ពីឡុត២នាក់ត្រូវព្យួរការងារ ក្រោយធ្វើរឿងមួយនៅក្នុងកាប៊ីនបញ្ជាយន្តហោះ
បារាំង ៖ អ្នកបើកយន្តហោះ២នាក់របស់ក្រុមហ៊ុនអាកាសចរណ៏បារាំង Air-France ត្រូវបានព្យួរការងារ
បារាំង ៖ អ្នកបើកយន្តហោះ២នាក់របស់ក្រុមហ៊ុនអាកាសចរណ៏បារាំង Air-France ត្រូវបានព្យួរការងារបណ្តោះអាសន្ន បន្ទាប់ពីបង្កជម្លោះវា.យតបគ្នានៅក្នុងកាប៊ីនបញ្ជាយន្តហោះ (Cockpit)។ នេះបើយោងតាមប្រភពពី BBC ចេញផ្សាយកាលពីថ្ងៃទី២៩ ខែសីហា ឆ្នាំ២០២២។
យោងតាមសារព័ត៌មាន La Tribune របស់ប្រទេសស្វីសបានរាយការណ៍ថា ប្រធានក្រុម និងពីឡុតដៃទីមួយបានវា.យតប់គ្នា អំឡុងពេលពួកគេកំពុងបញ្ជាការហោះហើរយន្តហោះ Airbus A320 ចាកចេញពីទីក្រុងហ្សឺណែវ ប្រទេសស្វីស ទៅកាន់ទីក្រុងប៉ារីស ប្រទេសបារាំង កាលពីខែមិថុនា ឆ្នាំ២០២២ កន្លងទៅ។
ភ្លាមៗនោះ សមាជិកនៃក្រុមកាប៊ីនបានធ្វើអន្តរាគមន៍ចាប់បំបែកអ្នកទាំង២ បន្ទាប់ពីលឺសំលេងរំខាន។ ខណៈដែលសមាជិកម្នាក់ទៀត ដែលស្ថិតនៅក្នុងកាប៊ីនយន្ដហោះ គឺជាអ្នកបញ្ជាយន្តហោះបន្តរហូតដល់ចុះចតដោយសុវត្ថិភាព។
អ្នកនាំពាក្យក្រុមហ៊ុនអាកាសចរណ៍ បានបញ្ជាក់នៅក្នុងសេចក្តីថ្លែងការណ៍ថា «ឧប្បត្តិហេតុត្រូវបានដោះស្រាយយ៉ាងឆាប់រហ័ស ដោយមិនប៉ះពាល់ដល់សុវត្ថិភាពនៃការហោះហើរនោះទេ។ ហើយបច្ចុប្បន្នអ្នកបើកយន្តហោះដែលពាក់ព័ន្ធ ត្រូវបានផ្អាកពីការងារបណ្តោះអាសន្ន និងរង់ចាំការសម្រេចចិត្តរបស់អ្នកគ្រប់គ្រងលើលទ្ធផលនៃការស៊ើបអង្កេត។ Air-France សូមរំលឹកថា សុវត្ថិភាពអតិថិជន និងសមាជិកទាំងអស់គឺជាអាទិភាពដាច់ខាតរបស់យើង»៕ (ដកស្រង់ចេញពី BBC និង CNN)
ចែករំលែកព័តមាននេះ