គេលួចខ្សិបប្រាប់ថា សមត្ថកិច្ចចង់បានលុយទឹកតែពី Siem Reap Hostel
ខេត្តសៀមរាប ៖ សាកសពបុរសជនជាតិអាមេរិកាំងម្នាក់ត្រូវបានគេប្រទះឃើញដេកស្លា.ប់ដោយមានឈាមហូរតាមច្រមុះ តែទាំងលោកគ្រូពេទ្យ ទាំងសមត្ថកិច្ចជំនាញ ប្រាប់ថា …
ខេត្តសៀមរាប ៖ សាកសពបុរសជនជាតិអាមេរិកាំងម្នាក់ត្រូវបានគេប្រទះឃើញដេកស្លាប់ដោយមានឈាមហូរតាមច្រមុះ តែទាំងលោកគ្រូពេទ្យ ទាំងសមត្ថកិច្ចជំនាញ ប្រាប់ថា នៅមិនទាន់អាចបញ្ជាក់ពីមូលហេតុច្បាស់លាស់នៃការស្លាប់បាននៅឡើយទេ ហើយស្រាប់តែដឹកសពយកទៅភ្នំពេញបាត់ ។ ហេតុការណ៍ប្រទះឃើញសពនេះកើតឡើងកាលពីវេលាម៉ោង៨ និង៣០នាទីព្រឹក ថ្ងៃទី៣០ ខែមករា ឆ្នាំ២០១៧ នៅក្នុងបន្ទប់លេខ៣០៩ នៃសណ្ឋាគារ Siem Resp Hostel ដែលមានទីតាំងនៅភូមិវត្តដំណាក់ សង្កាត់សាលាកំរើក ក្រុងសៀមរាប ។
លោកវរសេនីយ៍ទោ វ៉ាន់ រិទ្ធ នាយការិយាល័យនគរបាលអន្តោប្រវេសន៍បានឲ្យដឹងថា ជនរងគ្រោះឈ្មោះ BLACK GRAHAM WESTON ភេទប្រុស អាយុ២៨ឆ្នាំ ជនជាតិអាមេរិកាំង ជាភ្ញៀវទេសចរណ៍ ចូលមកស្នាក់នៅសណ្ឋាគារ Siem Reap Hostel កាលពីថ្ងៃទី២៨ ខែមករា ឆ្នាំ២០១៧ ។
លោកនាយការិយាល័យបញ្ជាក់ថា ក្រោយពីទទួលបានព័ត៌មានភ្លាម កម្លាំងសមត្ថកិច្ច នគរបាលជំនាញ និងសមត្ថកិច្ចពាក់ព័ន្ធបានចុះទៅដល់កន្លែងកើតហេតុ ដើម្បីធ្វើការពិនិត្យ និងធ្វើកោសល្យវិច្ច័យសព ឃើញថា ជនរងគ្រោះមានឈាមហូរចេញតាមច្រមុះ ក្នុងករណីនេះទាំងលោកគ្រូពេទ្យ និងសមត្ថកិច្ចជំនាញ មិនទាន់អាចបញ្ជាក់ពីមូលហេតុនៃការស្លាប់របស់ជនរងគ្រោះបាននៅឡើយទេ ។
ប្រភពពីសមត្ថកិច្ចម្នាក់បានលួចខ្សិបប្រាប់អ្នកយកព័ត៌មានពេលចេញពីក្នុងសណ្ឋាគារថា ជនរងគ្រោះស្លាប់នៅក្នុងបន្ទប់សណ្ឋាគារនោះគឺមិនទាន់ដឹងពីមូលហេតុច្បាស់ទេ ដោយសារក្រុមសមត្ថកិច្ចបច្ចេកទេសជំនាញ និងសមត្ថកិច្ចផ្សេងៗទៀតចង់បានលុយទឹកតែពីម្ចាស់សណ្ឋាគារ ទើបដឹកសពចេញយកទៅភ្នំពេញបាត់ដើម្បីបំបាត់ភស្តុតាង ថែមទាំងមិនបានឱ្យគ្រួពេទ្យជំនាញយកទឹកកាមទៅពិនិត្យដើម្បីរកឱ្យឃើញពីជម្ងឺ ឬមានអ្វីគួរឱ្យកត់សម្គាល់ទៅលើដងខ្លួននៃសាកសពឡើយ ៕
ចែករំលែកព័តមាននេះ