ខេត្តស្វាយរៀង៖ លោក ហែម ពិសិដ្ឋ អភិបាលរង ខេត្តស្វាយរៀង នៅព្រឹកថ្ងៃទី៣០ ខែសីហា ឆ្នាំ២០២២ បានអញ្ជើញចុះពិនិត្យទីតាំងចេតិយ៍ ១កន្លែង (អ្នកស្រុក ហៅថា ប្រាសាទ វត្តទួល) ដែលបានសាងសង់ ក្នុងអំឡុងឆ្នាំ១៩៦៨ ស្ថិតនៅភូមិព្រះទន្លេ សង្កាត់សង្ឃ័រ ក្រុងស្វាយរៀង ដើម្បីសិក្សារៀបចំ ទៅជាតំបន់រមណីយដ្ឋានទេសចរណ៍វប្បធម៌។
លោក អ៊ុង សារិន អាយុប្រមាណជាង ៦០ឆ្នាំ សព្វថ្ងៃរស់នៅភូមិព្រះទន្លេ សង្កាត់សង្ឃ័រ ក្រុងស្វាយរៀង បានឲ្យដឹងថា អ្នកកសាងចេតិយ៍នេះ ត្រូវជាអ៊ុំរបស់គាត់ ឈ្មោះ អ៊ុង សាវុធ មានឋានៈជាឧត្តមសេនីយ៍ត្រី ក្នុងសម័យ លន់ ណុល រស់នៅរាជធានីភ្នំពេញ បានកសាង នៅឆ្នាំ១៩៦៨ ហើយបានយកជាង ដែលជាអ្នកសាងសង់វិមានឯករាជ្យ យកមកធ្វើចេតិយ៍ និងរូបចម្លាក់រចនាបថនេះ គឺស្រដៀងនឹងវិមានឯករាជ្យ ទាំងអស់។ រហូតដល់សង្គ្រាម ឆ្នាំយៀកកុងចូល កំឡុងឆ្នាំ១៩៧០ ជាងសាងសង់បានរត់រប៉ាត់រប៉ាយ ចោលទាំងអស់ ដោយបានបន្សល់ទុក នៅក្បាច់ក្បូរ នៅទីនេះទាំងអស់។ កាលណោះ ចេតិយ៍នេះ ធ្វើមិនទាន់ហើយទេ គម្រោងរបស់គាត់ចាក់សាប ក្នុងខឿននោះ តែមិនទាន់បានចាក់សាបទេ ហើយស៊ីម៉ង់ត៍ ដែលបានទិញនោះ នៅខាងក្នុងទុកចោលពេញហ្នឹង គាត់ក៏រត់ចោល ជាងក៏រត់ចោលដោយបន្សល់ទុកនូវរបស់របរពេញហ្នឹង ហើយគំរោងរបស់គាត់ គឺធ្វើថ្នល់ក្រួសបន្ត ចាប់ពីផ្លូវលេខ ១៣ រហូតដល់ចេតិយ៍ហ្នឹង បន្ថែមទៀត។
លោកបានបន្តទៀតថា គម្រោងគាត់នៅពេលធ្វើហើយ នឹងធ្វើបុណ្យឆ្លងចេតិយ៍ តែមិនទាន់បានឆ្លងទេ ក្រោយមក រូបលោក និងបងប្អូន កូនចៅនៅភ្នំពេញ បានចូលគ្នា យកស៊ីម៉ង់ត៍ មកចាក់សាប បំពេញខឿន ហើយរូបតោ ដែលនៅជុំវិញចេតិយ៍ បានបាត់បង់អស់ហើយ ពីព្រោះក្នុងសម័យប៉ុលពត ត្រូវបានវាយកម្ទេចចោល ទាំងបង្កាន់ដៃសងខាង ខ្ទេចខ្ទីរអស់ហើយ។ ឥឡូវនេះ បានជួសជុល បានស្អាតឡើងវិញ។
លោក បានបន្ថែមទៀតថា នៅពេលមុន ( សម័យ លន់ ណុល) រហូតដល់បច្ចុប្បន្ននេះ ក៏មាន សិស្សានុសិស្ស បានមកលេង និងថតរូប នៅចេតិយ៍ទីនេះ មិនដែលដាច់នោះទេ។
ដោយឡែក ស្ត្រីចំណាស់ម្នាក់ ឈ្មោះ ព្រាប សាមឿន មានអាយុប្រមាណ ៧០ឆ្នាំ ក៏បានរៀបរាប់ឱ្យដឹងផងដែរថា កាលដើមឡើយ នៅទីនេះ គឺជាទីទួលបុរាណ ហៅទួលអង្គ ឬវត្តចាស់។ រូបគាត់កើតមកឃើញតែ ម្ដង ហើយទីនេះ ក៏មានព្រះសង្ឃ គង់នៅផងដែរ ដោយមានកុដិតូចៗ និងសាលាឆាន់ សម្រាប់ឲ្យព្រះសង្ឃគង់នៅ ស្នាក់អាស្រ័យ រៀនធម៌អាថ៌ ហើយនៅជុំវិញទួលនេះ ក៏មានប្រជាពលរដ្ឋ ធ្វើស្រែ ចំការ ធម្មតា គឺ ស្រែជម្រៅ មានផ្លូវចូល ដូចអង្គរវត្ត ផងដែរ៕ វ៉ាន់ ប៊ុនធឿន
ចែករំលែកព័តមាននេះ