ទីបំផុត! ប្រជាជនជប៉ុនអាចវិលទៅរស់នៅតំបន់ដើមវិញ ក្រោយគ្រោះមហន្តរាយរោងចក្រនុយក្លេអ៊ែអស់១១ឆ្នាំ
ជប៉ុន ៖ ទីបំផុតប្រជាជនជប៉ុនត្រូវបានអនុញ្ញាតឱ្យវិលត្រឡប់មកកាន់ទីក្រុង Futaba របស់ពួកគេ
ជប៉ុន ៖ ទីបំផុតប្រជាជនជប៉ុនត្រូវបានអនុញ្ញាតឱ្យវិលត្រឡប់មកកាន់ទីក្រុង Futaba របស់ពួកគេ រយៈពេលជាង ១១ឆ្នាំបន្ទាប់ពីមានគ្រោះមហន្តរាយនៅរោងចក្រនុយក្លេអ៊ែរ Fukushima Daiichi នៅពេលមានការលុបចោលបទបញ្ជាជម្លៀសខ្លួននៅថ្ងៃអង្គារ ទី ៣០ ខែសីហានេះ។
ទីក្រុង Futaba ស្ថិតក្នុងចំណោមស្រុកចំនួន ១១ ដែលបានលុបចោលបទបញ្ជាជម្លៀសចេញ។ នេះបើយោងតាមការបញ្ជាក់របស់អ្នកនាំពាក្យការិយាល័យក្រុងថ្លែងប្រាប់ CNN។
កាលពីថ្ងៃទី ១១ ខែមីនា ឆ្នាំ ២០១១ គ្រោះរញ្ជួយដីកម្រិត ៩រិចទ័របានវា.យប្រហារនៅឆ្នេរសមុទ្រភាគខាងកើតជប៉ុន បង្កឲ្យមានរលកយក្សស៊ូណាមិដែលធ្វើឱ្យមានបំផ្លិចបំផ្លាញរោងចក្រនុយក្លេអ៊ែរ និងលេចធ្លាយចេញវិទ្យុសកកម្ម។ វាគឺជាគ្រោះមហន្តរាយដ៏ធំបំផុតរបស់ពិភពលោកចាប់តាំងពីគ្រោះមហន្តរាយរោងចក្រនុយក្លេអ៊ែរ Chernobyl នៅក្នុងឆ្នាំ ១៩៨៦។
មនុស្សជាង ៣០០.០០០នាក់ដែលរស់នៅជិតរោងចក្រនុយក្លេអ៊ែរត្រូវបានបង្ខំឲ្យជម្លៀសខ្លួនចេញបណ្តោះអាសន្ន ខណៈមនុស្សរាប់ពាន់នាក់ធ្វើដោយស្ម័គ្រចិត្ត។ សហគមន៍ដែលធ្លាប់អ៊ូអរបានប្រែក្លាយជាទីក្រុងខ្មោច។
ប៉ុន្តែក្នុងរយៈពេលប៉ុន្មានឆ្នាំមកនេះ ប្រតិបត្តិការបោសម្អាត និងកម្ចាត់មេរោគទ្រង់ទ្រាយធំ បានអនុញ្ញាតិឱ្យអ្នកស្រុកដើមដែលធ្លាប់រស់នៅទីនោះវិលត្រឡប់មកវិញ។
មុនពេលមានគ្រោះមហន្តរាយ ក្រុង Futaba មានប្រជាជនប្រហែល ៧.១០០នាក់។ គិតត្រឹមចុងខែកក្កដា ប្រជាជនជាង ៥.៥០០នាក់បានចុះឈ្មោះជាអ្នករស់នៅទីនេះ។
ទោះយ៉ាងណា វាមិនទាន់ដឹងច្បាស់ទេថាតើមនុស្សប៉ុន្មាននាក់នឹងវិលត្រឡប់មកវិញ ហើយរយៈពេលប៉ុន្មានដែលទីក្រុងនឹងអាចស្ថារឡើងវិញ៕ (យោងតាមប្រភព៖ CNN)
ចែករំលែកព័តមាននេះ