ខេត្តស្វាយរៀង ៖ មានរថយន្តធុនយក្សប្រភេទវ៉េអងចំនួន០៤គ្រឿងដឹកទំនិញខោអាវគីបពេញៗទ្រុង យកទៅផ្ទេរដាក់កាណូតប៉ុកចៃ (វៀតណាម) នៅចំណុចប៉ុស្ត៍វរការពារព្រំដែនអនុសេនាតូចលេខ២ តំណាក់យ៉ាំដូង ឆ្លងដែនទៅប្រទេសវៀតណាម ដែលសង្ស័យជាទំនិញគេចពន្ធ ។…
ខេត្តស្វាយរៀង ៖ មានរថយន្តធុនយក្សប្រភេទវ៉េអងចំនួន០៤គ្រឿងដឹកទំនិញខោអាវគីបពេញៗទ្រុង យកទៅផ្ទេរដាក់កាណូតប៉ុកចៃ (វៀតណាម) នៅចំណុចប៉ុស្ត៍វរការពារព្រំដែនអនុសេនាតូចលេខ២ តំណាក់យ៉ាំដូង ឆ្លងដែនទៅប្រទេសវៀតណាម ដែលសង្ស័យជាទំនិញគេចពន្ធ ។
ករណីនេះ កើតឡើងនៅវេលាម៉ោង៧និង១០នាទីយប់ រហូតដល់ម៉ោង១២អធ្រាត្រថ្ងៃទី៧ កញ្ញា២០២២ នៅចំណុចប៉ុស្តិ៍ទាហានវរការពារព្រំដែន កងអនុសេតូចលេខ២ តំណាក់យ៉ាំដូង ទន្លេយ៉ាំដូង ស្ថិតនៅភូមិចម្លង ឃុំកំពង់ចំឡង ស្រុកស្វាយជ្រំ។
បើតាមលោក ស្វាយហាន មេប៉ុស្ត៍នគបាលការពារព្រំដែនទឹកតំបន់យ៉ាំដូងបានប្រាប់អ្នកសារព័ត៌មានថា រថយន្តយីឌុបប្រភេទវ៉េអងចំនួន០៤គ្រឿងនេះ ទី១-ពាក់ស្លាកលេខភ្នំពេញ 3F-3226 ទី២-ពាក់ស្លាកលេខ ភ្នំពេញ 3F-1911 ទី៣-ពាក់ស្លាកលេខ កំពង់ចាម3A7556លេខរ៉ឺម៉កភ្នំពេញ4A- 9101 និងទី៤ ,ភ្នំពេញ4A-5790 ដឹកទំនិញខោអាវគីប មកពីរាជធានីភ្នំពេញ មកផ្ទេរដាក់ត្រាក់ទ័រ ដឹកទៅដាក់កាណូតប៉ុកចៃ វៀតណាម ចំនួន០២គ្រឿង នៅចំណុចកំពង់ទឹកប៉ុស្ត៍វរការពារព្រំដែន កងអនុសេនាតូចលេខ២ តំណាក់យ៉ាំដូង រួចឆ្លងដែនទៅប្រទេសវៀតណាម ។
នៅពេលដែលអ្នកសារព័ត៌មានយើងសួរថា ហេតុអ្វីបានជាផ្ទេរទំនិញនៅពេលយប់ តើទំនិញទាំងនេះជាទំនិញគេចពន្ធឬយ៉ាងណា ? សមត្ថកិច្ចឆ្លើយថា បើតាមម្ចាស់ទំនិញប្រាប់ថា ពួកគេបានបង់ពន្ធគយរួចហើយ ក៏ប៉ុន្តែដោយពេលថ្ងៃមានភ្លៀងទើបខកដល់ពេលយប់។
មហាជនវិញបានលើកឡើងថា ពួកគាត់មានការព្រួយបារម្ភយ៉ាងខ្លាំងអំពីផ្លូវថ្នល់ ដោយរថយន្តដឹកទំនិញធុនយក្សប្រភេទវ៉អងទាំងនេះដឹកទំនិញធ្ងន់ ក្នុង១យប់ៗចាប់ពី៨គ្រឿងទៅ១០គ្រឿង ហើយថ្នល់១ខ្សែនេះពីមុនជាផ្លូវលំ ទើបតែរាជរដ្ឋាភិបាលផ្តល់ជាផ្លូវក្រាលកៅស៊ូ (កៅស៊ូស្តើង) សម្រាប់តែរថយន្តធុនស្រាល និងរថយន្តដឹកកម្មករ ធ្វើដំណើរ ហើយបើរថយន្តធុនយក្សដឹកទំនិញធ្ងន់ៗបែបនេះ និងធ្វើឲ្យស្រុតផ្លូវខូចជាមិនខានសូមអាជ្ញាធរមានសមត្ថកិច្ចមេត្តា ចុះពិនិត្យនិងអន្តរាគមន៍ផងទាន ។
ទាក់ទិនករណីនេះដែរ មិនអាចរកការបំភ្លឺពីសមត្ថកិច្ចគយនិងរដ្ឋាករខេត្តស្វាយរៀងបានទេ មកទល់ព្រឹកថ្ងៃទី០៨ កញ្ញា ២០២២នេះ ។ បើតាមមន្ត្រីនគបាលសេដ្ឋកិច្ចម្នាក់សុំមិនបញ្ចេញឈ្មោះបានលើកឡើងថា ប៉ុស្តិ៍ច្រករបៀង ឬដំណាក់ គ្មានច្បាប់អនុញ្ញាតឲ្យដឹកទំនិញចេញចូលទេពីក្រៅប្រទេសទេ គឺច្បាប់អនុញ្ញាតឲ្យនាំទំនិញចេញចូលតាមច្រកទ្វារព្រំដែនអន្តរជាតិ ច្រកទ្វារ ព្រំដែនទ្វេភាគី ច្រកទ្វារតំបន់ព្រំដែន ហើយមានដាក់មន្ត្រីគយ ពិនិត្យ ទំនិញ ចេញ-ចូល ហើយបើលួចនាំទំនិញចេញ នៅពេលយប់តាមច្រករបៀង ឬតាមដំណាក់ទាហាន ដោយគ្មានមន្ត្រីជំនាញពិនិត្យឯកសារទំនិញទេ គឺសង្ស័យជាទំនិញគេចពន្ធ ៕
ចែករំលែកព័តមាននេះ