សហរដ្ឋអាមេរិក ៖ ២ថ្ងៃបន្ទាប់ពីលោកប្រធានាធិបតី Donald Trump ចេញបទបញ្ជាហាមឃាត់ជនភៀសខ្លួនមកពីប្រទេសមួយចំនួនចូលក្នុងសហរដ្ឋអាមេរិក នាយកប្រតិបត្តិរបស់ Starbucks លោក Howard Schultz បាននិយាយកាលពីថ្ងៃអាទិត្យកន្លងមកថា ក្រុមហ៊ុនមានផែនការផ្តល់ការងារដល់ជនភៀសខ្លួនប្រមាណ១ម៉ឺននាក់ក្នុងរយៈពេល៥ឆ្នាំ ស្មើ៧៥ប្រទេស ។
កាលពីថ្ងៃសុក្រមុន លោក Trump បានសម្រេចរារាំងជនភៀសខ្លួនរយៈពេល៤ខែ ដើម្បីមិនឲ្យពួកគេចូលក្នុងសហរដ្ឋអាមេរិក និងហាមឃាត់ជាបណ្តោះអាសន្ននូវអ្នកដំណើរមកពីប្រទេស Syria និងប្រទេសដែលមានអ្នកកាន់សាសនាអ៊ិស្លាមភាគច្រើនចំនួន៦ទៀត ដោយអះអាងថា ការធ្វើដូចនេះនឹងជួយការពារដល់ជនជាតិអាមេរិកពីភេរវកម្ម ។
បទបញ្ជានេះធ្វើឲ្យមានការរិះគន់ពីសំណាក់អន្តរជាតិ សកម្មជនការពារសិទ្ធិមនុស្ស និងមានឧបសគ្គផ្នែកច្បាប់យ៉ាងខ្លាំង ។
ចំណែកលោក Schultz បានសរសេរសំបុត្រមួយប្រាប់ដល់បុគ្គលិកថា ក្រុមហ៊ុននឹងធ្វើរាល់សកម្មភាពដែលអាចធ្វើទៅបាន ដើម្បីគាំទ្រដល់បុគ្គលិកដែលត្រូវបានប៉ះពាល់ ។
គួរបញ្ជាក់ថា លោក Schultz បាននិយាយមិនសំចៃពីបញ្ហាជាច្រើន និងធ្វើឲ្យ Starbucks ទទួលបានចំណាប់អារម្មណ៍ទូទាំងប្រទេស ដោយស្នើឲ្យអតិថិជនមិនយកកាំភ្លើងចូលហាង និងជំរុញឲ្យមានការសន្ទនាពីទំនាក់ទំនងជាតិសាសន៍ជាដើម ។
លោកបាននិយាយកាលពីថ្ងៃអាទិត្យថា ៖ « ប្រសិនបើច្បាប់ថែទាំសុខភាពតម្លៃសមរម្យត្រូវបាននិរាករណ៍ ហើយបុគ្គលិកបាត់បង់ប្រាក់ថែទាំសុខភាពនោះ ពួកគេនឹងទទួលបានការធានារ៉ាប់រងសុខភាពតាមរយៈ Starbukcs » ។
គួរបញ្ជាក់ថា លោក Trump និងសមាជិកគណបក្សសាធារណរដ្ឋបានព្យាយាមបោះបង់ច្បាប់នេះ ដែលមានឈ្មោះមួយទៀតថា Obamacare ។
លោក Schultz ក៏បានបញ្ជាក់ពីការប្តេជ្ញារបស់ក្រុមហ៊ុនទាក់ទិននឹងការធ្វើពាណិជ្ជកម្មជាមួយប្រទេសម៉ិកស៊ិកផងដែរ ដែលជាប្រធានបទមួយដ៏សំខាន់ក្នុងយុទ្ធនាការរបស់លោក Trump ៕
ចែករំលែកព័តមាននេះ