ឈ្មួញយកឈើប្រណីតទៅលាក់ទុកក្បែរបន្ទាយទាហាន
ខេត្តប៉ៃលិន ៖ បើទោះបីជាសារព័ត៌មាន និងទូរទស្សន៍ បានចុះផ្សាយព្រោងព្រាត ពាក់ព័ន្ធនឹងបញ្ហាក្រុមឈ្មួញឃុបឃិតគ្នាជាមួយមន្ត្រីសមត្ថកិច្ចមួយចំនួនតាមព្រំដែន …
ខេត្តប៉ៃលិន ៖ បើទោះបីជាសារព័ត៌មាន និងទូរទស្សន៍ បានចុះផ្សាយព្រោងព្រាត ពាក់ព័ន្ធនឹងបញ្ហាក្រុមឈ្មួញឃុបឃិតគ្នាជាមួយមន្ត្រីសមត្ថកិច្ចមួយចំនួនតាមព្រំដែន …
ខេត្តប៉ៃលិន ៖ បើទោះបីជាសារព័ត៌មាន និងទូរទស្សន៍ បានចុះផ្សាយព្រោងព្រាត ពាក់ព័ន្ធនឹងបញ្ហាក្រុមឈ្មួញឃុបឃិតគ្នាជាមួយមន្ត្រីសមត្ថកិច្ចមួយចំនួនតាមព្រំដែនរកស៊ីឈើប្រណីតខុសច្បាប់ឆ្លងដែនពីប្រទេសថៃចូលក្នុងទឹកដីខ្មែរជាច្រើនលើកច្រើនសារយ៉ាងណាក៏ដោយ រហូតមកដល់ពេលនេះ គេនៅតែឃើញមានសកម្មភាពលីសែងឈើនៅទីនោះយ៉ាងគគ្រឹកគគ្រេងដដែល ដោយគ្មានសមត្ថកិច្ចណាម្នាក់ចាត់ការរឿងនេះទេ ពោលគឺកម្មករខ្មែរឆ្លងដែនទៅលីសែងឈើនៅទីនោះរាល់ថ្ងៃ ។
ជាក់ស្តែង កាលពីវេលាម៉ោង១ និង៣០នាទីរសៀល ថ្ងៃទី៨ ខែកុម្ភៈ ឆ្នាំ២០១៧ នេះ កម្លាំងសមត្ថកិច្ចមួយក្រុមបានចុះល្បាតតាមព្រំដែន ស្រាប់តែប្រទះឃើញឈើប្រណីតជាច្រើនកំណាត់ត្រូវបានគេលាក់ទុកនៅក្នុងព្រៃក្បែរបន្ទាយទាហានមួយកន្លែង ស្ថិតនៅចំណុចចន្លោះបង្គោលសីម៉ាលេខ៦៦ និង៦៧ ក្នុងភូមិបតាំងស៊ូ សង្កាត់បយ៉ាខា ក្រុងប៉ៃលិន ដែលគេសង្ស័យថា ក្រុមឈ្មួញទាំងនោះបានឃុបឃិតគ្នាជាមួយមន្ត្រីសមត្ថកិច្ចព្រំដែនរកស៊ីមុខរបរមួយនេះ ។
ប្រភពព័ត៌មានបានឱ្យដឹងថា បន្ទាប់ពីសមត្ថកិច្ចចុះល្បាតតាមព្រំដែន ស្រាប់តែប្រទះឃើញឈើប្រណីតនៅក្នុងព្រៃក្បែរបន្ទាយទាហាន កងល្បាតទី២ វរលេខ៥០៤ ដោយក្នុងនោះមានឈើប្រណីតគ្រញូង៣កំណាត់ និងសុក្រំ១២កំណាត់ ត្រូវបានឈ្មួញជួលកម្មករខ្មែរឱ្យលីសែងពីប្រទេសថៃចូលមកក្នុងទឹកដីខ្មែរ តាមច្រកសម្ងាត់ក្បែរបន្ទាយនេះ ។ ប្រភពបន្តទៀតថា ឈើទាំងអស់នោះ ក្រោយមកត្រូវបានគេយកចូលទៅក្នុងបន្ទាយទាហានខាងលើ ហើយសង្ស័យថា មានការពាក់ព័ន្ធទៅនឹងមន្ត្រីយោធាមួយចំនួនផងដែរ ។
ពាក់ព័ន្ធនឹងបញ្ហានេះ លោក អោម វីរៈ នាយខណ្ឌរដ្ឋបាលព្រៃឈើប៉ៃលិន បានឱ្យដឹងថា ខាងលោកបានបញ្ជូនមន្ត្រីរបស់ខ្លួនឱ្យទៅទំនាក់ទំនងជាមួយមន្ត្រីយោធាកងការពារទី២ វរៈព្រំដែនលេខ៥០៤ ដើម្បីយកឈើទាំងនោះមករក្សាទុកនៅខណ្ឌរដ្ឋបាលព្រៃឈើប៉ៃលិន ហើយលោកក៏បានរាយការណ៍ពាក់ព័ន្ធនឹងបញ្ហាឈើនេះទៅអភិបាលខេត្តរួចរាល់អស់ហើយ ។
សូមបញ្ជាក់ផងដែរថា កម្មករខ្មែរជាច្រើនដែលមកពីខេត្តប៉ៃលិន បាត់ដំបង ពោធិ៍សាត់ ព្រៃវែង ស្វាយរៀង តាកែវ និងខេត្តផ្សេងៗទៀត បានមកធ្វើជាកម្មករស៊ីឈ្នួលលីសែងឈើឱ្យឈ្មួញ ហើយក៏មានអ្នកខ្លះបាត់ខ្លួនរហូតមកអស់រយៈពេលជាច្រើនឆ្នាំហើយ មិនឃើញត្រឡប់ទៅស្រុកកំណើតវិញនោះទេ ដោយគេសង្ស័យថា ត្រូវទាហានថៃបាញ់សម្លាប់ចោលនៅក្នុងព្រៃ ឬត្រូវគេចាប់យកទៅដាក់គុកនៅប្រទេសគេ ឬយ៉ាងណានោះទេ ៕
ចែករំលែកព័តមាននេះ