ប្រជាពលរដ្ឋដែលរងគ្រោះបានបកអាក្រាតឈ្មួញដីដុះស្លែ ឈ្មោះ លឹម ងួន
- ព្រះសីហនុ
ខេត្តព្រះសីហនុ ៖ ប្រជាពលរដ្ឋរងគ្រោះដីធ្លី ស្ថិតនៅភូមិឫទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ បានឲ្យដឹងថា លោក លឹម…
ខេត្តព្រះសីហនុ ៖ ប្រជាពលរដ្ឋរងគ្រោះដីធ្លី ស្ថិតនៅភូមិឫទ្ធី២ ឃុំកែវផុស ស្រុកស្ទឹងហាវ ខេត្ត
ព្រះសីហនុ បានឲ្យដឹងថា លោក លឹម ងួន បានឱ្យពួកគាត់ផ្ដិតមេដៃលើក្រដាសសសុទ្ធ ហើយប្រើល្បិចបោកប្រាស់ថា នឹងធ្វើលិខិតកាន់កាប់ដីធ្លីជូនដោយបញ្ជាក់ពីភូមិ-ឃុំឱ្យពួកគាត់តែផ្ទុយទៅវិញ វាមិនមែនជាលិខិតកាន់កាប់នោះទេ គឺក្លែងជាឯកសារលក់ទិញពុំមានទទួលបានលុយសូម្បីតែមួយកាក់មួយសេន ។
បន្ទាប់ពីប្រជាពលរដ្ឋដែលចាញ់ល្បិចកលលោកលឹម ងួន បាននាំគ្នាប្តឹងតវ៉ាទៅអាជ្ញាធរស្រុកស្ទឹងហាវ ដើម្បីជួយអន្តរាគមន៍រកយុត្តិធម៌ ស្រាប់តែលោក លឹម ងួន ប្ដឹងបងប្អូនប្រជាពលរដ្ឋទៅសាលាដំបូងខេត្តព្រះសីហនុចោទពីបទប្រើអំពើហិង្សាលើអ្នកកាន់កាប់អចលនវត្ថុដោយសុចរិតនាពេលថ្មីៗនេះទៅវិញ ។ នៅពេលថ្មីៗនេះ ពលរដ្ឋស្នើសុំឱ្យលោក លឹម ងួន ចេញមុខមកតតាំងគ្នាចំពោះមុខអាជ្ញាធរស្រុកស្ទឹងហាវ ដើម្បីស្នើសុំអាជ្ញាធរមានសមត្ថកិច្ចជួយរកយុត្ដិធម៌ និងចាត់វិធានការតាមផ្លូវច្បាប់ចំពោះបុគ្គល លឹម ងួន។
ប្រភពពីប្រជាពលរដ្ឋដែលចាញ់បោកលោកលឹម ងួន បានឲ្យដឹងថា រហូតមកដល់ថ្ងៃទី១៣ ខែសីហា ឆ្នាំ២០២២ គេពុំឃើញស្រមោលលោក លឹម ងួន ហ៊ានចេញមុខមកបកស្រាយជាមួយប្រជាពលរដ្ឋដើម្បីបង្ហាញការពិតនៅចំពោះមុខអាជ្ញាធរនោះឡើយ។ ប្រជាពលរដ្ឋបានបញ្ជាក់ឲ្យដឹងទៀតថា ដីប្រមាណជាង១០០ហិកតា ស្ថិតនៅភូមិឫទ្ធី២ ឃុំកែវផុស ស្រុកស្ទឹងហាវ ខែត្តព្រះសីហនុ ប្រជាពលរដ្ឋប្រមាណជាង២០គ្រួសារបានចូលទៅកាន់កាប់រស់នៅអាស្រ័យផលនៅក្នុងអំឡុង ឆ្នាំ២០០៥ ក្នុងមួយគ្រួសារមានដីពីរហិកតា បីហិកតា ឬបួនហិកតា។
ដោយមើលឃើញទីតាំងនោះមានសក្ដានុពលលោក លឹម ងួន បានទៅទាក់ទងលួងលោមបោកបញ្ឆោតប្រជាពលរដ្ឋខាងលើថា ខ្លួននឹងធ្វើលិខិតកាន់កាប់ដីធ្លីបញ្ជាក់ពីភូមិ ឃុំជូនដោយតម្រូវឱ្យប្រជាពលរដ្ឋទាំងនោះយកអត្តសញ្ញាណប័ណ្ណ និងផ្ដិតមេដៃស្ដាំលើក្រដាសសសុទ្ធ។ ផ្ទុយទៅវិញលោក លឹម ងួន ពុំបានធ្វើលិខិតកាន់កាប់ដីធ្លីតាមការសន្យានោះទេ មិនតែប៉ុណ្ណោះ លោកលឹម ងួន បានក្លែងធ្វើជាលិខិតលក់ទិញដោយដាក់ឈ្មោះលោក លឹម ងួន ជាអ្នកទិញទាំងអស់ ប៉ុន្តែពលរដ្ឋទាំងអស់នោះមិនបានទទួលលុយពីលោកលឹម ងួនសូម្បីមួយកាក់ ឬមួយសេនក៏មិនមានដែរ ។ ប្រភពខាងលើ បានបន្តឲ្យដឹងទៀតថា បែបបទនៃការធ្វើលិខិតលក់ទិញក្លែងក្លាយទាំងអស់នោះ គឺមានទម្រង់តែមួយអក្សរអ្នកសរសេរតែមួយ ហើយនៅកន្លែងតែមួយ គឺធ្វើនៅផ្ទះពេទ្យស្រស់ស្ថិតក្នុងឃុំទំនប់រលក ស្រុកស្ទឹងហាវ ខេត្តព្រះសីហនុ ។
នៅក្នុងលិខិតលក់ទិញ (លិខិតផ្ទេរសិទ្ធិកាន់កាប់ដីធ្លី) មានភាពមិនប្រក្រតីជាច្រើនដូចជា អ្នកលក់ខ្លះជាអ្នកចំណាកស្រុកមកពី ខេត្តព្រៃវែង ,តាកែវ កំពត ជាដើម។ ទាំងនេះជាការរៀបរាប់ប្រាប់អ្នកសារព័ត៌មានយើងពីសំណាក់ប្រជាពលរដ្ឋរងគ្រោះដីធ្លីដោយសារតែលោកលឹម ងួន។ លោកផេង ម៉ីន មេឃុំកែវផុស ស្រុកស្ទឹងហាវ ខេត្តព្រះសីហនុបានឲ្យដឹងតាមប្រព័ន្ធតេឡេក្រាមរបស់លោកលើឯកសារបញ្ជាក់នៅលើប្លង់បង្ហាញទីតាំងដីលេខ០៤០/២២ ឃកផ ចុះថ្ងៃទី១១ ខែឧសភា ឆ្នាំ២០២២ ។
នៅក្នុងលិខិតបានសរសេរថា រដ្ឋបាល ឃុំកែវផុស សូមជម្រាបជូនលោក លឹម ងួន ឱ្យបានជ្រាបថា គំនូសបង្ហាញទីតាំងដីមានទំហំប្រមាណជាង ៤២៧.៣៣២ (សែសិបពីរម៉ឺនប្រាំពីរពាន់បីរយសាមសិបពីរ)ម៉ែត្រការ៉េ ស្ថិតនៅភូមិឫទ្ធី០២ ឃុំកែវផុស ស្រុកស្ទឹងហាវ ខេត្តព្រះសីហនុ ដែលបានចុះហត្ថលេខានៅថ្ងៃទី១០ ខែមីនា ឆ្នាំ២០២១កន្លងមក ដោយលោក ផេង ម៉ីន មេឃុំកែវផុស ។ លោក លឹម ងូន បានសន្យាចំពោះមុខលោកមេឃុំថា គ្រាន់តែទុកសម្រាប់មើលទេ។
លោក ផេង ម៉ីន ក៏បានបញ្ជាក់យ៉ាងច្បាស់ទៅលើលោក លឹម ងួន ទៀតថា ការចុះហត្ថលេខានេះមិនអាចយកទៅប្រើប្រាស់អ្វីក្រៅពីនេះបានទេ ហើយលោក លឹម ងួន ក៏បានយល់ច្បាស់ និងស្របតាមការបញ្ជាក់របស់លោកមេឃុំផងដែរ ។ ប៉ុន្តែមួយរយៈក្រោយមកស្រាប់តែឃើញលោក លឹម ងួន យកគំនូសបង្ហាញទីតាំងនោះទៅប្ដឹងផ្ដល់អ្នកដទៃផ្ទុយពីការបញ្ជាក់របស់លោកមេឃុំទៅវិញ។ លោកមេឃុំក៍បានណែនាំលោក លឹម ងួន ជាច្រើនលើកច្រើនសារដែរ ប៉ុន្តែលោកលឹម ងួន មិនស្ដាប់តាមការណែនាំនោះឡើយ ហើយលោកមេឃុំក៏បានកសាងឯកសារមោឃភាពលើគំនូសបង្ហាញទីតាំងដីដែលមានទំហ៊ុខាងលើនោះហើយរួចរាល់ផងដែរ ។
ប្រជាពលរដ្ឋជាអ្នករងគ្រោះដោយសារចាញ់ល្បិចកលលោកលឹម ងួន បានបន្តឲ្យដឹងទៀតថា បើយោងតាមសេចក្ដីបំភ្លឺរបស់រដ្ឋបាល ឃុំកែវផុស និងឯកសារមួយចំនួនមានចំណុចគួរឱ្យសង្ស័យជាច្រើន។ តើនរណាជាអ្នកក្លែងឯកសារទាំងនោះ ? ពាក់ព័ន្ធនឹងបញ្ហាចម្រោងចម្រាស់ខាងលើ អ្នកយកព័ត៌មានយើងទទួលបានកំណត់ហេតុប្រជុំមួយចុះថ្ងៃទី៩ខែមីនា ឆ្នាំ២០២២ របស់សាលា ស្រុកស្ទឹងហាវ ខេត្តព្រះសីហនុ បានបញ្ជាក់ថា លោក លឹម ងួន ពុំមានដីនៅតំបន់ខាងលើនោះទៀតទេ។ ព្រោះលោកបានលក់ទៅឱ្យលោក នងឌី ណារ៉ា អតីតមេ ឃុំកែវផុស អស់ហើយ។
តើលោក លឹម ងួន បានដីពីណាទៅលក់ឱ្យមនុស្សជាច្រើននាក់រាប់មិនអស់ ? ហើយថែមទាំងប្ដឹងប្រជាពលរដ្ឋរងគ្រោះដីធ្លីថា បានចូលទៅកាន់កាប់បំពានលើដីរបស់ខ្លួនទៅវិញ ? លោក លឹម ងួន អាយុ៥៨ឆ្នាំ រស់នៅភូមិ៤ ឃុំទំនប់រលក ស្រុកស្ទឹងហាវ ខែត្រព្រះសីហនុ មុខរបរជាអ្នកជួញដូររឿងដីធ្លីនៅខេត្តព្រះសីហនុ ទាក់ទងទៅនឹងការចោទប្រកាន់របស់អ្នកភូមិ (ប្រជាពលរដ្ឋ) ពាក់ព័ន្ធករណីខាងលើនេះ អ្នកសារព័ត៌មាន បានព្យាយាមទាក់ទង តាមទូរស័ព្ទ និងតាមប្រព័ន្ធ តេឡេក្រាម ដើម្បីសុំការបំភ្លឺអំពើរឿងខាងលើតែមិនអាចទាក់ទងបានឡើយ។
ពលរដ្ឋរងគ្រោះដីធ្លីចំនួន០៤នាក់ ក្នុងចំណោមប្រជាពលរដ្ឋជាង២០គ្រួសាររស់នៅភូមិឃុំខាងលើ បានឱ្យភ្នាក់ងារសារព័ត៌មានយើងដឹងកាលពីព្រឹកថ្ងៃទី១២ ខែសីហា ឆ្នាំ២០២២ កន្លងមកថា លោក លឹម ងួន មានល្បិចច្រើនណាស់ និងកុំថាឡើយណាត់ជួបទល់មុខគ្នានៅសាលា ស្រុកស្ទឹងហាវ ដើម្បីបកស្រាយការពិតនៅចំពោះមុខអាជ្ញាធរមានសមត្ថកិច្ចសូម្បីតែទូរស័ព្ទក៍លោក លឹម ងួន លែងលើកទទួលដែរហើយ «កុំថាឡើយជួបប្រជាពលរដ្ឋសូម្បីតែ តុលាការ កោះហៅឲ្យលោក
លឹម ងួន ចូលខ្លួនមកបំភ្លឺក្នុងករណីវិវាទដីធ្លីខាងលើនេះ ក៏លោកលឹម ងួន មិនទៅជួបផងដែរ»។ ប្រជាពលរដ្ឋរងគ្រោះដីធ្លីនៅតែទទូចស្នើសុំឱ្យអាជ្ញាធរមានសមត្ថកិច្ចសូមមេត្តារកមធ្យោបាយឱ្យពួកគាត់បានជួបលោកលឹម ងួន នៅសាលា ស្រុកស្ទឹងហាវ ដើម្បីតតាំងគ្នាដោះស្រាយតាមសន្តិ
វិធី។
គួរបញ្ជាក់ឲ្យដឹងផងដែរថា លឹម ងួន អាយុ៥៨ឆ្នាំ មុខរបរជាជួញដូររឿងដីធ្លី នៅខេត្តព្រះសីហនុ មានទីលំនៅសព្វថ្ងៃ ភូមិ០៤ ឃុំទំនប់រលក ស្រុកស្ទឹងហាវ ខេត្តព្រះសីហនុ ។ ដោយឡែកលោកលឹម ងួន អ្នកយកព័ត៌មានយើងមិនអាចស្វែងរកការបកស្រាយជុំវិញការលើកឡើងរបស់ប្រជាពលរដ្ឋខាងលើបានទេ។
ចែករំលែកព័តមាននេះ