ប្រទេសថៃ ៖ ការនាំចេញផ្នែកកសិកម្មរបស់ថៃ អាចនឹងបាត់បង់ចំណែកទីផ្សារទៅឲ្យប្រទេស (CLMV) ដូចជា កម្ពុជា ឡាវ មីយ៉ាន់ម៉ា និងវៀតណាម ដែលស្ថិតនៅក្រោមសហគមន៍សេដ្ឋកិច្ចអាស៊ាន បើទោះជា
ប្រទេសថៃ ៖ ការនាំចេញផ្នែកកសិកម្មរបស់ថៃ អាចនឹងបាត់បង់ចំណែកទីផ្សារទៅឲ្យប្រទេស (CLMV) ដូចជា កម្ពុជា ឡាវ មីយ៉ាន់ម៉ា និងវៀតណាម ដែលស្ថិតនៅក្រោមសហគមន៍សេដ្ឋកិច្ចអាស៊ាន បើទោះជាការនាំចេញទាំងនេះទៅប្រទេសអាស៊ានបានកើនឡើងនៅឆ្នាំនេះក្តី ។ នេះបើតាមការសិក្សាដោយសាកលវិទ្យាល័យសភាពាណិជ្ជកម្មថៃ ។
នៅឆ្នាំដំបូង បន្ទាប់ពីសហគមន៍សេដ្ឋកិច្ចអាស៊ានចូលជាធរមាននៅថ្ងៃទី៣១ ខែធ្នូ ឆ្នាំ២០១៥ ការនាំចេញផ្នែកកសិកម្មរបស់ថៃ ទៅកាន់ប្រទេសអាស៊ាន៩ផ្សេងទៀតបានកើនឡើង១០,៤% ឬស្មើ៣២១,៥៤ប៊ីលានបាត ។ តម្លៃនាំចេញមធ្យមចាប់ពីឆ្នាំ២០១០-២០១៤ ស្មើ២៦១,៤៥ប៊ីលានបាត ។
លោក Aat Pisanwanich នាយកមជ្ឈមណ្ឌលពាណិជ្ជកម្មអន្តរជាតិ UTCC ថ្លែងថា ៖ « ការនាំចេញផ្នែកកសិកម្មរបស់ថៃទៅកាន់បណ្តាប្រទេសអាស៊ានបានកើនឡើងជាបន្តបន្ទាប់កាលពីឆ្នាំមុន និងមានភាពរលូន » ។
ទោះជាយ៉ាងណា ការនាំចេញទៅកាន់ប្រទេស CLMV នឹងធ្លាក់ចុះ ដោយសារបណ្តាប្រទេសទាំងនេះមានសក្តានុពលខ្លាំងក្នុងការដាំដុះ។ ដើម្បីទទួលបានប្រយោជន៍ពីការកើនឡើងនៃផលិតកម្មកសិកម្មនៅ CLMV ថៃត្រូវពង្រីកការវិនិយោគរបស់ខ្លួនចូលទៅក្នុងកសិកម្មកែច្នៃរបស់ប្រទេសទាំងនោះ ដើម្បីនាំចេញទៅកាន់បណ្តាប្រទេសអាស៊ានផ្សេងទៀត និងទីផ្សារពិភពលោក ។
តាមការស្ទង់មតិរបស់ UTCC លើក្រុមហ៊ុននាំចេញផ្នែកកសិកម្មស្រស់ និងកែច្នៃទាំង១.០០០ក្រុមហ៊ុន គឺ៥៩,២%នៃអ្នកឆ្លើយសំណួរនិយាយថា ពួកគេអាចទទួលបានអត្ថប្រយោជន៍ពីសហគមន៍សេដ្ឋកិច្ចអាស៊ាន ។
អ្នកឆ្លើយសំណួរព្យាករថា ប្រទេសថៃនឹងនាំចេញផ្នែកកសិកម្មទៅកាន់ទីផ្សារអាស៊ានកាន់តែច្រើនឡើង គឺជាមធ្យម១៥%ក្នុង១ឆ្នាំ ហើយគេរំពឹងថា នឹងស្មើ៣៦៩,៧៨ប៊ីលានបាត ។ ទោះជាយ៉ាងណា ក្រុមហ៊ុននាំចេញអង្ករ ស្វាយ និងដំឡូងមី ឲ្យដឹងថា ពួកគេមិនទទួលបានប្រយោជន៍ពីសហគមន៍សេដ្ឋកិច្ចអាស៊ានទេ ។
មូលហេតុដែលក្រុមហ៊ុននាំចេញជាច្រើនអាចទទួលផលប្រយោជន៍ពីសហគមន៍សេដ្ឋកិច្ចអាស៊ាន ដោយសារពន្ធនាំចូលមានតម្លៃទាប និងកិច្ចសម្រួលពាណិជ្ជកម្មល្អប្រសើរជាងមុន ខណៈអាស៊ានមានទីផ្សារនាំចេញដ៏មានសក្តានុពលខ្ពស់ជាមួយប្រព័ន្ធដឹកជញ្ជូនអភិវឌ្ឍន៍ល្អផងដែរ ។
ទោះជាយ៉ាងណា ក្រុមហ៊ុននាំចេញដែលមិនបានទទួលប្រយោជន៍ពីសហគមន៍សេដ្ឋកិច្ចអាស៊ាន បានស្តីបន្ទោសរនាំងមិនយកពន្ធនាំចូលដែលមានភាពស្មុគស្មាញ ការចំណាយលើការផលិតខ្ពស់នៅថៃ បើធៀបនឹងប្រទេសអាស៊ានផ្សេងទៀត ហើយអាស៊ានមិនមែនជាទីផ្សារនាំចេញសំខាន់សម្រាប់ផលិតផលរបស់ខ្លួនទេ ។
លោក Aat បន្ថែមថា ទំនិញកសិកម្មថៃដែលនឹងបាត់បង់ឱកាសក្នុងតំបន់អាស៊ានរួមមាន អង្ករ កៅស៊ូ កាហ្វេ ដំឡូងមី ដូង និងស្វាយ។ ចំណែកផលិតផលនឹងទទួលបានប្រយោជន៍ពីអាស៊ាន ជាមួយការនាំចេញខ្ពស់រួមមាន ពោត សណ្តែក ចេក ផលិតផលបសុសត្វ និងអាហារសមុទ្រ ៕
ចែករំលែកព័តមាននេះ