ចំណាយជាង៣ម៉ឺនដុល្លារទិញដុំពេជ្រយកទៅច្នៃ ចុងក្រោយជាងឆ្លើយមួយម៉ាត់ ស្ទើរគាំង
- ភ្នំពេញ
ជនសង្ស័យម្នាក់ ត្រូវបានកម្លាំងសមត្ថកិច្ចនគរបាលការិល័យព្រហ្មទណ្ឌកម្រិតស្រាល ឃាត់ខ្លួនបញ្ជូនទៅសាលាដំបូងរាជធានីភ្នំពេញ
រាជធានីភ្នំពេញ ៖ ជនសង្ស័យម្នាក់ ត្រូវបានកម្លាំងសមត្ថកិច្ចនគរបាលការិល័យព្រហ្មទណ្ឌកម្រិតស្រាល ឃាត់ខ្លួនបញ្ជូនទៅសាលាដំបូងរាជធានីភ្នំពេញ កាលពីរសៀលថ្ងៃទី៧ ខែកញ្ញា ឆ្នាំ២០២២ នេះ ពាក់ព័ន្ធពីបទ.ឆបោ.កលើទឹកប្រាក់ប្រមាណ ៣១ ០០០ ដុល្លារអាមេរិក (លក់ដុំពេជ្រក្លែងក្លាយ) ។
ជនសង្ស័យខាងលើនេះមានឈ្មោះ មិត្ត លាប ហៅ វណ្ណៈ ភេទប្រុស អាយុ៤២ឆ្នាំ មុខរបរមិនពិតប្រាកដ មានទីលំនៅផ្ទះលេខ២៤ ផ្លូវលេខ១ នៅចំណុចបុរី លឹមឈាងហាក់ ស្ថិតក្នុងសង្កាត់កំបូល ខណ្ឌកំបូល រាជធានីភ្នំពេញ ។
អង្គហេតុនៃការចាប់ខ្លួនជនសង្ស័យខាងលើ ត្រូវបានគេដឹងថា ជនសង្ស័យជាមនុស្សស្គាល់ និងរាប់អានជនរងគ្រោះឈ្មោះ អ៊ូច វណ្ណា ជាច្រើនឆ្នាំមកហើយ លុះថ្ងៃទី២៧ ខែមីនា ឆ្នាំ២០២២ ជនសង្ស័យបានយករូបសំណាកព្រះនាងទេព ធ្វើអំពីស្ពាន់លាយមាសទំហំប៉ុនមេដៃ១គ្រឿង បង្ហាញជនរងគ្រោះ ដោយប្រាប់ថា គេម្នាក់នៅប៉ៃលិនឲ្យ ហើយគេនោះក៏នៅមានដុំពេជ្រមួយដុំធំទៀតចង់លក់ដែរ ក្នុងតម្លៃ ៣១ ០០០ដុល្លារអាមេរិក ជាដុំពេជ្រពិតប្រាកដដែលខ្លួន (ជនសង្ស័យ) បានពិនិត្យរួចហើយ ។
បន្ទាប់មកជនសង្ស័យក៏បាននិយាយបញ្ចុះបញ្ចូលឲ្យជនរងគ្រោះទិញដុំពេជ្រនោះ ដើម្បីទុកលក់ចំណេញចែកលុយគ្នា ។ ដោយការជឿទុកចិត្តលើការរាប់អានគ្នាកន្លងមក ជនរងគ្រោះបានប្រគល់ប្រាក់ ៣១ ០០០ ដុល្លារអាមេរិក ទៅឱ្យជនសង្ស័យ ដើម្បីយកទៅទិញដុំពេជ្រនោះ ក្រោយពេលទទួលបានប្រាក់ពីជនរងគ្រោះហើយ ជនសង្ស័យបានធ្វើដំណើរទៅខេត្តប៉ៃលិន បាត់ឈឹងតែម្តង ។
លុះដល់ថ្ងៃទី៩ ខែមិថុនា ឆ្នាំ២០២២ (៤ខែក្រោយមក) ជនសង្ស័យក៏បានត្រឡប់មកពីទិញដុំពេជ្រនៅខេត្តប៉ៃលិនវិញ ហើយក៏បានជួបជនរងគ្រោះនៅផ្ទះជួលមួយកន្លែង ស្ថិតក្នុងរាជធានីភ្នំពេញ និងបានយកដុំពេជ្រនោះឲ្យជនរងគ្រោះមើល ទើបជនរងគ្រោះនាំជនសង្ស័យយកដុំពេជ្រនោះ ទៅឲ្យជាងច្នៃត្បូងនៅម្តុំផ្សារតាខ្មៅ ខេត្តកណ្តាល ដើម្បីពិនិត្យមើល ស្រាប់តែជាងច្នៃឆ្លើយថា «ដុំពេជ្រក្លែងក្លាយ» ។
ដោយសារការប៉ិនប្រសប់ក្នុងការឆបោ.ក ជនសង្ស័យបានយកដុំពេជ្រនោះ រួចរត់គេចខ្លួនបន្តទៀត លុះរហូតដល់វេលារសៀលថ្ងៃទី៤ ខែកញ្ញា ឆ្នាំ២០២២ ជនរងគ្រោះក៏បានជួបជនសង្ស័យម្តងទៀតនៅស្ថានីយប្រេងឥន្ទនៈជិតស្ពានព្រែកព្នៅ ខណ្ឌព្រែកព្នៅ ក៏ឃាត់ខ្លួននាំទៅឲ្យសមត្ថកិច្ចនគរបាលព្រហ្មទណ្ឌកម្រិតស្រាល រាជធានីភ្នំពេញ ចាត់ការតាមផ្លូវច្បាប់តែម្តង៕
ចែករំលែកព័តមាននេះ