ខេត្តត្បូងឃ្មុំ ៖ ភ្លៀងមួយមេធំបានបង្អុរធ្លាក់ធ្វើឱ្យដំបូលសាលាបឋមសិក្សាក្បាលសេះ របើកទាំងផ្ទាំង ព្រមទាំងខូចខាតសម្ភារការសិក្សាមួយចំនួន មានទីតាំងស្ថិតនៅឃុំគរ ស្រុកត្បូងឃ្មុំ ។ ជាមួយនោះ ធ្វើឲ្យសិស្សមិនអាចរៀនសូត្របានត្រូវពន្យារពេលមួយរយៈខ្លីសិន ។
![](https://kohsantepheapdaily.com.kh/wp-content/uploads/2022/09/6565451bcc5e49715c0f98e62d37efa6.jpg)
សូមបញ្ជាក់ផងដែរថា នៅព្រឹកថ្ងៃទី០៥ កញ្ញា ឆ្នាំ២០២២ វត្តមានរបស់ឯកឧត្ដមបណ្ឌិត ជាម ច័ន្ទសោភ័ណ អភិបាលខេត្ត អមដំណើរដោយសហការីជាច្រើននាក់ ព្រមទាំងស្ថាប័នជំនាញមន្ទីរចុះពិនិត្យជាបន្ទាន់ ដើម្បីឲ្យក្រុមជាងវាយតម្លៃ ។
![](https://kohsantepheapdaily.com.kh/wp-content/uploads/2022/09/12d1b5320ba8653c8953116dfb2d4810.jpg)
ឯកឧត្ដមបណ្ឌិត ជាម ច័ន្ទសោភ័ណ អភិបាលខេត្តបានសម្ដែងនូវការសោកស្ដាយជាខ្លាំង និងបានអំពាវនាវប្រជាពលរដ្ឋ ត្រូវបង្កើនការប្រុងប្រយ័ត្នចំពោះគ្រោះធម្មជាតិ ចំពោះហេតុការណ៍ ដែលបានបង្កឡើងដោយសារគ្រោះធម្មជាតិនេះ ហើយវាបណ្ដាលឲ្យប៉ើងរដំបូងសាលាជាហេតុធ្វើឱ្យរំខានដល់ការសិក្សារបស់ក្មួយៗ ។ ប៉ុន្តែ ជាសំណាងល្អ ដែលមិនមានបងប្អូនប្រជាពលរដ្ឋ និងក្មួយៗ ណាម្នាក់រងរបួសដោយគ្រោះធម្មជាតិនេះទេ ។
![](https://kohsantepheapdaily.com.kh/wp-content/uploads/2022/09/a0fe2fa5f358683e1b2c39df02aa5636.jpg)
លោកសេង សុខឿន អភិបាលស្រុកត្បូងឃ្មុំបញ្ជាក់ថា កាលពីល្ងាច ទី០៤ ខែកញ្ញា ឆ្នាំ២០២២ មានភ្លៀងមួយមេធំ លាយឡំជាមួយផ្គរ រន្ទះ និងខ្យល់កន្ត្រាក់ បានធ្វើឲ្យដំបូលសាលាបឋមសិក្សាក្បាលបឹងសេះ រងការខូចខាតយ៉ាងដំណំ អស់ដំបូលសាលា៥ខ្នង គិតជាប្រាក់អស់ប្រមាណជាង ១០០០០ដុល្លារ ។
![](https://kohsantepheapdaily.com.kh/wp-content/uploads/2022/09/f47e868355e8098a5e3b2ecc69239615.jpg)
ក្រោយមហន្តរាយនេះបានកើតឡើង ត្រូវបានថ្នាក់ដឹកនាំខេត្ត អញ្ជើញចុះមកពិនិត្យដោយផ្ទាល់តែម្ដង។ ជាមួយនោះក្រុមជាងបានសន្យាថា អាចប្រើពេលមួយសប្តាហ៍ដើម្បីជួសជុលដំបូលសិក្សានេះនិងរួចរាល់ជាស្ថាពរនិងវិញ។
![](https://kohsantepheapdaily.com.kh/wp-content/uploads/2022/09/31c68f1002324e018561f7e0f2a9ccf6.jpg)
សូមបញ្ជាក់ទៀតថា អគារសិក្សាដែលរងការខូចខាតដំបូលនេះត្រូវបានសាងសង់ឡើងក្នុងអំឡុងឆ្នាំ១៩៩៨ ដោយប្រើប្រាស់ថវិកាជាតិ ។ អភិបាលស្រុកត្បូងឃ្មុំបញ្ជាក់ថា ក្រោយពីដំបូលប៉ើងធ្វើឲ្យសៀវភៅរបស់គ្រូ ។នៅតាមបន្ទប់ថ្នាក់រៀននីមួយៗ ត្រូវខូចខាតសើមដោយទឹកភ្លៀងមិនអាចប្រើប្រាស់កើត ទោះជាយ៉ាងនេះក៏ដោយថ្នាក់ដឹកនាំខេត្តនិងប្រឹងប្រែងយកមកបំពេញជំនួសវិញដើម្បីឲ្យក្មួយៗបានសិក្សារៀនសូត្រ ។
ចែករំលែកព័តមាននេះ