សារព័ត៌មានបរទេសផ្សាយថា បុរសអាជីវករម្នាក់នៅភាគខាងត្បូងប្រទេសបារាំង កំពុងរិះរកវិធីទាមទារការខាតបង់ចំនួន៤៥លានអឺរ៉ូពីក្រុមហ៊ុនតាក់ស៊ី «UBER» ព្រោះធ្វើឱ្យប្រពន្ធរបស់គេដឹងថា គេលួចទាក់ទងស្រីផ្សេង ។
បុរសនោះរស់នៅតំនប់ឆ្នេរ«Riviera» ភាគខាងត្បូងប្រទេសបារាំង ឱ្យដឹងថា បញ្ហាបានកើតឡើងខណៈពេលគេបើកចូលក្នុងប្រព័ន្ធទូរស័ព្ទតាមApplication ដើម្បីហៅតាក់ស៊ីដោយប្រើស្មាតហ្វូនរបស់ប្រពន្ធ ។ កាសែតក្នុងស្រុកផ្សាយឱ្យដឹងថា ទោះបីជាត្រូវចុចលុបចោលក៏ដោយ ប៉ុន្ដែApplication បែរជាបង្ហាញជាថ្មីធ្វើឱ្យប្រពន្ធរបស់គេដឹងពីការធ្វើដំណើររបស់គេ ហើយឈានទៅរកការសង្ស័យលើប្ដីលួចទាក់ទងស្រីផ្សេង ។ នៅពេលតាមដានដឹងច្បាស់ស្ដ្រីជាប្រពន្ធក៏ប្ដឹងលែងលះ ។
មេធាវីរបស់បុរសនោះថ្លែងថា «កូនក្ដីរបស់ខ្ញុំក្លាយជាជនរងគ្រោះពីកំហុសឆ្គងរបស់Application ដោយមានតួនាទីតភ្ជាប់ ហើយកំហុសឆ្គងនេះធ្វើឱ្យកើតមានបញ្ហាដល់ជីវិតផ្ទាល់របស់កូនក្ដី» ។ មេធាវីនោះបានបដិសេធនិយាយពីរឿងរ៉ាវទាក់ទិននឹងតួលេខថ្លៃខូចខាតចំនួន៤៥លានអឺរ៉ូ គ្រាន់តែបញ្ជាក់ថា កូនក្ដីរបស់ខ្លួនប្រុងប្រយ័ត្នខ្ពស់និងមិនចង់បង្ហាញខ្លួន និងខណៈពេលប្រព័ន្ធផ្សព្វផ្សាយរបស់បារាំងផ្សាយថា កំហុសឆ្គងនេះស្ថិតក្នុងម៉ាសុីនកុំព្យូទ័រ ឬ«Software» របស់UBER មិនមែនកើតឡើងតែមួយលើកទេ ព្រោះនៅមានអ្នកប្រើប្រាស់មើលរបាយការណ៍ធ្លាប់ជាប់ជាច្រើនមកហើយ ។
UBER បញ្ជាក់ប្រាប់AFP ថា គ្មានការបង្ហាញការយល់ឃើញណាមួយទាក់ទិនលើរឿងក្ដីនោះទេ ប៉ុន្ដែបញ្ជាក់ថា ការពារទិន្នន័យរបស់អតិថិជន គឺជារឿងមួយដែលក្រុមហ៊ុនផ្ដល់សារសំខាន់ ៕
ចែករំលែកព័តមាននេះ