អាជ្ញាធរចុះពិនិត្យមើលស្ថានភាពទឹកស្ទឹងសិរីសោភ័ណ ខណៈទឹកកំពុងតែហក់ឡើងរាល់ថ្ងៃ
- បន្ទាយមានជ័យ
អាជ្ញាធរក្រុងសិរីសោភ័ណ បានចុះពិនិត្យមើលស្ថានភាពទឹកស្ទឹងសិរីសោភ័ណ ខណៈពេលទឹកកំពុងហក់ឡើងជារៀងរាល់ថ្ងៃ តែមិនទាន់ដល់កម្រិត
អាជ្ញាធរក្រុងសិរីសោភ័ណ បានចុះពិនិត្យមើលស្ថានភាពទឹកស្ទឹងសិរីសោភ័ណ ខណៈពេលទឹកកំពុងហក់ឡើងជារៀងរាល់ថ្ងៃ តែមិនទាន់ដល់កម្រិត
ខេត្តបន្ទាយមានជ័យ ៖ អាជ្ញាធរក្រុងសិរីសោភ័ណ បានចុះពិនិត្យមើលស្ថានភាពទឹកស្ទឹងសិរីសោភ័ណ ខណៈពេលទឹកកំពុងហក់ឡើងជារៀងរាល់ថ្ងៃ តែមិនទាន់ដល់កម្រិតប្រកាសអាសន្ននៅឡើយទេ កាលពីថ្ងៃទី០៣ ខែកញ្ញា ឆ្នាំ២០២២ នៅក្រុងសិរីសោភ័ណ។
លោក ស្រេង សុផល អភិបាលក្រុងសិរីសោភ័ណ បានប្រាប់ថា នៅដងស្ទឹងសិរីសោភ័ណ ទឹកស្ទឹងកំពុងតែហក់ឡើងរាល់ថ្ងៃ ខណៈនៅពេលដែលទឹកជំនន់បានហូរពីផ្នែកខាងលើ តាមដងស្ទឹងមង្គលបូរី ដែលបើកហូកធ្លាក់ចូលដងស្ទឹងសិរីសោភ័ណ តែកម្រិតឡើងរាល់ថ្ងៃនេះ មិនទាន់ដល់កម្រិតប្រកាសអាសន្ននៅឡើយទេ។
លោកបានបញ្ជាក់ថា នៅពេលដែលទឹកស្ទឹងសិរីសោភ័ណ ហក់ឡើងរាល់ថ្ងៃ តែមិនទាន់ប៉ះពាល់ដល់ផ្ទះសម្បែងរបស់ប្រជាពលរដ្ឋ និងដំណាំកសិកម្មនោះទេ ប៉ុន្តែបងប្អូនប្រជាពលរដ្ឋត្រូវតែមានការប្រុងប្រយ័ត្នចំពោះកន្លែទឹកខ្លាំង និងជ្រៅ ហើយអ្នកដែលមិនចេះហែល និងក្មេងតូចៗ ត្រូវតែមានការប្រុងប្រយ័ត្នខ្ពស់ កុំមិនបណ្ដែតបណ្តោយឱ្យសោះ ព្រោះថា គ្រប់ពេលវេលាទឹកជំនន់អាចនឹងហក់ឡើង។
លោក ឡាយ សុធី អនុប្រធានមន្ទីរធនធានទឹក និងឧតុនិយមខេត្តបន្ទាយមានជ័យ បានប្រាប់នៅថ្ងៃទី០៤ ខែកញ្ញា ឆ្នាំ២០២២ថា ស្ថានភាពទឹកនៅខេត្តបន្ទាយមានជ័យ តាមដងស្ទឹង អូរ បឹងបួរ កំពុងតែហក់ឡើងខ្លាំង ដូចជា ៖ ដងស្ទឹងមង្គលបូរី ចំណុចខាងលើសំណង់ពោធិ៍ពីរដើម ឃុំរហាត់ទឹក កម្រិតទឹកជាង៨ម៉ែត្រ (ដែលត្រូវប្រកាសអាសន្ន៨ម៉ែត្រកន្លះ), ដងស្ទឹងព្រះពន្លា ក្រុងសិរីសោភ័ណ កម្រិតទឹក៦,៥៤ម៉ែត្រ (ប្រកាសអាសន្នកម្រិតទឹក៧ម៉ែត្រ), អូរព្រំដែនក្រុងប៉ោយប៉ែត ទឹកស្រក៧ហ៊ុន, ដងស្ទឹងព្រំប្រទល់ស្រុកភ្នំស្រុក និងស្រុកក្រឡាញ់ កម្រិតទឹក១៣,៥៨ម៉ែត្រ (ប្រកាសអាសន្ន១៤,៣០ម៉ែត្រ), អាងត្រពាំងថ្ម ស្រុកភ្នំស្រុក កម្រិតទឹក១,៧០ម៉ែត្រ ហើយទឹកនៅតែបន្តឡើង តែរហូតដល់ពេលនេះ ទឹកទឹកជំនន់មិនទាន់លិចលង់ផ្ទះសម្បែងរបស់ប្រជាពលរដ្ឋនៅឡើយទេ តែទឹកក៏បានជន់លិចស្រូវរបស់ប្រជាកសិករឃុំសឿង ឃុំចំណោម ឃុំរហាត់ទឹក និងឃុំអូរប្រាសាទ នៅស្រុកមង្គលបូរី៕
ចែករំលែកព័តមាននេះ