ក្រុមហ៊ុនអាកាសចរណ៍ដំឡើងថ្លៃបន្ទាប់ពីមានការបង្កើនពន្ធសាំង
ប្រទេសថៃ ៖ អ្នកនាំពាក្យរបស់រដ្ឋាភិបាលបាននិយាយថា ក្រុមហ៊ុនអាកាសចរណ៍ក្នុងប្រទេសថៃកំពុងតែដំឡើងថ្លៃ ដើម្បីចំណាយលើសាំងដែលថ្លៃជាងមុនបន្ទាប់ពីពន្ធកើនឡើង។
ប្រទេសថៃ ៖ អ្នកនាំពាក្យរបស់រដ្ឋាភិបាលបាននិយាយថា ក្រុមហ៊ុនអាកាសចរណ៍ក្នុងប្រទេសថៃកំពុងតែដំឡើងថ្លៃ ដើម្បីចំណាយលើសាំងដែលថ្លៃជាងមុនបន្ទាប់ពីពន្ធកើនឡើង។
លោក Sansern Kaewkamnerd ឲ្យដឹងថា ក្រុមហ៊ុនអាកាសចរណ៍ចំនួន៤ នឹងដំឡើងថ្លៃធ្វើដំណើរក្នុងស្រុកប្រមាណ៤ដុល្លារ ។ ចំណែក Bangkok Airways ក៏ត្រូវបានគិតថា នឹងធ្វើតាមនេះដែរ ខណៈក្រុមហ៊ុន Thai Airways International និង Thai Smile កំពុងសិក្សាពីបញ្ហានេះ ។
លោកបន្តថា ការដំឡើងពន្ធលើសាំងយន្តហោះ ១,៩០០% ដែលបានធ្វើឲ្យក្រុមហ៊ុនអាកាសចរណ៍ភ្ញាក់ផ្អើលកាលពីសប្តាហ៍មុននេះ គឺមានគោលដៅធ្វើឲ្យប្រព័ន្ធពន្ធមានភាពយុត្តិធម៌ ។
លោកនិយាយថា ៖ « អ្នកធ្វើដំណើរតាមផ្លូវត្រូវបង់ពន្ធសាំង៥ ទៅ៦បាត (១៤ ទៅ១៧សេន) ក្នុង១លីត្រ ប៉ុន្តែក្រុមហ៊ុនអាកាសចរណ៍បង់មិនដល់១សេនផងក្នុង១លីត្រ អស់រយៈពេល២៤ឆ្នាំមកហើយ ។ ហេតុនេះ ការបង្កើនពន្ធលើសាំងយន្តហោះ នឹងកើនដល់៤បាត (១១សេន) ក្នុង១លីត្រ នាថ្ងៃទី២៥ មករា » ។
លោកបន្ថែមថា យោងតាមការិយាល័យពន្ធដារ ការដំឡើងថ្លៃធ្វើដំណើរមិនគួរឡើងដល់៤ដុល្លារទេ គឺគួរនៅត្រឹម១,៥០ដុល្លារប៉ុណ្ណោះ ។
ប៉ុន្តែក្រុមហ៊ុនអាកាសចរណ៍ទាំងនោះអះអាងថា ពួកគេសម្រេចយកចំនួននេះ ព្រោះពួកគេបានយកចំនួនសាំងដែលប្រើប្រាស់ក្នុង១ឆ្នាំ ដោយគិតទាំងពន្ធ ទៅចែកនឹងចំនួនអ្នកដំណើរក្នុងឆ្នាំតែមួយ ។
អ្នកនាំពាក្យម្នាក់នេះក៏បានបដិសេធនឹងអ្នករិះគន់មួយចំនួនដែលនិយាយថា រដ្ឋាភិបាលត្រូវការប្រាក់ចំណូលបន្ថែមផងដែរ ។
លោកបញ្ជាក់ថា រដ្ឋាភិបាលមិនមែនគ្មានប្រាក់ទេ ហើយការដំឡើងពន្ធសាំងយន្តហោះនេះ ក៏មិនទាក់ទិននឹងការជួយដល់ជនក្រីក្រដែរ ៕
ចែករំលែកព័តមាននេះ