បីនាំខ្លួនជនសង្ស័យឲ្យមកទទួលទោសតាមផ្លូវច្បាប់។ នៅពេលទទួលបានពាក្យបណ្តឹងរបស់ជនរងគ្រោះភ្លាម សមត្ថកិច្ចបានធ្វើការស្រាវជ្រាវ រហូតនាំជនសង្ស័យខាងលើ យកទៅសាកសួរ ។ ហើយជនសង្ស័យរូបនេះក៏បានឆ្លើយសារភាព ដូចការរៀបរាប់ខាងលើនេះ ពិតប្រាកដមែន ចំណែកមូលហេតុដោយសារជនសង្ស័យខឹងរឿងសុំខ្សែ.កផ្លាកទីន១ខ្សែពីជនរងគ្រោះ(អតីតប្រពន្ធ) មិនបាន។
បន្ទាប់ពីមានពាក្យបណ្តឹងរបស់ជនរងគ្រោះ និងចម្លើយសារភាពរបស់ជនសង្ស័យស៊ីសង្វាក់ពាក់ព័ន្ធបទល្មើសហិ.ង្សាដោយចេតនា មានស្ថានទម្ងន់ទោស (ជះទឹកអាស៊ីត) សមត្ថកិច្ចក៏បានកសាងសំណុំរឿង រួចបញ្ជូនជនសង្ស័យទៅកាន់សាលាដំបូងខេត្ត ចាត់ការតាមនីតិវិធី៕
ចែករំលែកព័តមាននេះ