រាជធានីភ្នំពេញ ៖ នៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ទី១៨ កុម្ភៈ ខានស្អែកនេះ កម្មវិធីប្រកួតប្រដាល់ជាលក្ខណៈមិត្ដភាពអន្ដរជាតិប្រជុំដោយកីឡាករជើងខ្លាំង៤គូ ក្នុងនោះគូអន្ដរជាតិមានចំនួន៣គូ ។ អ្នកនិយមទស្សនាកីឡាប្រដាល់ភាគច្រើនកំពុងទន្ទឹងរង់ចាំមើលថា តើកីឡាករកម្ពុជាទាំង៣រូបនេះ មានប៉ុន្មាននាក់ដែលអាចទៅរួចជាមួយកីឡាករថៃ ដែលសុទ្ធតែជាជើងខ្លាំងបែបហ្នឹងនោះ ។
គូអន្ដរជាតិទី១ កីឡាករឆៃ សារ៉ា មកពីសមាគមកីឡាប្រដាល់ក្រសួងការពារជាតិ ជួបប្រកួតជាមួយកីឡាករថៃឈ្មោះឃុនដាន់ ប៉ស៊ីនដាំ ក្នុងប្រភេទទម្ងន់៦៣,៥គីឡូក្រាម ។
កីឡាករថៃរូបនេះមិនធ្លាប់មកប្រកួតនៅលើសង្វៀនទូរទស្សន៍ស៊ីអិនស៊ីពីមុនមកទេប៉ុន្តែបើប្រៀបធៀបទៅលើប្រវត្តិប្រកួតរបស់គេពិតជាមិនធម្មតាឡើយ ។ ឆៃ សារ៉ា មានកម្ពស់១,៧០ម៉ែត្រ ធ្លាប់ប្រកួតបាន៣៧ដង ឈ្នះ៣០ដង ចាញ់៥ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន១៨ដង ក្នុងពេលកីឡាករថៃមានកម្ពស់១,៦៧ម៉ែត្រ ធ្លាប់ប្រកួត៨៥ដង ឈ្នះ៦៥ដង ចាញ់១៨ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៨ដង ។ ដូច្នេះសម្រាប់ការជួបគ្នារវាងកីឡាករទាំង២លើកនេះ ឆៃ សារ៉ាទំនងជាយ៉ាប់បន្តិចហើយ ។
គូអន្ដរជាតិទី២ កីឡាករ សារឿន ច័ន្ទ មកពីក្លិបតាព្រហ្មមានជ័យ ជួបប្រកួតជាមួយកីឡាករថៃឈ្មោះភីតផ្សាក់ ភីតស៊ូរ៉ាត់ ក្នុងប្រភេទទម្ងន់៦០គីឡូក្រាម ។ គូនេះទាំងមាឌនិងកម្ពស់បូករួមទាំងប្រវត្តិប្រកួតទៀតផងនោះ គឺប្រហាក់ប្រហែលគ្នាតែម្ដង ។ សារឿនច័ន្ទ មានកម្ពស់១,៦៨ម៉ែត្រ ធ្លាប់ប្រកួត៩៤ដង ឈ្នះ៧០ដង ចាញ់២០ដង ស្មើ៤ដង និងធ្លាប់ផ្ដួលគូប្រកួតឱ្យសន្លប់បាន១៨ដង ។ ចំណែកកីឡាករថៃវិញមានកម្ពស់១,៦៩ម៉ែត្រ ធ្លាប់ប្រកួតបាន៩៥ដង ឈ្នះ៧០ដង ចាញ់២០ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់បាន១០ដង ។ កីឡាករថៃរូបនេះមិនធ្លាប់មកប្រកួតនៅលើសង្វៀនស៊ីអិនស៊ីពីមុនមកទេទើបគេពិបាកសន្និដ្ឋាន ប៉ុន្តែបើយោងលើប្រវត្តិប្រកួតគឺអាចស៊ីសងគ្នាបាន ដូច្នេះចាញ់-ឈ្នះអាចពឹងលើសំណាងក៏ថាបាន ។
គូអន្ដរជាតិទី៣ កីឡាករ ឡុង សុភី មកពីក្លិបសាលវ័ន្តកីឡា ប្រកួតជាមួយកីឡាករថៃឈ្មោះគឹកកង រ៉យ៉ាក់សុធន់ ក្នុងប្រភេទទម្ងន់៥៧គីឡូក្រាម ។ ឡុង សុភី ជាអ្នកប្រដាល់ជើងចាស់មួយរូបដែលមានបទពិសោធន៍ប្រកួតពេញខ្លួន ប៉ុន្តែពេលនេះវ័យរបស់គេរាងជ្រេបន្តិចទៅហើយ កម្លាំងក៏អន់ថយជាងមុនបន្តិចដែរ ។ អ្នកប្រដាល់ជើងចាស់រូបនេះមានកម្ពស់១,៧៥ម៉ែត្រ ធ្លាប់ប្រកួតបាន១២១ដង ឈ្នះ៩២ដង ចាញ់២៦ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន៤៤ដង ។ ចំណែកកីឡាករថៃវិញមានកំពស់១,៨០ម៉ែត្រ ធ្លាប់ប្រកួតបាន៨០ដង ឈ្នះ៦០ដង ចាញ់១៧ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន១០ដង ។ ទោះបីឡុង សុភី មានប្រវត្តិប្រកួតច្រើនជាងបន្តិចមែន តែមិនទាន់ប្រាកដថា អាចផ្ដួលកីឡាករថៃម្នាក់នេះបាននោះទេដូច្នេះមានតែរង់ចាំមើលការប្រកួតជាក់ស្ដែងប៉ុណ្ណោះ ។
ចំណែកគូប្រកួតមិត្តភាពធម្មតាវិញកីឡាករ យ៉ុន ដារ័ត្ន មកពីក្លិបតាឡីដំរីមានរិទ្ធ ប្រកួតជាមួយកីឡាករ ចាន់ រតនៈ មកពីក្លិបទីបញ្ជាការកងទ័ពជើងទឹក ៕
ចែករំលែកព័តមាននេះ