ប្រទេសអីុរ៉ង់ ៖ អនុរដ្ឋមន្ត្រីប្រេងរបស់អីុរ៉ង់បានថ្លែងកាលពីថ្ងៃចន្ទកន្លងមកថា អីុរ៉ង់មិនបានដាក់ការរារាំងណាមួយលើក្រុមហ៊ុនប្រេងសហរដ្ឋអាមេរិក ដែលចូលរួមក្នុងគម្រោងថាមពលប្រទេសនេះទេ ប៉ុន្តែការដាក់ទណ្ឌកម្មរបស់អាមេរិកអាចនឹងធ្វើឲ្យការសហការនេះមិនអាចសម្រេចទៅបាន ។
លោក Amir Hossein Zamaninia អនុរដ្ឋមន្ត្រីក្រសួងពាណិជ្ជកម្ម និងកិច្ចការអន្តរជាតិ ថ្លែងថា ៖ « អីុរ៉ង់មិនបានដាក់ការរារាំងណាមួយដល់ក្រុមហ៊ុនសហរដ្ឋអាមេរិកទេ ប៉ុន្តែពួកគេមិនអាចចូលរួមក្នុងគម្រោងប្រេង និងឧស្ម័នឡើយ ព្រោះតែច្បាប់អាមេរិក » ។
លោកបន្ថែមថា ៖ « យោងតាមការដាក់ទណ្ឌកម្មពីសភាអាមេរិក ក្រុមហ៊ុនប្រេងរបស់អាមេរិកមិនអាចចូលមកធ្វើការក្នុងអីុរ៉ង់ឡើយ»។
ប្រទេសអីុរ៉ង់បាននិយាយកាលពីថ្ងៃសៅរ៍ថា នៅពាក់កណ្តាលខែកុម្ភៈនេះ ពួកគេនឹងចាប់ផ្តើមការដេញថ្លៃដំបូងរបស់ប្រទេស តាំងពីការដកទណ្ឌកម្មអន្តរជាតិ ដើម្បីអភិវឌ្ឍន៍តំបន់ប្រេង និងឧស្ម័នធម្មជាតិ ។
ប្រទេសផលិតប្រេងធំជាងគេលេខ៣របស់ OPEC នេះសង្ឃឹមថា នឹងអាចទាក់ទាញក្រុមហ៊ុនបរទេសមកវិនិយោគក្នុងប្រទេស និងបង្កើនផលិតកម្មឡើងវិញបន្ទាប់ពីកង្វះការវិនិយោគអស់ជាច្រើនឆ្នាំ ។ យ៉ាងណាក្តី ក្រុមហ៊ុនបរទេសមានសភាពស្ងាត់នៅឡើយ បើទោះជាមានការដកទណ្ឌកម្មក្តី ។
ជាមួយគ្នានេះ កាលពីថ្ងៃសុក្រ រដ្ឋាភិបាលសហរដ្ឋអាមេរិករបស់លោក Donald Trump បានដាក់ទណ្ឌកម្មថ្មីមួយទៀតលើប្រទេសអីុរ៉ង់។ ពួកគេនិយាយថា សហរដ្ឋអាមេរិកនឹងមិនបិទភ្នែកម្ខាង ហើយបើកភ្នែកម្ខាងលើសកម្មភាពរបស់អីុរ៉ង់ទៀតឡើយ ។
ប៉ុន្តែលោក Zamaninia ថ្លែងថា ៖ « ការសម្រេចចិត្តបែបនេះមិនបង្កផលប៉ះពាល់អ្វីឡើយ ហើយក្រុមហ៊ុនអន្តរជាតិនៅតែមានចំណាប់អារម្មណ៍ចង់ធ្វើអាជីវកម្មជាមួយអីុរ៉ង់»៕
ចែករំលែកព័តមាននេះ