ទីបំផុតឧកញ៉ា ជួប ច័ន្ទ ត្រូវចូលសម្រាកនៅពន្ធនាគាព្រៃ.ស (ម១) បានសម្រេច បន្ទាប់ពីស្ថាប័នអយ្យការសាលាដំបូងរាជធានីភ្នំពេញ ទុកពេល៤៨ម៉ោង ឲ្យរកប្រាក់១លាន៥ម៉ឺនដុល្លារអាមេរិក ដើម្បី
រាជធានីភ្នំពេញ ៖ ទីបំផុតឧកញ៉ា ជួប ច័ន្ទ ត្រូវចូលសម្រាកនៅពន្ធនាគាព្រៃ.ស (ម១) បានសម្រេច បន្ទាប់ពីស្ថាប័នអយ្យការសាលាដំបូងរាជធានីភ្នំពេញ ទុកពេល៤៨ម៉ោង ឲ្យរកប្រាក់១លាន៥ម៉ឺនដុល្លារអាមេរិក ដើម្បីដោះបំណុលដើមបណ្តឹង ។
ឯកឧត្តម ច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញ កាលពីព្រឹកថ្ងៃទី៧ ខែកញ្ញា ឆ្នាំ២០២២ បានចេញដីកា អមជូនទៅប្រធានមណ្ឌលអប់រំកែប្រែទី១ នៃក្រសួងមហាផ្ទៃ ដើម្បីអនុវត្តដីកាឲ្យបង្ខំ និងឲ្យឃុំខ្លួនឈ្មោះ ជួប ច័ន្ទ ដាក់ពន្ធនាគារតាមអំណាចសាលក្រម និងសាលដីការបស់តុលាការជាន់ទាប និងជាន់ខ្ពស់ ដែលចូលជាស្ថាពរពាក់ព័ន្ធសំណុំរឿង មិនបំពេញកាតព្វកិច្ចចំពោះឧបករណ៍អាចជួញដូរបាន (ពោលគឺជំពាក់ប្រាក់គេមិនសង) ហៅថាឧកញ៉ាក្ស័យធន ។
សូមជម្រាបថា កាលពីរសៀលថ្ងៃទី៥ ខែកញ្ញា ឆ្នាំ២០២២ សមត្ថកិច្ចនគរបាលព្រហ្មទណ្ឌកម្រិតស្រាលរាជធានីភ្នំពេញ បានធ្វើការចាប់ខ្លួនឧកញ៉ា ជួប ច័ន្ទ បញ្ជូនទៅតុលាការ ពាក់ព័ន្ធពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន ។ ការចាប់ខ្លួនលើជនជាប់ចោទ សមត្ថកិច្ចបានអនុវត្តតាមដីកាបញ្ជាឲ្យបង្ខំ និងឲ្យឃុំខ្លួនឈ្មោះ ជួប ច័ន្ទ ភេទប្រុស អាយុ៤៥ឆ្នាំ មុខរបរជាពាណិជ្ជករ ស្នាក់នៅផ្ទះលេខ៥២ ផ្លូវ១២៣ ស្ថិតក្នុងសង្កាត់ទួលទំពូង១ ខណ្ឌចំការមន រាជធានីភ្នំពេញ ពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តនៅក្រុមហ៊ុន គឹម ហាប់ ខូអិលធីឌី ស្ថិតនៅសង្កាត់ទួលស្វាយព្រៃ២ ខណ្ឌចំការមន រាជធានីភ្នំពេញ កាលពីថ្ងៃទី៣០ ខែមិថុនា ឆ្នាំ២០១៧ ។
ដីកាបញ្ជាឲ្យបង្ខំ និងឲ្យឃុំខ្លួនឧកញ៉ា ជួប ច័ន្ទ ចេញដោយឯកឧត្តម ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ ហើយសមត្ថកិច្ចនគរបាលព្រហ្មទណ្ឌកម្រិតស្រាល បានយកទៅអនុវត្ត និងចាប់ខ្លួនឈ្មោះ ជួប ច័ន្ទ កាលពីវេលាម៉ោង១០ព្រឹក ថ្ងៃទី៥ ខែកញ្ញា ។ ពេលសមត្ថកិច្ចចាប់ខ្លួនឧកញ៉ាក្ស័យធននោះបានហើយ នារសៀលថ្ងៃដដែលបានបញ្ជូនទៅដល់ស្ថាប័នអយ្យការ ដើម្បីបើកការស៊ើបសួរតាមនីតិវិធី ។
ក្រោយពីតំណាងអយ្យការបើកការស៊ើបសួរអស់រយៈពេលច្រើនម៉ោង ក៏បានសម្រេចផ្ញើឈ្មោះ ជួប ច័ន្ទ ទៅសមត្ថកិច្ចវិញ តម្រូវឲ្យព្រឹកថ្ងៃទី៦ ខែកញ្ញា ឆ្នាំ២០២២ នាំជនសង្ស័យមកកាន់សាលាដំបូងរាជធានីភ្នំពេញ ដើម្បីបន្តការសាកសួរទៀត ។ ប៉ុន្តែបន្ទាប់មកតំណាងអយ្យការបានទុកពេល៤៨ម៉ោង ដើម្បីឲ្យឧកញ៉ា ជួប ច័ន្ទ រកប្រាក់សងទៅដើមបណ្តឹងចំនួន១លាន ៥ម៉ឺនដុល្លារអាមេរិក ហើយបើមិនបានប្រាក់សងម្ចាស់បំណុលទេ មានតែទៅសម្រាកក្នុងពន្ធនាគារ ។
លោក លីវ វុទ្ធី តំណាងឲ្យដើមបណ្តឹងប្តឹងឧកញ៉ា ជួប ច័ន្ទ ពាក់ពន្ធពីបទ.មិនបំពេញកាតព្វកិច្ចចំពោះឧបករណ៍អាចជួញដូរ បានបង្ហើបឲ្យដឹងនៅព្រឹកថ្ងៃទី៦ ខែកញ្ញានេះថា ស្ថាប័នអយ្យការបានទុកពេល៤៨ម៉ោងឲ្យឧកញ៉ា ជួប ច័ន្ទ រកប្រាក់មកដោះបំណុលចំនួន១លានដុល្លារ និងជំងឺចិត្ត៥ម៉ឺនដុល្លារអាមេរិកទៀត បើមិនបាន ឬមិនត្រូវគ្នានោះទេ ចុងក្រោយវាសនាលោកឧកញ៉ា ជួប ច័ន្ទ និងត្រូវទៅដេកពន្ធនាគារព្រៃ.ស ។
លោក លីវ វុទ្ធី បានបន្តថា កាលពីថ្ងៃទី៣០ ខែមករា ឆ្នាំ២០១៨ សាលាដំបូងរាជធានីភ្នំពេញ បានចេញសាលក្រមព្រហ្មទណ្ឌលេខ២៥០”ង” ដែលបានសម្រេចផ្តន្ទាទោសឈ្មោះ ជួប ច័ន្ទ ដាក់ពន្ធនាគារកំណត់២ឆ្នាំ ពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តកាលពីថ្ងៃ៣០ ខែមិថុនា ឆ្នាំ២០១៧ តាមបញ្ញត្តិមាត្រា ២៣១ នៃច្បាប់ស្តីពីឧបករណ៍អាចជួញដូរបាន និងប្រតិបត្តិការទូទាត់ប្រាក់ ។ សាលក្រមសាលាដំបូងរាជធានីភ្នំពេញនេះ ត្រូវបានជនជាប់ចោទឈ្មោះ ជួប ច័ន្ទ ប្តឹងឧទ្ធរណ៍ ។ ហើយក្រោយពីបានឆ្លងកាត់សវនាការដេញដោលរួចមក សាលាឧទ្ធរណ៍ភ្នំពេញក៏បានចេញសាលដីកាលេខ ៥៣ “ក្ររ.សវ” ចុះថ្ងៃទី៧ ខែមិថុនា ឆ្នាំ២០៨ ដោយសម្រេចតម្កល់សាលក្រមសាលាដំបូងរាជធានីភ្នំពេញ ទុកជាបានការដដែល លើកលែងតែចំណុចទី១ នៃការផ្តន្ទាទោសឈ្មោះ ជួប ច័ន្ទ ដាក់ពន្ធនាគារកំណត់២ឆ្នាំ នៃសាលក្រមនេះ ត្រូវកែប្រែទៅជាទោសអនុវត្តក្នុងពន្ធនាគារកំណត់រយៈពេល៧ខែវិញ ទោសនៅសល់ព្យួរការអនុវត្តធម្មតា តាមមាត្រា ១០៧ នៃក្រមព្រហ្មទណ្ឌ ។
បន្ទាប់មកឈ្មោះ ជួប ច័ន្ទ ក៏បានប្តឹងសារទុក្ខ និងសាលដីការបស់សាលាឧទ្ធរណ៍ភ្នំពេញ នោះទៀត ទើបនៅថ្ងៃទី២៥ ខែឧសភា ឆ្នាំ២០២០ តុលាការកំពូលក៏បានចេញសាលដីកាលេខ ១២៧” ដោយបានសម្រេច បដិសេធបណ្តឹងសារទុក្ខរបស់ជនជាប់ចោទឈ្មោះ ជួប ច័ន្ទ និងតម្កល់សាលដីកាសាលាឧទ្ធរណ៍ភ្នំពេញទុកជាបានការ ។ ដោយសារសាលដីការបស់សភាព្រហ្មទណ្ឌ នៃតុលាការកំពូលបានចូលជាស្ថាពររួចហើយ កាលពីថ្ងៃទី២៥ ខែឧសភា ឆ្នាំ២០២២ លោក លីវ វុទ្ធី ជាម្ចាស់បំណុលក្នុងសំណុំរឿងនេះ បានដាក់ពាក្យស្នើសុំទៅអយ្យការអមសាលាដំបូងរាជធានីភ្នំពេញ ដើម្បីអនុវត្តសាលក្រម និងសាលដីកាខាងលើនេះ តាមនីតិវិធីច្បាប់ ។ ទីបំផុតឧកញ៉ា ជួប ច័ន្ទ ចូលសម្រាកក្នុងពន្ធនាគារព្រៃ.ស (ម១) បានសម្រេច ៕
ចែករំលែកព័តមាននេះ