អន្តរជាតិ ៖ តម្លៃមាសបានធ្លាក់ចុះយ៉ាងខ្លាំងចាប់តាំងពីសប្តាហ៍មុន ដែលជាការធ្លាក់ចុះប្រចាំសប្តាហ៍ខ្លាំងបំផុតក្នុងរយៈពេល ៤០ ឆ្នាំកន្លងមកនេះ ខណៈដែលសង្គ្រាមនៅមជ្ឈិមបូព៌ាបានចូលដល់សប្តាហ៍ទី ៤ ហើយសហរដ្ឋអាមេរិក និងអ៊ីរ៉ង់បានគំរាមកំហែងការវាយប្រហារថ្មីបន្ថែមទៀត…
អន្តរជាតិ ៖ តម្លៃមាសបានធ្លាក់ចុះយ៉ាងខ្លាំងចាប់តាំងពីសប្តាហ៍មុន ដែលជាការធ្លាក់ចុះប្រចាំសប្តាហ៍ខ្លាំងបំផុតក្នុងរយៈពេល ៤០ ឆ្នាំកន្លងមកនេះ ខណៈដែលសង្គ្រាមនៅមជ្ឈិមបូព៌ាបានចូលដល់សប្តាហ៍ទី ៤ ហើយសហរដ្ឋអាមេរិក និងអ៊ីរ៉ង់បានគំរាមកំហែងការវាយប្រហារថ្មីបន្ថែមទៀត ដែលផ្តោតខ្លាំងលើទីតាំងថាមពល។ នេះបើយោងតាមប្រភពពី Bloomberg និង The Economic Times បានចេញផ្សាយ។
តម្លៃមាសអន្តរជាតិបានធ្លាក់ចុះយ៉ាងខ្លាំងពីប្រហែល ៥ ២០០ ដុល្លារក្នុង១អោន ឬ ៦ ២៦៥ ដុល្លារក្នុង១តម្លឹង កាលពីថ្ងៃទី ១៣ ខែមីនា ឆ្នាំ២០២៦ មកនៅត្រឹមតែ ៤ ៣៥៤ ដុល្លារ/អោន ឬ ៥ ២៤៥ ដុល្លារ/តម្លឹង គិតត្រឹមព្រឹកថ្ងៃទី ២៣ ខែមីនា ឆ្នាំ២០២៦ ដែលនេះឆ្លុះបញ្ចាំងពីការដាំក្បាលចុះយ៉ាងខ្លាំងក្នុងរយៈពេលខ្លី។ ដ្បិតតម្លៃបានហក់ឡើងដល់កម្រិតខ្ពស់បំផុតមិនធ្លាប់មានពីមុន ៥ ៥៩៥ ដុល្លារ/អោន ឬ ៦ ៧៤០ ដុល្លារ/តម្លឹង ។
ផលប៉ះពាល់បណ្តាលមកពីភាពតានតឹងភូមិសាស្ត្រនយោបាយ ជាធម្មតាតែងតែជាផលវិជ្ជមានសម្រាប់ទ្រព្យសកម្មដែលមានសុវត្ថិភាពដូចជា ដុំមាស ប៉ុន្តែផលវិជ្ជមាននេះ មិនមែនជាករណីអំឡុងពេលសង្គ្រាមអាមេរិក-អ៊ីរ៉ង់នោះទេ។ ជាក់ស្តែង សង្គ្រាមមជ្ឈិមបូព៌ាបានរំខានដល់លំហូរប្រេង ហើយផលប៉ះពាល់លើការផ្គត់ផ្គង់បានបណ្តាលឱ្យប្រេងឆៅប្រភេទ Brent កើនឡើងជាង ៥០% ចាប់តាំងពីដើមខែមីនាមក។
តម្លៃប្រេងកើនឡើងបានបង្កហានិភ័យអតិផរណាទូទាំងពិភពលោក ហើយទីផ្សារហិរញ្ញវត្ថុ ដែលកំពុងវាយតម្លៃលើការបន្ធូរបន្ថយគោលនយោបាយរូបិយវត្ថុបន្ថែមទៀតពីបណ្តាធនាគារកណ្តាលនោះ ឥឡូវនេះកំពុងតែចាប់ផ្តើមវាយតម្លៃលើការរឹតបន្តឹងជំនួសវិញ ។
បច្ចុប្បន្ន ពាណិជ្ជករកំពុងព្យាករណ៍ថា ធនាគារអង់គ្លេស និងធនាគារកណ្តាលអឺរ៉ុបទំនងដំឡើងអត្រាការប្រាក់យ៉ាងហោចណាស់៣ដងពេញមួយឆ្នាំ ២០២៦។ ចំណែកធនាគារកណ្តាលសហរដ្ឋអាមេរិក ដែលដើមឡើយត្រូវបានព្យាករណ៍ថា នឹងកាត់បន្ថយអត្រាការប្រាក់យ៉ាងណាស់ ៣ ដងសម្រាប់ឆ្នាំ ២០២៦ ឥឡូវនេះ ៣០% ទំនងជាដំឡើងអត្រាការប្រាក់នៅខែតុលាខាងមុខ៕
ចែករំលែកព័តមាននេះ