ល្បែងយូគី ជ្រកក្រោមផ្លាកឆ្នោតឡូតូ បើកលេងដុះស្លែ នៅឃុំកំពង់ចម្លង ស្រុកស្វាយជ្រំ
- ស្វាយរៀង
ខេត្តស្វាយរៀង៖ មេល្បែងយូគីដុះស្លែម្នាក់ ឈ្មោះ វ៉ក បានមកបើកល្បែងយូគី នៅផ្ទះរបស់ឈ្មោះ ម៉ាប់ ប្រពន្ធឈ្មោះ រ៉ន នៅភូមិចម្លង…
ខេត្តស្វាយរៀង៖ មេល្បែងយូគីដុះស្លែម្នាក់ ឈ្មោះ វ៉ក បានមកបើកល្បែងយូគី នៅផ្ទះរបស់ឈ្មោះ ម៉ាប់ ប្រពន្ធឈ្មោះ រ៉ន នៅភូមិចម្លង ឃុំកំពង់ចម្លង ស្រុកស្វាយជ្រំ ដោយបន្លំជាឆ្នោតឡូតូ។ សកម្មភាពនេះ ធ្វើឲ្យមហាជនរិះគន់ថា សមត្ថកិច្ច មិនបង្ក្រាបល្បែងស៊ីសង ដែលធ្វើឱ្យប៉ះពាល់ដល់គោលនយោបាយភូមិ-ឃុំមានសុវត្ថិភាព ដែលអាចបង្កឲ្យមានអំពើហិង្សាក្នុងគ្រួសារ ចោរលួច ចោរប្លន់ ជាដើម។
បុរសម្នាក់ សុំមិនបញ្ចេញឈ្មោះ រស់នៅក្នុងភូមិ ឃុំ ខាងលើ បានប្រាប់អ្នកយកព័ត៌មានថា មេយូគីម្នាក់ ឈ្មោះ វ៉ក ភេទប្រុស អាយុប្រមាណ៦០ឆ្នាំ មានទីលំនៅក្នុងភូមិវាលល្ងើន ឃុំកំពង់ចម្លង បានមកបើកលេងល្បែងយូគីនៅផ្ទះឈ្មោះ ម៉ាប់ ប្រពន្ធឈ្មោះ រ៉ន ដែលមានមុខរបរលក់គ្រឿងទេស នៅភូមិចម្លងជាច្រើនខែមកហើយ និងមិនដែលឃើញអាជ្ញាធរភូមិ ឃុំ ឬសមត្ថកិច្ចនគរបាលបង្ក្រាបឡើយ។ កន្លងមក ប្រជាពលរដ្ឋធ្លាប់ប្តឹងសមត្ថកិច្ចឲ្យទៅបង្ក្រាបដែរ ប៉ុន្តែមិនដឹងជាយ៉ាងម៉េចស្ងាត់ឈឹង។
បុរសរូបនេះបន្តថា ប្រពន្ធគាត់ក៏ដូចអ្នកជិតខាងដែរ បានងប់នឹងល្បែងយូគី ល្បែងឆ្នោតឡូតូ កន្ទុយលេខ ម្នាក់ៗចាញ់អស់ប្រាក់ច្រើនណាស់។ បើប្រុសៗចាញ់ល្បែង ទៅរករឿងប្រពន្ធកូន កើតជម្លោះប្រើអំពើហិង្សាក្នុងគ្រួសារ។
ប្រភពដដែល និយាយទៀតថា កន្លែងបើកលេងល្បែងយូគីនេះ គឺខាងមុខផ្ទះ គេលក់គ្រឿងទេស លក់ស្រាបៀរ តែលួចបាំងតង់កៅស៊ូនៅខាងក្រោយផ្ទះ លេងយូគី និងបើកល្បែងឆ្នោតឡូតូ ៥នាទីចេញម្តង និងបង្កប់កត់កន្ទុយលេខខ្មែរ និងកន្ទុយលេខវៀតណាមទៀត។ ហេតុនេះហើយ ទើបអ្នកដែលមានប្តី មានប្រពន្ធ មានកូន ទៅចាក់ល្បែងយូគី ចាក់កន្ទុយលេខ និងចាក់ឆ្នោត ពិបាកចិត្ត ព្រោះប៉ះពាល់ជីវភាពក្នុងគ្រួសារ និងអំពាវនាវសុំឲ្យអាជ្ញាធរស្រុកខេត្តជួយអន្តរាគមន៍បង្ក្រាបល្បែងខាលើផង ដើម្បីសុវត្ថិភាពភូមិ ឃុំ ។
ទាក់ទិននឹងករណីនេះ មិនអាចរកការបំភ្លឺពីលោកនាយប៉ុស្តិ៍នគរបាលរដ្ឋបាលឃុំកំពង់ចម្លងបានទេ៕
ចែករំលែកព័តមាននេះ