នាយកដ្ឋាននគរបាលព្រហ្មទណ្ឌក្រសួងមហាផ្ទៃ បានធ្វើការឃាត់ខ្លួនជនជាតិកូដូវ័រម្នាក់ និងស្ត្រីខ្មែរម្នាក់កសាងសំណុំរឿងបញ្ជូនទៅសាលាដំបូងរាជធានីភ្នំពេញ ពាក់ព័ន្ធករណីប្រើល្បិចឆបោ.កប្រាក់ចំនួន
រាជធានីភ្នំពេញ ៖ នាយកដ្ឋាននគរបាលព្រហ្មទណ្ឌក្រសួងមហាផ្ទៃ បានធ្វើការឃាត់ខ្លួនជនជាតិកូដូវ័រម្នាក់ និងស្ត្រីខ្មែរម្នាក់កសាងសំណុំរឿងបញ្ជូនទៅសាលាដំបូងរាជធានីភ្នំពេញ ពាក់ព័ន្ធករណីប្រើល្បិចឆបោ.កប្រាក់ចំនួន ១៧ ៥០០ ដុល្លារអាមេរិក ពីជនរងគ្រោះនៅក្នុងស្រុកខ្មែរ តាមរូបភាពធ្វើជាមនុស្សចិត្តធម៌ផ្ញើទ្រព្យមកពីប្រទេសអ៊ុយក្រែន ។
ជនសង្ស័យទាំង២នាក់ខាងលើនេះ ម្នាក់ឈ្មោះ N’CHO MARCEL ភេទប្រុស ជនជាតិកូដូវ័រ និងម្នាក់ទៀតមានឈ្មោះ ដូង ធារី ភេទស្រី ជាជនជាតិខ្មែរ ។
អង្គហេតុពីការចាប់ខ្លួនជនឆបោ.កទាំង២នាក់ខាងលើនេះ ត្រូវបានសមត្ថកិច្ចឲ្យដឹងថា កាលពីអំឡុងខែសីហា ឆ្នាំ២០២២ មានគណនីហ្វេសប៊ុកមួយឈ្មោះ PARIMAL បានប្រាប់ថា ខ្លួនជាប់នៅប្រទេសអ៊ុយក្រែន ហើយត្រូវការផ្ញើប្រាក់មកទុកនៅស្រុកខ្មែរ ដើម្បីរកមនុស្សចិត្តល្អជួយរក្សាទុក ។ ទើបត្រូវបានប្រកាសឲ្យឈ្មោះ PARIMAL ធ្វើការជ្រើសរើសយកជនរងគ្រោះឈ្មោះ ឯក ពិសិដ្ឋ ភេទប្រុស រស់នៅសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ដើម្បីទទួលយកទ្រព្យនោះ ។
បន្ទាប់មកក្រុមគេបានប្រើល្បិចរៀបចំឲ្យស្ត្រីខ្មែរម្នាក់ (ជនសង្ស័យ) ដើរតួធ្វើជាមន្ត្រីគយ ដើម្បីទាក់ទងទៅជនរងគ្រោះថា គេបានឃាត់ប្រាក់ខាងលើនោះរួចហើយ ដូច្នោះទាល់តែបង់ប្រាក់ពិន័យចំនួន១៧ ៥០០ ដុល្លារអាមេរិក តាមរយៈវីងទើបអាចទទួលបានកញ្ចប់ប្រាក់ដែលមនុស្សចិត្តធម៌ផ្ញើពីប្រទេសអ៊ុយក្រែនមកនោះ ។ ដោយគំនិតឆោតល្ងង់លោភលន់ចង់បានប្រាក់ ដែលមិនបញ្ចេញកម្លាំងពលកម្ម ជនងគ្រោះក៏ចាញ់ល្បិចកលទុច្ចរិតរបស់ក្រុមជនឆបោ.ក ទើបនៅថ្ងៃទី២៩ ខែសីហា ឆ្នាំ២០២២ បានផ្ញើប្រាក់ជាបន្តបន្ទាប់សរុបអស់ ៩ ១២០ ដុល្លារអាមេរិកទៅពួកគេតែម្តង ។ ប៉ុន្តែនៅពេលផ្ញើប្រាក់រួចហើយ ជនរងគ្រោះទាក់ទងទៅជនសង្ស័យលែងបាន ចំណែកគណនីហ្វេសប៊ុកឈ្មោះ PARIMAL ក៏ត្រូវគេបិទចោលទៀត ក្រោយមកជនរងគ្រោះទើបភ្ញាក់ខ្លួនដឹងថា «ចាញ់បោ.កគេហើយ» ប៉ុន្តែមិនដឹងទៅប្តឹងអ្នកណាឡើយ ។
លុះនៅថ្ងៃទី៣០ ខែសីហា ឆ្នាំ២០២២ ស្រាប់តែឈ្មោះ PARIMAL បានទាក់ទងមកជនរងគ្រោះម្តងទៀត ហើយតម្រូវឲ្យផ្ញើប្រាក់បន្ថែមចំនួន ៥ ០០០ ដុល្លារ ដើម្បីទទួលបានកញ្ចប់ប្រាក់នោះ ។ តែម្តងនេះ មុនពេលផ្ញើប្រាក់ឲ្យទៅក្រុមជនសង្ស័យ ជនរងគ្រោះក៏បានរាយការ ណ៍ប្រាប់សមត្ថកិច្ចនាយកដ្ឋាននគរបាលព្រហ្មទណ្ឌក្រសួងមហាផ្ទៃ ដើម្បីឲ្យជួយអន្តរាគមន៍កុំឲ្យចាញ់ល្បិចដដែលនេះម្តងទៀត ។ ហើយខណៈពេលជនសង្ស័យបាននិងកំពុងចូលទៅដកប្រាក់ពីទីតាំងវីងមួយកន្លែង ស្ថិតនៅសង្កាត់វាលវង់ ខណ្ឌ៧មករា រាជធានីភ្នំពេញនោះ ក៏ត្រូវសមត្ថកិច្ចចាប់ខ្លួនជនសង្ស័យទាំង២នាក់នោះតែម្តងទៅ ។
ហើយក្នុងការឃាត់ខ្លួននេះ សមត្ថកិច្ចក៏បានធ្វើការដកហូតសម្ភារៈរួមមាន ៖ ប្រាក់ចំនួន៥ ៨០០ ដុល្លារអាមេរិក (ប្រាក់ជនរងគ្រោះ), .ទូរស័ព្ទចំនួន៤គ្រឿង (អិនចុចពិល២គ្រឿង និងស្មាតហ្វូន២គ្រឿង) ។ លោហៈធាតុពណ៌លឿង (ខ្សែដៃ ១ខ្សែ), ខ្សែ.ក ១ខ្សែ, ស៊ីមកាតមួយចំនួន, លិខិតឆ្លងដែន១ក្បាល និងសៀវភៅលេខទូរស័ព្ទរបស់ជនរងគ្រោះ១ក្បាល ។
ក្រោយពេលឃាត់ខ្លួននៅចំពោះមុខសមត្ថកិច្ច ជនសង្ស័យបានឆ្លើយសារភាពថា ឈ្មោះ ASIA ភេទប្រុស ជនជាតិវ៉េណេស៊ុយអេទ្បា រស់នៅក្រៅប្រទេស បានទំនាក់ទំនងទៅជនរងគ្រោះតាមរយៈហ្វេសប៊ុក និងសុំលេខពីជនរងគ្រោះថា «ខ្លួនចង់ផ្ញើអីវ៉ាន់ ឬប្រាក់ជាច្រើនទៅប្រទេសកម្ពុជា» ដោយឲ្យជនរងគ្រោះជាអ្នកទទួលអីវ៉ាន់ ឬប្រាក់បញ្ញើនោះ ។ បន្ទាប់មកឈ្មោះ ASIA បានផ្ញើលេខទូរស័ព្ទរបស់ជនរងគ្រោះឲ្យទៅឈ្មោះ N’ CHO MARCEL ហើយឲ្យស្ត្រីខ្មែរម្នាក់ ដើរតួធ្វើជាមន្ត្រីគយ រួចបង្គាប់ឲ្យជនរងគ្រោះផ្ញើប្រាក់បង់ពន្ធ ដើម្បីយកទំនិញនោះចេញ ។ ទីបំផុតសុទ្ធតែជាល្បិចឆបោ.ក ទើបជនសង្ស័យត្រូវបាននាយកដ្ឋាននគរបាលព្រហ្មទណ្ឌ កសាងសំណុំរឿងបញ្ជូនទៅសាលាដំបូងរាជធានីភ្នំពេញបន្តនីតិវិធី ៕
ចែករំលែកព័តមាននេះ