លោក Tim Cook នាយកប្រតិបត្តិរបស់ Apple ចង់ឲ្យវិស័យបច្ចេកវិទ្យាចេញសកម្មភាពប្រឆាំងនឹងព័ត៌មានក្លែងក្លាយដែលកំពុងបំពុលលើអុីនធើរណេត ។
លោក Cook បាននិយាយក្នុងបទសម្ភាសន៍កាសែតមួយថា ៖ « រាល់ក្រុមហ៊ុនបច្ចេកវិទ្យាដូចជាយើង ត្រូវតែបង្កើតឧបករណ៍ខ្លះៗដែលអាចជួយកាត់បន្ថយចំនួនព័ត៌មានក្លែងក្លាយ » ។
នាយកប្រតិបត្តិរបស់ក្រុមហ៊ុនបច្ចេកវិទ្យាធំៗដូចជា លោក Mark Zuckerberg របស់ Facebook ក៏បានលើកឡើងពីបញ្ហានេះក្នុងរយៈពេលប៉ុន្មានខែថ្មីៗនេះផងដែរ ។
ពាក្យថា ព័ត៌មានក្លែងក្លាយ ជាដំបូងមានន័យថា រឿងលើអុីនធើរណេតដែលសរសេរឡើងដើម្បីបោកបញ្ឆោតអ្នកអាន ។ ភាគច្រើន រឿងទាំងនោះត្រូវបានចែករំលែកតាម Facebook និងគេហទំព័របណ្តាញសង្គមដទៃទៀត ដើម្បីរកប្រាក់ចំណូលដល់អ្នកសរសេរ ។ ពេលខ្លះទៀត វាជាការឃោសនាដោយមានគោលបំណងនយោបាយជាដើម ។
ព័ត៌មានប្រភេទនេះទទួលបានការចាប់អារម្មណ៍យ៉ាងខ្លាំងមុននិងក្រោយពេលបោះឆ្នោតក្នុងសហរដ្ឋអាមេរិក ។ វាពិតជាពិបាកណាស់សម្រាប់អ្នកលេងអុីនធើរណេតដើម្បីដឹងថា តើវាជាប្រភពព័ត៌មានដែលគួរឲ្យទុកចិត្តឬទេ ។
លោក Cook បន្តថា ៖ « ពួកយើងជាច្រើននាក់កំពុងតែធ្វើការក្នុងផ្នែកតវ៉ា និងមិនទាន់ដឹងថា តើគួរធ្វើបែបណាទេ » ។
លោកបានជំរុញឲ្យមានដំណោះស្រាយផ្នែកបច្ចេកវិទ្យា និងបញ្ញា ។ លោកបានប្រាប់ដល់កាសែតថា ៖ « ពួកយើងត្រូវការយុទ្ធនាការប្រកាសពីសេវាកម្មសាធារណៈដែលជឿនលឿន។ វាអាចនឹងធ្វើបានកាន់តែលឿន ប្រសិនបើមានការប្តេជ្ញា » ។
នាយកប្រតិបត្តិម្នាក់នេះក៏បាននិយាយថា ក្រុមហ៊ុនបច្ចេកវិទ្យាអាចជួយលុបព័ត៌មានក្លែងក្លាយ ប៉ុន្តែលោកបន្ថែមថា ៖ « ពួកយើងត្រូវតែធ្វើបែបនេះដោយមិនរំលោភសិទ្ធិក្នុងការបញ្ចេញមតិ និងសិទ្ធិសារព័ត៌មាន » ៕
Like our Page
