អន្តរជាតិ ៖ យោងតាមរបាយការណ៍របស់អង្គការសហប្រជាជាតិ (UN) កាលពីពេលថ្មីៗនេះ បានបង្ហាញអំពីផលវិបាកនៃសង្គ្រាមមជ្ឈិមបូព៌ាកំពុងរីករាលដាលហួសពីតំបន់ឈូងសមុទ្រ ដោយបានរំខានដល់ការផ្គត់ផ្គង់ប្រេងឥន្ធនៈ និងខ្សែសង្វាក់ផ្គត់ផ្គង់ជាច្រើនផ្សេងទៀតនៅទូទាំងតំបន់អាស៊ីប៉ាស៊ីហ្វិក។ របាយការណ៍ UN…
អន្តរជាតិ ៖ យោងតាមរបាយការណ៍របស់អង្គការសហប្រជាជាតិ (UN) កាលពីពេលថ្មីៗនេះ បានបង្ហាញអំពីផលវិបាកនៃសង្គ្រាមមជ្ឈិមបូព៌ាកំពុងរីករាលដាលហួសពីតំបន់ឈូងសមុទ្រ ដោយបានរំខានដល់ការផ្គត់ផ្គង់ប្រេងឥន្ធនៈ និងខ្សែសង្វាក់ផ្គត់ផ្គង់ជាច្រើនផ្សេងទៀតនៅទូទាំងតំបន់អាស៊ីប៉ាស៊ីហ្វិក។
របាយការណ៍ UN កាលពីថ្ងៃទី១៩ ខែមីនា ឆ្នាំ២០២៦ បានកត់សម្គាល់ថា ភាពតានតឹងកាន់តែខ្លាំងឡើងនៅតំបន់មជ្ឈិមបូព៌ា បានរំខានដល់ច្រកសមុទ្រហ័រមូស (Hormuz) និងកំពុងបង្កើតផលវិបាកសេដ្ឋកិច្ចយ៉ាងទូលំទូលាយ មិនត្រឹមនៅតំបន់ឈូងសមុទ្រប៉ុណ្ណោះទេ ប៉ុន្តែថែមទាំងនៅទូទាំងតំបន់អាស៊ីប៉ាស៊ីហ្វិកផងដែរ។ ផលប៉ះពាល់ភ្លាមៗអាចមើលឃើញយ៉ាងច្បាស់នៅក្នុងការកើនឡើងយ៉ាងខ្លាំងនៃតម្លៃដឹកជញ្ជូន តម្លៃថាមពល និងជី រួមជាមួយនឹងសម្ពាធរូបិយប័ណ្ណ និងការប្រែប្រួលទីផ្សារហិរញ្ញវត្ថុ។
អាស៊ីខាងត្បូងត្រូវបានមើលឃើញថា រងផលវិបាកយ៉ាងធ្ងន់ធ្ងរ ពិសេសនៅប្រទេសប៉ាគីស្ថាន ស្រីលង្កា និងនេប៉ាល់។ ចំណែកប្រទេសសេដ្ឋកិច្ចធំៗ ដូចជា ចិន និងជប៉ុន កំពុងបង្កើនកិច្ចខិតខំប្រឹងដើម្បីដោះស្រាយផលប៉ះពាល់លើការផ្គត់ផ្គង់ ក៏ដូចជាការកើនឡើងតម្លៃ។ ស្របពេលបណ្តាប្រទេសនៅអាស៊ីអាគ្នេយ៍ ក៏មិនស្ថិតនៅឆ្ងាយពីផលប៉ះពាល់នេះផងដែរ។
ដោយព្រមានអំពីវិបត្តិជីវភាព តាមរយៈការពន្យល់ពីភាពប្រែប្រួលយ៉ាងទូលំទូលាយនេះ លោក Hamza Ali Malik នាយកផ្នែកគោលនយោបាយម៉ាក្រូសេដ្ឋកិច្ចនៃគណៈកម្មការសេដ្ឋកិច្ច និងសង្គមសម្រាប់អាស៊ី និងប៉ាស៊ីហ្វិក (ESCAP) លើកឡើងថា ផលប៉ះពាល់ដោយផ្ទាល់បំផុត កើតចេញពីបញ្ហា២ផ្ទួនគ្នា គឺ ការកើនឡើងថ្លៃដឹកជញ្ជូន និងការកើនឡើងយ៉ាងខ្លាំងនៃតម្លៃថាមពល និងជី។
ដោយសារតម្លៃប្រេងឆៅប្រភេទ Brent នៅតែលើសពី ១០០ ដុល្លារក្នុង១បារ៉ែល ដូច្នេះការកើនឡើងនៃថ្លៃធានារ៉ាប់រង និងថ្លៃដឹកជញ្ជូនបានដាក់សម្ពាធយ៉ាងខ្លាំងទៅលើប្រព័ន្ធដឹកជញ្ជូនសកល។
លើសពីនេះ លោកស្រី Rupa Chanda នាយកនាយកដ្ឋានពាណិជ្ជកម្មនៅ ESCAP បានបញ្ជាក់ថា មានសញ្ញានៃការរំខានធ្ងន់ធ្ងរលើផ្លូវដឹកជញ្ជូន ដែលប៉ះពាល់ដោយផ្ទាល់ដល់ឧស្សាហកម្មសំខាន់ៗ ចាប់ពីការផលិតគ្រឿងអេឡិចត្រូនិចរហូតដល់គីមីឥន្ធនៈ។ ការរំខាននេះបាននាំឱ្យមានផលវិបាកម៉ាក្រូសេដ្ឋកិច្ចជាច្រើន។
ការប៉ាន់ប្រមាណរបស់ UN បង្ហាញថា តម្លៃប្រេងបានកើនឡើងប្រហែល ៤៥% ឧស្ម័នកើនឡើង ៥៥% និងជីកើនឡើង ៣៥% ចាប់តាំងពីចុងខែកុម្ភៈ ឆ្នាំ២០២៦ ដែលជំរុញឱ្យអតិផរណាក្នុងតំបន់កើនឡើងដល់ ៤,៦% នៅឆ្នាំនេះ។ ជាពិសេស កង្វះខាតជីកំពុងគំរាមកំហែងដោយផ្ទាល់ដល់សន្តិសុខស្បៀងអាហាររបស់ប្រជាជនជិត ២ ពាន់លាននាក់នៅអាស៊ីខាងត្បូង។ ជាទូទៅ ESCAP ព្យាករណ៍ថា កំណើនសេដ្ឋកិច្ចក្នុងប្រទេសកំពុងអភិវឌ្ឍន៍នៅក្នុងតំបន់អាចនឹងថយចុះមកត្រឹម ៤% នៅឆ្នាំក្រោយ។
ក្រៅពីផលប៉ះពាល់សេដ្ឋកិច្ច ការព្រួយបារម្ភពិតប្រាកដស្ថិតនៅក្នុងបញ្ហាជីវភាពរស់នៅ របស់ប្រជាជន។ អ្នកតំណាងពីអង្គការពលកម្មអន្តរជាតិ (ILO) លោក Numan Özcan បានលើកឡើងថា នៅពេលដែលវិបត្តិនៅតែបន្ត ហានិភ័យចម្បងគឺថាការប៉ះទង្គិចសេដ្ឋកិច្ចខាងក្រៅក្លាយជាវិបត្តិនៅក្នុងគ្រួសារ៕
ចែករំលែកព័តមាននេះ