​ភ្នំពេញ៖ តាមកម្មវិធី ដែលបានគ្រោងទុក នៅព្រឹកថ្ងៃពុធ ទី៣១ ខែសីហា ឆ្នាំ២០២២ ស្អែកនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញជាអធិបតីបើកការដ្ឋានសាងសង់ស្ពានអាកាសក្នុងរាជធានីភ្នំពេញចំនួន ០២បន្ថែមទៀត ដែលមានតម្លៃសរុបជាង ៤៦លានដុល្លារអាមេរិក។

ស្ពានអាកាស ដែលសាងសង់បន្ថែមនេះ ទី១ ស្ថិតនៅចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្ស ជាមួយវិថីកងយោធពលខេមរភូមិន្ទ (ផ្លូវលេខ២៧១) ក្នុងទឹកដី​ខណ្ឌចំការមន និងខណ្ឌមានជ័យ។ ទី២ ស្ថិតនៅចំណុចប្រសព្វមហាវិថីសហព័ន្ធរុស្ស៉ី ជាមួយមហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល (ផ្លូវលេខ២០០៤) ក្នុងខណ្ឌពោធិ៍សែនជ័យ។

ស្ពានអាកាសទាំងពីរនេះ សាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) ដោយចំណាយថវិកាសរុប ៤៦,៧៧៥.០០០ដុល្លារអាមេរិក។ ក្នុងនោះ ស្ពានអាកាសចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្ស ជាមួយវិថីកងយោធពលខេមរភូមិន្ទ (ផ្លូវលេខ២៧១) ចំណាយថវិកា ៣៦,៧៧៥,០០០ដុល្លារ និងចំណាយពេលសាងសង់ ៣៦ខែ។ ដោយឡែក ស្ពានអាកាស​ចំណុចប្រសព្វ​មហាវិថីសហព័ន្ធរុស្ស៉ី ជាមួយមហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល ចំណាយថវិកា ១០,០០០,០០០ដុល្លារអាមេរិក ចំណាយពេលសាងសង់ ១៦ខែ។

សូមរម្លឹកថា គម្រោង​សាងសង់ស្ពានអាកាសថ្មី ចំនួន ២ទីតាំងបន្ថែមទៀត នៅភ្នំពេញនេះ​ ដើម្បីកាត់បន្ថយនូវការ​កកស្ទះចរាចរណ៍។ ការកកស្ទះចរាចរណ៍ នៅភ្នំពេញ សព្វថ្ងៃ បានកើតឡើង​ច្រើនផ្លូវ រាល់ថ្ងៃ ពិសេស​នៅពេលព្រឹក និងពេលល្ងាចៗ គឺនៅម៉ោងចូល និងចេញពីធ្វើការ។

គិតត្រឹមឆ្នាំ២០២២នេះ អាជ្ញាធររាជធានីភ្នំពេញ បានសាងសង់ស្ពានអាកាសចំនួន ៧ទីតាំង ក្នុងគោលដៅដោះស្រាយបញ្ហាកកស្ទះចរាចរណ៍។ ស្ពានអាកាសចំនួន ៧ទីតាំងនោះ រួមមាន ស្ពានអាកាសក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ពានអាកាស៥មករា ស្ពានអាកាសផ្សារដីហុយ ស្ពានអាកាសចោមចៅ និងស្ពានអាកាសកាត់ផ្លូវជាតិលេខ៥ ក្នុងខណ្ឌឬស្សីកែវ កំពុងសាងសង់៕