ខេត្តបាត់ដំបង ៖ ដូចជាហួសហេតុពេកហើយ ដែលអាជ្ញាធរសមត្ថកិច្ច និងស្ថាប័នជំនាញនៅស្រុកភ្នំព្រឹក លែងខ្វល់ខ្វាយអំពីសុខភាពប្រជាពលរដ្ឋ រហូតបណ្ដែត បណ្ដោយឱ្យក្រុមហ៊ុនផលិតទឹកសុទ្ធដ៏ធំមួយ ប្រើប្រាស់បរិវេណស្ថានីយប្រេងមួយកន្លែង ជាទីតាំងសម្រាប់ច្រកទឹកសុទ្ធលក់ជាង១០ឆ្នាំកន្លងទៅនេះ ដោយគ្មានការបិទបាំង ឬមានបន្ទប់ត្រឹមត្រូវតាមលក្ខណ:បច្ចេកទេស ដែលមើលទៅការបូមទឹកសុទ្ធច្រកប៊ីដុងលក់នៅកណ្ដាលវាលនេះ ហាក់ដូចនឹងការបូមប្រេងសាំងលក់នៅក្នុងស្ថានីយប្រេងដូច្នេះដែរគួរឱ្យខ្ពើមណាស់ ។
បើតាមការពិនិត្យលើស្លាកប្លាស្ទិចដែលបិទលើប៊ីដុងទឹកសុទ្ធបានបង្ហាញយីហោ «ហ្គោដិនស៊ី»។ ទីតាំងផលិតទឹក ឬកន្លែងច្រកទឹកសុទ្ធគឺធ្វើឡើងនៅក្នុងបរិវេណស្ថានីយប្រេងឥន្ធន: ជាប់នឹងម៉ាស៊ីនបូមប្រេងចាក់យានយន្តតែម្ដង ដែលស្ថិតត្រង់ផ្លូវបែកជា៤ ក្នុងភូមិភ្នំតូច ឃុំពេជ្រចិន្តា ស្រុកភ្នំព្រឹក។ បើតាមកម្មករបូមសាំងលក់បានប្រាប់ថា ថៅកែទឹកសុទ្ធ «ហ្គោលដិនស៊ី» និងថៅកែស្ថានីយប្រេងនេះឈ្មោះឡេង ស្រ៊ុន។ គេមិនឃើញមានបន្ទប់សម្រាប់ច្រកទឹកសុទ្ធទេ តែគេឃើញមានទុយោជ័របំពាក់តាមជញ្ជាំងរបងថ្ម បន្តមកពីខាងក្រោយស្ថានីយប្រេងដែលគេមិនដឹងបង្ហូរចេញពីប្រភពណាឡើយគ្រាន់តែឃើញខ្ពើម ។
នៅទីនោះមានកម្មករប៉ុន្មាននាក់ប៉ុណ្ណោះ ដូចកម្មករលាយស៊ីម៉ង់ដ៏បានអូសទុយោបង្ហូរទឹកច្រកចូលប៊ីដុងតូច-ធំដែលតំរៀបផ្ទាល់នៅលើដីផង និងតំរៀបនៅលើរថយន្តជាស្រេចផង ។ អ្នកធ្វើដំណើរនៅលើផ្លូវជាតិ និងម្ចាស់យានយន្តនានា ដែលចូលចាក់ប្រេងនៅក្នុងស្ថានីយរបស់លោក ឡេង ស្រ៊ុន នេះ នឹងបានឃើញយ៉ាងច្បាស់ពីសកម្មភាពកម្មករបូមទឹកសុទ្ធច្រកប៊ីដុងនេះ ។ ព្រោះកន្លែងបូមទឹកច្រកធុង និងកន្លែងម៉ាស៊ីនបូមប្រេងចាក់យានយន្តគឺនៅក្បែរគ្នា ដូច្នេះគ្មានអ្វីដែលលាក់កំបាំងនោះទេ ។
បើពិនិត្យលើការផលិតទឹកសុទ្ធ និងសកម្មភាពច្រកទឹកសុទ្ធចូលប៊ីដុងឬដបរបស់ក្រុមហ៊ុន ហ្គោលដិនស៊ី នេះហាក់ធ្វើឡើងមិនស្របតាមលក្ខណ:បច្ចេកទេសត្រឹមត្រូវទេ និងគ្មានអនាម័យទៀតផង ។
មន្ត្រីមួយចំនួននៅស្រុកភ្នំព្រឹកក៏ដូចជាប្រជាពលរដ្ឋ បាននិយាយថា ជាង១០ឆ្នាំហើយដែលម្ចាស់ស្ថានីយប្រេងនេះច្រកទឹកសុទ្ធកណ្ដាលវាលក្នុងបរិវេណស្ថានីយប្រេងបែបនេះ លក់ចែកចាយលើទីផ្សារឱ្យពលរដ្ឋរស់នៅតាមតំបន់ព្រំដែនទិញយកទៅប្រើប្រាស់ ។ រីឯអាជ្ញាធរ ឬមន្ត្រីជំនាញហាក់មើលមិនឃើញអំពីកំហុសឆ្គងរបស់ក្រុមហ៊ុនផលិតទឹកសុទ្ធនេះឡើយ ។ មិនតែប៉ុណ្ណោះគេក៏មិនដែលឃើញមានមន្ត្រី ឬស្ថាប័នណាបើកភ្នែកមើល ឬចុះត្រួតពិនិត្យម្ដងណាដែរ។ បើទោះជាមន្ត្រីទាំងនោះបើកយានយន្តចូលទៅចាក់ប្រេងនៅក្នុងស្ថានីយប្រេងថៅកែឡេង ស្រ៊ុន ឡើងសឹកកង់ក្ដី ក៏មិនយកភ្នែកមើលដែរ ។ រហូតមកដល់ពេលនេះគឺលោកថៅកែស្រ៊ុន កើបលុយពីទឹកសុទ្ធគ្មានអនាម័យនេះជាង១០ឆ្នាំហើយដោយរលូន ។
ជាក់ស្ដែងកាលពីព្រឹកថ្ងៃទី៥ កុម្ភ: គេឃើញក្រុមកម្មករបានអូសទុយោបូមទឹកសុទ្ធច្រកក្នុងប៊ីដុងទឹកសុទ្ធផង ហើយបូមដាក់ចូលក្នុងស៊ីទែនធំដែលដាក់លើរថយន្តផង ។ ជាមួយនឹងសកម្មភាពដ៏ស្មោគគ្រោកនេះ ស្ត្រីម្នាក់ដែលមើលការខុសត្រូវនៅទីនោះបាននិយាយប្រាប់កោះសន្តិភាពប៉ុន្មានមាត់ថា ទឹកសុទ្ធរបស់គាត់មានម៉ាស៊ីនចម្រោះត្រឹមត្រូវ តែគាត់មិនបានបង្ហាញម៉ាស៊ីននោះឱ្យឃើញទេ ។
កោះសន្តិភាពមិនអាចទំនាក់ទំនងលោកឡេង ស្រ៊ុន ដែលគេអះអាងថា ជាថៅកែទឹកសុទ្ធនិងថៅកែប្រេងនេះ ដើម្បីបំភ្លឺបន្ថែមបានទេនៅព្រឹកថ្ងៃទី៦ កុម្ភ: ។
ប៉ុន្តែកាលពីព្រឹកថ្ងៃទី៥ កុម្ភ: លោកឡេង ស្រ៊ុន បានពន្យល់ប្រាប់តាមរយៈទូរស័ព្ទកម្មករទឹកសុទ្ធរបស់លោកម្នាក់ថា មុខរបរលក់ទឹកសុទ្ធនេះ គឺលោកជាអ្នកធ្វើមុនគេច្រើនឆ្នាំហើយ ដូច្នេះលោកដឹងច្បាស់ណាស់អំពីបញ្ហានេះ ។ ប៉ុន្តែលោកថៅកែស្រ៊ុន បែរជានិយាយថា ពេលនេះលោកគ្រាន់តែច្រកទឹកបណ្ដោះអាសន្ននៅទីតាំងខាងលើតែប៉ុណ្ណោះ ព្រោះលោករៀបចំទីតាំងថ្មីមិនទាន់រួច ហើយក៏កំពុងរៀបចំបន្ទប់សម្រាប់ច្រកទឹកឱ្យបានត្រឹមត្រូវដែរ ។
ជុំវិញបញ្ហានេះប្រធានមន្ទីរឧស្សាហកម្ម និងសិប្បកម្ម លោកសំបូរ ផូ បានបំភ្លឺប្រាប់កោះសន្តិភាពតាមទូរស័ព្ទនៅព្រឹកថ្ងៃទី៦ កុម្ភ:ថា ការផលិតទឹកសុទ្ធគ្មានអនាម័យរបស់លោកឡេង ស្រ៊ុន នៅស្រុកភ្នំព្រឹកខាងលើនេះ គឺកន្លងមកលោកបានឱ្យមន្ត្រីជំនាញចុះទៅណែនាំច្រើនលើកហើយ តែក្រុមហ៊ុននេះនៅតែមិនព្រមធ្វើតាមការណែនាំទេ ។
ប៉ុន្តែលោកសំបូរ ផូ បានបញ្ជាក់ដដែលៗថា លោកនឹងចាត់ឱ្យមន្ត្រីចុះទៅពិនិត្យជាថ្មីទៀត ហើយនឹងកោះហៅមន្ត្រីតាមការិយាល័យដែលអសកម្មមកប្រជុំនាពេលខាងមុខនេះ ថែមទាំងកោះហៅម្ចាស់អាជីវកម្មទឹកសុទ្ធខាងលើនេះមកសួរនាំទៀតផង ។
សូមបញ្ជាក់ថា កន្លងមកនេះមានការបែកធ្លាយមិនឈប់ឈរនូវរឿងរ៉ាវដែលពាក់ព័ន្ធនឹងការធ្វើអាជីវកម្ម សិប្បកម្មផលិតចំណីអាហារ និងទឹកបរិសុទ្ធគ្មានអនាម័យ និងមិនត្រឹមត្រូវតាមលក្ខណ:បច្ចេកទេស ។ ជាក់ស្តែងកាលពីអំឡុងមុនថ្ងៃចូលឆ្នាំចិនកន្លងទៅថ្នីៗនេះ ហាងធ្វើនំដ៏ល្បីមួយនៅក្នុងក្រុងបាត់ដំបង យីហោ «ឡុចតង»បានផ្ទុះនូវរឿងអាស្រូវមួយបង្កចលាចលពេញខេត្ត ដោយសារតែធ្វើនំប៉័ងដាក់ស្នូលក្បាលខ្សែស្បែកជើងផ្ទាត់ តែលើកនេះធ្លាយរឿងក្រុមហ៊ុនផលិតទឹកសុទ្ធយីហោ«ហ្គោលដិនស៊ី» នៅស្រុកភ្នំព្រឹកម្ដង ដែលបូមទឹកសុទ្ធច្រកចូលធុង ចូលស៊ីទែនលក់នៅកណ្ដាលវាលក្បែរម៉ាស៊ីនបូមប្រេងសាំងក្នុងស្ថានីយប្រេង ចាក់យានយន្ត ដោយគ្មានបន្ទប់បិទបាំង និងគ្មានអនាម័យ ។
ការធ្វើអាជីវកម្មបែបស្មោគគ្រោករបស់ឈ្មួញមួយចំនួនតាមតែអំពើចិត្ត ហើយអាចដំណើរការយ៉ាងរលូនមកដល់ពេលនេះ គឺដោយសារតែភាពអសកម្មរបស់អាជ្ញាធរ និងមន្ត្រីជំនាញស្ពឹកស្រពន់ ឬត្រូវថ្នាំសណ្តំ ។ ជាពិសេសមន្ត្រីនៃមន្ទីរឧស្សហកម្ម និងសិប្បកម្មខេត្តនេះតែម្ដង ដែលមើលទៅហាក់មានសកម្មភាពស្ពឹកស្រពន់មិនកម្រើកទាល់តែសោះ ជាមួយនឹងភារកិច្ចរបស់ខ្លួន ។ សូម្បីតែកន្លែងសិប្បកម្មផលិតទឹកសុទ្ធគ្មានអនាម័យដែលធ្វើឡើងនៅកណ្ដាលវាលសោះ ឈ្មួញកើបលុយធ្វើមានបានអស់រយៈពេលជាង១០ឆ្នាំកន្លងមកហើយក៏លោកមន្ត្រីមើលមិនឃើញដែរ..! ចំណែក មន្ត្រីកាំកុងត្រូល តើពេលនេះនៅឯណា ?
តើមន្ត្រីបែបនេះគួរទុកឱ្យនៅពូនសម្ងំបំផ្លាញប្រាក់ខែរដ្ឋ និងបំផ្លាញសុខភាពពលរដ្ឋដល់ពេលណាទៀត ទើបស្កប់ស្កល់.? ៕
ចែករំលែកព័តមាននេះ