ខេត្តសៀមរាប៖ ចាប់តាំងពីម៉ោង ៦ល្ងាច ថ្ងៃទី៣០ ខែសីហា ឆ្នាំ២០២២ កងកម្លាំងប្រដាប់អាវុធជាច្រើននាក់ មានទាំងប៉ូលិស និងទាំងប៉េអឹម បានចេញទៅដល់មុខចំការម្រេចរបស់លោក ខឹម វាសនា ប្រធានគណបក្សសម្ព័ន្ធ ដើម្បីប្រជាធិបតេយ្យ នៅជើងភ្នំគូលែន ក្នុងស្រុកបន្ទាយស្រី ខេត្តសៀមរាប។ កងកម្លាំងពិសេសជាច្រើនទៀត ក៏ត្រូវបានបញ្ជូនពីខេត្តសៀមរាប ចុះទៅកាន់ចំការម្រេចរបស់លោក ខឹម វាសនា ផងដែរ នៅយប់ថ្ងៃទី៣០សីហានេះ។ ប៉ុន្តែកងកម្លាំងប្រដាប់អាវុធទាំងអស់នោះ មិនទាន់ធ្វើសកម្ម ចូលក្នុងដីចំការ និងផ្ទះរបស់លោក ខឹម វាសនា នៅឡើយទេ ដោយរង់ចាំបទបញ្ជាពីថ្នាក់លើ។
សូមរម្លឹកថា អាជ្ញាធរសមត្ថកិច្ច ខេត្តសៀមរាប បានទុកពេលឱ្យលោក ខឹម វាសនា រំសាយការជួបជុំសកម្មជនរបស់ខ្លួន ចេញពីដីចំការម្រេច ដែលលោកខឹមវាសនា រស់នៅទីនោះ យ៉ាងយូរត្រឹមម៉ោង ១២កណ្តាលអាធ្រាត្រ ថ្ងៃទី៣០សីហានេះ។
លោក ខឹម វាសនា ដែលមហាជនទូទៅ ចាត់ទុកថា លោកមានបញ្ហាសតិអារម្មណ៍ បានប្រកាសឃោសនា បែបប្រជាភិថុតិ ថានឹងមានគ្រោះមហន្តរាយទឹកជំនន់ លង់លិចផែនទី តាមរយៈរន្ធខ្មៅ Black Hole នៅយប់ថ្ងៃទី៣០ ខែសីហានេះ ហើយមានតែនៅដីចំការរបស់លោកប៉ុណ្ណោះ ដែលមានសុវត្ថិភាព សុខសាន្ត ដោយមិនត្រូវទឹកលិច។
លោក ខឹម វាសនា ដែលតាំងខ្លួនជាព្រហ្ម នៅព្រលប់ថ្ងៃទី៣០សីហានេះ លោកបានសរសេរសារ Caption តាមហ្វេសប៊ុកជាច្រើន ដោយប្រើពាក្យអសុរស បង្ហោះប្រមាថដល់ថ្នាក់ដឹកនាំកំពូល ហើយអង្គុយ Live ហ្វេសប៊ុក រង់ចាំអាជ្ញាធរសមត្ថកិច្ច ចូលទៅបណ្តេញក្រុមអ្នកគាំទ្រលោកថែមទៀត៕
ចែករំលែកព័តមាននេះ