គណបក្សសង្គ្រោះជាតិប្រកាសថា លិខិតលោក សម រង្ស៊ី សុំឱ្យប្រពន្ធធ្វើមេបក្ស «ក្លែងក្លាយ»
រាជធានីភ្នំពេញ ៖ ទីបំផុត ប្រធានគណបក្សសង្គ្រោះជាតិលោក សម រង្ស៊ី បានប្រកាសលាលែងពីប្រធានគណបក្សហើយ ដោយអះអាងថាមានបញ្ហាផ្ទាល់ខ្លួន
រាជធានីភ្នំពេញ ៖ ទីបំផុត ប្រធានគណបក្សសង្គ្រោះជាតិលោក សម រង្ស៊ី បានប្រកាសលាលែងពីប្រធានគណបក្សហើយ ដោយអះអាងថាមានបញ្ហាផ្ទាល់ខ្លួន ។ នេះបើតាមលិខិតមួយច្បាប់របស់លោក សម រង្ស៊ី ផ្ញើជូនគណៈកម្មាធិការអចិន្ត្រៃយ៍ និងគណៈកម្មាធិការនាយកគណបក្សសង្គ្រោះជាតិ ដែលបានដឹងឮសុសសាយភ្លាមៗ កាលពីថ្ងៃទី១១ ខែកុម្ភៈ ។
ការបញ្ចប់តួនាទីនិងនយោបាយខ្លួនឯងរបស់លោក សម រង្ស៊ី នេះ បើយោងលិខិតរបស់លោក ដែលចុះហត្ថលេខាដោយផ្ទាល់និងត្រូវបានផ្សព្វផ្សាយបញ្ជាក់ថា «ការជូនដំណឹងស្តីពីការលាលែងរបស់ខ្ញុំពីតំណែងជាប្រធានគណបក្ស និងពីសមាជិកភាពគណបក្សសង្គ្រោះជាតិ ដោយសារមូលហេតុផ្ទាល់ខ្លួន។ ខ្ញុំសូមឲ្យគណៈកម្មាធិការអចិន្ត្រៃយ៍ និងគណៈកម្មាធិការនាយកគណបក្សសង្គ្រោះជាតិ មេត្តាជ្រាបជាព័ត៌មានអំពីសេចក្តីសម្រេចរបស់ខ្ញុំ ហើយចាត់ទុកថាសេចក្តីសម្រេចនេះចូលជាធរមានចាប់ពីថ្ងៃចុះហត្ថលេខារបស់ខ្ញុំនេះតទៅ» ។
ការលាលែងពីតំណែងរបស់លោកសម រង្សុីដែលកំពុងនិរទេសខ្លួននៅប្រទេសបារាំងនេះគឺបន្ទាប់ពីសំណើរបស់សម្តេចតេជោនាយករដ្ឋមន្ត្រី ហ៊ុន សែន ស្នើសុំឲ្យធ្វើវិសោធនកម្មច្បាប់ឆ្នាំ១៩៩៨ ស្តីពីគណបក្សនយោបាយ ដែលអាចនឹងឲ្យរំលាយគណបក្សនយោបាយណាដែលមានមេដឹកនាំត្រូវតុលាការផ្តន្ទាទោសជាទណ្ឌិត ។
លោក សម រង្ស៊ី បានសរសេរលើបណ្តាញសង្គមថា ការលាលែងរបស់លោកនេះ បណ្តាលមកពីមូលហេតុផ្ទាល់ខ្លួន ហើយលោកមិនបានភ្ជាប់ការលាលែងនេះទៅនឹងសំណើធ្វើវិសោធនកម្មច្បាប់ខាងលើនោះទេ ។ លោកបានបញ្ជាក់លើបណ្តាញសង្គមថា «ខ្ញុំលាលែងពីតំណែងប្រធានគណបក្សសង្គ្រោះជាតិ គឺដើម្បីផលប្រយោជន៍គណបក្ស» ។ លោកបានបន្ថែមទៀតថា «គ្រប់កាលៈទេសៈ ខ្ញុំនៅតែរក្សាឧត្តមគតិសង្គ្រោះជាតិជានិច្ចក្នុងបេះដូងរបស់ខ្ញុំ» ។
ទាក់ទងនឹងការលាលែងរបស់មេបក្សប្រឆាំងលោក សម រង្ស៊ី ត្រូវបានអ្នកនាំពាក្យគណបក្សប្រជាជនកម្ពុជាលោក សុខ ឥសាន ឲ្យដឹងតាមទូរស័ព្ទនាព្រឹកថ្ងៃទី១២ ខែកុម្ភៈ ថា ជារឿងផ្ទាល់ខ្លួនរបស់លោក សម រង្ស៊ី ហើយបើនិយាយពីគណបក្សវិញ ប្រហែលជាមានរឿងផ្ទៃក្នុង ។
លោកបញ្ជាក់ថា «គាត់ប្រកាសលាលែងជារឿងរបស់គាត់ គ្មានអ្នកណាបង្ខិតបង្ខំធ្វើទុក្ខបុកម្នេញគាត់នោះទេ ។ ឥឡូវគាត់មិនត្រឹមតែលាលែងពីប្រធានគណបក្សសង្គ្រោះជាតិទេ លាលែងទាំងសមាជិកគណបក្សថែមទៀត ។ ការលាលែងរបស់លោក សម រង្ស៊ី គាត់គ្មានកម្មវត្ថុថា មានការបង្ខិតបង្ខំឲ្យមានការលែងឯណា អត់មានសោះ» ។
ជាមួយគ្នានេះ លោក សុខ ឥសាន បានបន្ដថា ការលាលែងរបស់លោក សម រង្ស៊ី ប្រហែលជាគាត់ដឹងខ្លួនគាត់ថា គណបក្សប្រជាជនកម្ពុជានឹងធ្វើវិសោនធកម្មច្បាប់ស្តីពីគណបក្សនយោបាយនៅប៉ុន្មានថ្ងៃខាងមុខនេះ ។ លោកថា វិសោធនកម្មច្បាប់ស្តីពីគណបក្សនយោបាយនេះ នឹងមិនឲ្យអ្នកមានទោសដែលមានសាលក្រមតុលាការស្ថាពរឲ្យធ្វើជាប្រធានបក្សបានទេ ។
លោកគូសបញ្ជាក់ថា «គាត់ដឹងរឿងហ្នឹងហើយបើគាត់មិនចេញទេ គាត់នឹងត្រូវគេដេញពីប្រធានគណបក្សដដែល ។ ខ្ញុំចង់ប្រាប់ថា នៅលើពិភពលោក គេមិនដែលយកប្រធានគណបក្សណាជាអ្នកទោសនោះទេ ព្រោះថាប្រធានគណបក្សជាអ្នកទទួលខុសត្រូវក្នុងជោគវេសនាប្រទេសជាតិដែរ» ។
លោកថា ច្បាប់ស្តីពីគណបក្សនយោបាយប្រើប្រាស់ជាង២០ឆ្នាំមកហើយ ដូច្នេះការធ្វើវិសោនធកម្មច្បាប់នេះ ដើម្បីធ្វើឲ្យសមស្របនឹងស្ថានការណ៍ថ្មី ។ យើងធ្វើនេះមិនមែនចំពោះ សម រង្ស៊ី មួយទេ គឺយើងធ្វើសម្រាប់គណបក្សទាំងអស់ដែលពាក់ព័ន្ធត្រូវតែគោរពទាំងអស់គ្នា ។
សម្រាប់វិសោធនកម្មច្បាប់ស្តីពីគណបក្សនយោបាយនេះដែរ ត្រូវបាន លោក សុខ ឥសាន ឲ្យដឹងថា នៅថ្ងៃទី១៣ ខែកុម្ភៈ គណៈអចិន្ត្រៃយ៍រដ្ឋសភាបើកកិច្ចប្រជុំពិភាក្សា និងកំណត់ថ្ងៃដើម្បីបើកសម័យប្រជុំពេញអង្គធ្វើវិសោធនកម្មច្បាប់នេះ ។
ចំពោះវិសោធនកម្មច្បាប់នេះដែរ លោក សម រង្ស៊ី បានលើកឡើងមុននេះថា រដ្ឋសភាទីងមោងរបស់គណបក្សប្រជាជនកម្ពុជា កំពុងតែគិតគូររៀបចំច្បាប់ថ្មីមួយ ដែលមានបំណងចង់រំលាយគណបក្សសង្គ្រោះជាតិ ដោយយករូបខ្ញុំធ្វើជាលេស ។
លោក សម រង្ស៊ី បញ្ជាក់ថា «ច្បាប់នេះនឹងរៀបចំឲ្យមានប្រព័ន្ធបក្សតែមួយឡើងវិញ ដូចកាលពីសម័យកុម្មុយនីស្ត ។ គេកំពុងតែតុបតែងច្បាប់នេះ ដោយសំដៅមកលើរូបខ្ញុំ ក្នុងឋានៈខ្ញុំជាប្រធានគណបក្សសង្គ្រោះជាតិ ដោយសារតែគណបក្សសង្គ្រោះជាតិ ជាគណបក្សប្រឆាំងតែមួយគត់ ដែលមានតំណាងរាស្ត្រជាប់ឆ្នោតក្នុងរដ្ឋសភា ហើយដែលជាគណបក្សតែមួយគត់ អាចប្រកួតឈ្នះគណបក្សប្រជាជនកម្ពុជា បើមានការបោះឆ្នោតត្រឹមត្រូវ» ។
ទោះបីជាមានការបញ្ជាក់ពីអ្នកនាំពាក្យគណបក្សកាន់អំណាចយ៉ាងណាក្តី ក៏លោក សម រង្ស៊ី បានអះអាងថា ច្បាប់តុបតែងឡើងថ្មីដើម្បីគ្រាន់តែដកហូតតួនាទីពី សម រង្ស៊ី នេះ នឹងមិនមានឥទ្ធិពលអ្វីទេ ក្នុងឆាកនយោបាយនៃប្រទេសកម្ពុជា ។ ទោះជាខ្ញុំលះបង់រាល់តួនាទីរបស់ខ្ញុំក្នុងជួរគណបក្សក៏ដោយ ក៏ខ្ញុំនៅតែជានិមិត្តរូបតំណាងឲ្យទឹកចិត្តប្រជារាស្ត្រ ដែលប្រឆាំងរបបផ្តាច់ការ និងពុករលួយសព្វថ្ងៃ ។ ចំណុចនេះហើយ ដែលមានសារៈសំខាន់ក្នុងការកំណត់ទិសនយោបាយក្នុងចិត្តរបស់ប្រជារាស្ដ្រខ្មែរ ។
ចំណែកលោក កឹម សុខា អនុប្រធានគណបក្សសង្គ្រោះជាតិ បានលើកឡើងពីការលាលែងពីតំណែងរបស់លោក សម រង្ស៊ីថា ការសម្រេចចិត្តលាលែងពីប្រធាននិងសមាជិកគណបក្សសង្គ្រោះជាតិ របស់លោក សម រង្ស៊ី គឺជាការសម្រេចចិត្តប្រកបដោយកិត្តិយស ដោយមានការពិគ្រោះយោបល់ជាមួយថ្នាក់ដឹកនាំគណបក្ស ដើម្បីផលប្រយោជន៍ជាតិ និងគណបក្សជាធំ ។
លោក កឹម សុខា ថ្លែងថា គណបក្សសង្គ្រោះជាតិស្គាល់ពីខ្លួនឯងច្បាស់ ដឹងថាខ្លួនកើតចេញពីណា និងដើម្បីអ្វី ។ លោកបញ្ជាក់ថា «ចាប់ពីអាណត្ដិនេះតទៅ ខ្ញុំសូមឲ្យថ្នាក់ដឹកនាំគណបក្សសង្គ្រោះជាតិយើង ទាំងថ្នាក់មូលដ្ឋាន និងថ្នាក់ជាតិ យកចិត្តទុកដាក់ឲ្យបានខ្លាំងចំពោះខេត្តដែលមាន១អាសនៈតំណាងរាស្ត្រទាំង៨ខេត្តនោះ» ។
លោកបន្ថែមថា ដោយខ្ញុំសង្កេតឃើញថា កាលពីអាណត្ដិមុនៗ យើងហាក់បីដូចជា.តទីឲ្យគូប្រកួតរបស់យើង ដោយយើងមិនបានយកចិត្តទុកដាក់ខ្លាំងចំពោះខេត្ត ដែលមាន១អាសនៈតំណាងរាស្ដ្រ ។
ក្រោយពីលោក សម រង្ស៊ី បានលាលែងពីតំណែងប្រធានគណបក្សសង្គ្រោះជាតិ ដោយប្រកាសថាមកពីមូលហេតុផ្ទាល់ខ្លួន កាលពីថ្ងៃទី១១ ខែកុម្ភៈ ក៏មានលេចចេញលិខិតមួយទៀតចុះថ្ងៃទី១០ ខែកុម្ភៈ បានចេញផ្សាយថា លោក សម រង្សុី បានស្នើថ្នាក់ដឹកនាំបក្សប្រឆាំងមួយនេះជ្រើសរើសភរិយារបស់លោក គឺលោកស្រី ជូឡុង សូមួរ៉ា ឱ្យជំនួសតួនាទីនេះគឺធ្វើជាប្រធានគណបក្ស ។
លោក អេង ឆៃអ៊ាង អគ្គលេខាធិការរងគណបក្សសង្គ្រោះជាតិ មិនហ៊ានអះអាងចំពោះលិខិតនោះថា ពិតឬក្លែងក្លាយនោះទេ ។ ខណៈអ្នកសារព័ត៌មានបានសាកសួរតាមទូរស័ព្ទកាលពីព្រឹកថ្ងៃទី១២ ខែកុម្ភៈ លោកលើកឡើងថា «សូមសួរទៅអ្នកណាដែលបានបង្ហោះលិខិតនោះទៅ ។ ខ្ញុំមិនហ៊ានបញ្ជាក់ទេ ។ យើងគួរដឹងថា នរណាអ្នកផុស(បង្ហោះ)លិខិតនោះ បើថ្នាក់ដឹកនាំគណបក្សផុសវាជាការពិត តែនេះនរណាអ្នកផុស? ។
ក្នុងន័យនេះដែរ លោក អេង ឆៃអ៊ាង បានថ្លែងប្រាប់អ្នកសារព័ត៌មានថា លិខិតចុះថ្ងៃទី១០ កុម្ភៈ ដែលមានទាំងហត្ថលេខារបស់លោក សម រង្ស៊ី ផងនោះ ជាលិខិតមិនពិតឬមានគេក្លែង ។ លោក អេង ឆៃ អ៊ាង មិនត្រឹមតែមិនហ៊ានបញ្ជាក់ដូចលិខិតកាលពីថ្ងៃទី១១ ខែកុម្ភៈ ដែលលោក សម រង្ស៊ី ផ្ញើមកគណបក្សទេ ថែមទាំងជំរុញឲ្យអ្នកកាសែតទៅសួរអ្នកណាដែលបានផុស ឬបង្ហោះលិខិតដែលទំនងជាលោកដឹងថា «លិខិតនេះមិនពិតឬមានគេក្លែង» ។
គណៈកម្មាធិការនាយកគណបក្សសង្គ្រោះជាតិបានប្រកាសជាផ្លូវការនៅរសៀលថ្ងៃ១២ កុម្ភៈថា លោកសម រង្ស៊ី លាលែងពីតំណែងប្រធានគណបក្ស និងប្រគល់តួនាទីទៅលោក កឹម សុខា ជាប្រធានស្តីទីដឹកនាំគណបក្សមុនពេលជ្រើសរើសប្រធានថ្មី ។ នេះបើយោងតាមលោក យឹម សុវណ្ណ អ្នកនាំពាក្យគណបក្សសង្គ្រោះជាតិបានថ្លែងប្រាប់អ្នកកាសែតបន្ទាប់ពីកិច្ចប្រជុំមួយបានធ្វើឡើងជាបន្ទាន់នៅស្នាក់ការកណ្តាលគណបក្សសង្គ្រោះជាតិ ។
លោក យឹម សុវណ្ណ បានថ្លែងថា គណៈកម្មាធិការនាយករបស់គណបក្សសង្គ្រោះជាតិបានប្រជុំសម្រេចកាលពីរសៀលថ្ងៃទី១២ កុម្ភៈ ឆ្នាំ២០១៧នេះ ដោយទទួលយកនូវសំណើលាលែងរបស់លោកប្រធានសម រង្ស៊ី ។ លោកបានលើកឡើងថា គណបក្សសង្គ្រោះជាតិនៅមិនទាន់ជ្រើសរើសប្រធានគណបក្សថ្មីជំនួសលោកសម រង្ស៊ីនៅឡើយទេ តែកិច្ចប្រជុំនេះបានសម្រេចប្រគល់សិទ្ធិជូនទៅលោក កឹម សុខា អនុប្រធានគណបក្សទទួលតួនាទីជាប្រធានស្តីទី ដើម្បីដឹកនាំគណបក្សរហូតដល់មានការជ្រើសរើសប្រធានថ្មី ។
លោក យឹម សុវណ្ណ បានប្រកាសថា លិខិតមួយដែលបានសរសេរផ្ញើមកលោក កឹម សុខា ចុះថ្ងៃទី១០ កុម្ភៈ ស្នើសុំគណបក្សសង្គ្រោះជាតិជ្រើសរើសលោក ស្រី ជូឡុង សូមួរ៉ា ភរិយាលោក សម រង្ស៊ី ធ្វើជាប្រធានបក្សជំនួសលោកសម រង្ស៊ី គឺជាលិខិតក្លែងក្លាយទេមិនពិតឡើយ ។
លោកបានបញ្ជាក់ថា ក្រៅពីលោក កឹម សុខាជាប្រធានស្តីទីដឹកនាំគណបក្សសង្គ្រោះជាតិមុនពេលជ្រើសរើសប្រធានថ្មី គ្មានមនុស្សទី២ណាដែលត្រូវមកជំនួសនោះទេ ។
លោក យឹម សុវណ្ណ បានលើកឡើងថា អ្វីដែលគណបក្សធ្វើទៅតាមនីតិវីធីបទបញ្ជាផ្ទៃក្នុងដោយទទួលយកការសុំលាលែងពីប្រធាន និងសមាជិករបស់គណបក្សសង្គ្រោះជាតិនេះតាំងពីថ្ងៃទី១១ ខែកុម្ភៈ ឆ្នាំ២០១៧ ។ ការលាលែងនេះមិនដែលមានមេដឹកនាំគណបក្សណាធ្វើដូចលោក សម រង្ស៊ី នោះទេ ៕
ចែករំលែកព័តមាននេះ