មន្ត្រីយោធាម្នាក់ទៅប្រគល់ខ្លួន រួចសារភាពទោសកំហុស ក្រោយបាញ់ប្រហា.រប្រពន្ធ
- ស្ទឹងត្រែង
បុរសវ័យចំណាស់ម្នាក់សម្រេចចិត្តជិះម៉ូតូទៅប្រគល់ខ្លួនឲ្យសមត្ថកិច្ចចាត់ការតាមផ្លូវច្បាប់ ក្រោយពីបានធ្វើសកម្មភាពប្រើអាវុធបាញ់
ខេត្តស្ទឹងត្រែង ៖ បើតាមសេចក្តីរាយការណ៍បានឱ្យដឹងថា បុរសវ័យចំណាស់ម្នាក់សម្រេចចិត្តជិះម៉ូតូទៅប្រគល់ខ្លួនឲ្យសមត្ថកិច្ចចាត់ការតាមផ្លូវច្បាប់ ក្រោយពីបានធ្វើសកម្មភាពប្រើអាវុធបាញ់ប្រហា.រទៅលើប្រពន្ធរបស់ខ្លួន១គ្រាប់ បណ្តាលឲ្យរងរបួសត្រង់ពោះខាងឆ្វេង ។ ហេតុការណ៍នេះបានកើតឡើងកាលពីវេលាម៉ោង៩និង៣០នាទីយប់ ថ្ងៃទី២៦ ខែសីហា ឆ្នាំ២០២២ ស្ថិតនៅភូមិផាបាំង ឃុំថ្មកែវ ស្រុកសៀមប៉ាង ខេត្តស្ទឹងត្រែង ។
សេចក្តីរាយការណ៍បន្តថា ស្ត្រីជាជនរងគ្រោះខាងលើមានឈ្មោះ ពាន បួវៀន (ប្រពន្ធ) អាយុ៤៤ឆ្នាំ មុខរបរជាកសិករ រស់នៅភូមិ-ឃុំខាងលើ ត្រូវបានសាច់ញាតិបញ្ជូនទៅសង្គ្រោះ និងព្យាបាលនៅមន្ទីរពេទ្យស្រុកសៀមប៉ាង ខេត្តស្ទឹងត្រែង ។ ចំណែកជនសង្ស័យជាប្តីមានឈ្មោះ វៃ ឆោម អាយុ៧១ឆ្នាំ មុខរបរមន្ត្រីយោធានៅអង្គភាពវីរៈ៣៨២ ខេត្តព្រះវិហារ ។
សេចក្តីរាយការណ៍បន្តទៀតថា ជនសង្ស័យបានយកកាំភ្លើ.ងខ្លីម៉ាក K៥៤ បាញ់ទៅលើប្រពន្ធចំនួន១គ្រាប់ បណ្ដាលឲ្យរងរបួស ក្រោយពីធ្វើសកម្មភាពរួច ជនសង្ស័យក៏បានជិះម៉ូតូយកទាំងអាវុធទៅប្រគល់ខ្លួនឲ្យសមត្ថកិច្ច ដើម្បីចាត់ការតាមផ្លូវច្បាប់តែម្តង ហើយជនសង្ស័យក៏បានសារភាពយ៉ាងខ្លីថា «មូលហេតុ ដោយសាភ្លើងប្រចណ្ឌ» ។
ក្រោយពេលកើតហេតុ សមត្ថកិច្ចក៏បានកសាងសំណុំរឿងបញ្ជូនខ្លួនជនសង្ស័យទៅអយ្យការអមសាលាដំបូងខេត្តស្ទឹងត្រែង ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ