ប្រទេសថៃ ៖ ឧបនាយករដ្ឋមន្ត្រីថៃ លោក Somkid Jatusripitak នឹងដឹកនាំក្រុមអាជីវកម្មថៃជួបជាមួយមន្ត្រី និងអាជីវករមីយ៉ាន់ម៉ា ដើម្បីបន្តសហការគ្នាក្នុងការអភិវឌ្ឍវិស័យឧស្សាហកម្ម និងដំណើរការពាណិជ្ជកម្មឆ្លងដែន នាថ្ងៃទី៣ និង៤ កុម្ភៈនេះ ។
រដ្ឋមន្ត្រីឧស្សាហកម្ម លោក Uttama Savanayana ថ្លែងថា ៖ « ក្រុមអាជីវករថៃ រួមមាន ក្រុមហ៊ុន PTT Plc, Siam Cement Group និង Ch. Kanchang Plc នឹងចូលរួមការជួបជុំជាមួយក្រុមមន្ត្រីមីយ៉ាន់ម៉ា រួមមាន អ្នកប្រឹក្សារបស់លោកស្រី Aung San Suu Kyi ជាទីប្រឹក្សារដ្ឋាភិបាលផងដែរ » ។
លោក Uttama បន្តថា ប្រធានអាជ្ញាធរតំបន់ឧស្សាហកម្មប្រទេសថៃ (IEAT) នឹងចូលរួមដំណើរទស្សនកិច្ចនេះ ដើម្បីស្វែងរកផ្លូវអភិវឌ្ឍន៍តំបន់ថ្មីនៅមីយ៉ាន់ម៉ា ។
លោកបន្ថែមថា សេដ្ឋកិច្ចមីយ៉ាន់ម៉ាកំពុងតែឈានចូលក្នុងរយៈកាលថ្មីមួយ ដោយមានវិស័យឧស្សាហកម្មដើរតួនាទីយ៉ាងសំខាន់ក្នុងការជំរុញការលូតលាស់ ហើយប្រទេសនេះត្រូវការជំនាញពីប្រទេសថៃ ដើម្បីធ្វើឲ្យវិស័យនេះកាន់តែប្រសើរឡើង ។
សហព័ន្ធឧស្សាហកម្មថៃ និងគណៈ-កម្មាធិការពាណិជ្ជកម្ម ឧស្សាហកម្ម និងធនាគារកិច្ចអចិន្ត្រៃយ៍រួម (JSCCIB) នឹងចូលរួមផងដែរ ដោយជួបជាមួយអាជីវករមីយ៉ាន់ម៉ា ដើម្បីបង្កើតការសហការផ្នែកសេដ្ឋកិច្ច និងទំនាក់ទំនងអាជីវកម្ម ដែលនឹងនាំទៅរកការបង្កើនការវិនិយោគនាថ្ងៃអនាគត ៕
ចែករំលែកព័តមាននេះ