ស្ថាបនិក Facebook រិះគន់លោក Trump លើការធ្វើអន្តោប្រវេសន៍
សហរដ្ឋអាមេរិក ៖ លោក Mark Zuckerberg បានសម្រេចចិត្តចេញមុខរិះគន់លោកប្រធានាធិបតី Trump ។
ស្ថាបនិករបស់ Facebook រូបនេះបានបង្ហាញពីក្តីបារម្ភកាលពីថ្ងៃសុក្រ ទាក់ទិននឹង
សហរដ្ឋអាមេរិក ៖ លោក Mark Zuckerberg បានសម្រេចចិត្តចេញមុខរិះគន់លោកប្រធានាធិបតី Trump ។
ស្ថាបនិករបស់ Facebook រូបនេះបានបង្ហាញពីក្តីបារម្ភកាលពីថ្ងៃសុក្រ ទាក់ទិននឹងបទបញ្ជានីតិប្រតិបត្តិរបស់លោក Trump កាលពីសប្តាហ៍មុនលើការធ្វើអន្តោប្រវេសន៍ និងជនភៀសខ្លួន ។
លោកបានសរសេរនៅលើហ្វេសប៊ុកថា ៖ «ដូចមនុស្សជាច្រើននៅទីនេះ ខ្ញុំព្រួយបារម្ភពីការប៉ះពាល់ដោយសារបទបញ្ជានីតិប្រតិបត្តិនាពេលថ្មីៗនេះរបស់លោកប្រធានាធិបតី Trump » ។
លោកបន្តថា ៖ « ពួកយើងគួរតែបន្តបើកទ្វារដល់ជនភៀសខ្លួន និងអ្នកដទៃដែលត្រូវការជំនួយ ព្រោះពួកគេក៏ជាមនុស្សដូចយើងដែរ ។ ប្រសិនបើពួកយើងបដិសេធមិនឲ្យជនភៀសខ្លួនចូលមកក្នុងប្រទេស នាប៉ុន្មានទសវត្សរ៍មុននោះ គ្រួសាររបស់ Priscilla ក៏ប្រហែលជាគ្មានថ្ងៃនេះដែរ » ។
គួរបញ្ជាក់ថា កាលពីថ្ងៃសុក្រមុននេះ លោក Trump បានចុះហត្ថលេខាលើបទបញ្ជានីតិប្រតិបត្តិមួយដើម្បីឲ្យមានការត្រួតពិនិត្យដ៏ខ្លាំងក្លាលើជនភៀសខ្លួន ។ កាលពីដើមសប្តាហ៍មុន លោក Trump ក៏បានចុះហត្ថលេខាលើបទបញ្ជាមួយទៀតទាក់ទិននឹងរឿងផ្តល់អាទិភាពដល់ការនិរទេសជនល្មើសផងដែរ ។
លោក Zuckerberg បានស្នើឲ្យមានគោលនយោបាយអន្តោប្រវេសន៍បើកទូលាយជាងនេះ និងមានការខ្វែងគំនិតជាមួយលោក Trump ផងដែរ ក្នុងអំឡុងពេលយុទ្ធនាការបោះឆ្នោត ។
លោក Zuckerberg បាននិយាយក្នុងកម្មវិធីមួយនាខែមេសា ឆ្នាំ២០១៦ ថា ៖ « យើងមិនគួរណាសាងសង់ជញ្ជាំងទេ តែពួកយើងអាចសាងសង់ស្ពាន » ។
ការរិះគន់របស់លោក Zuckerberg នាពេលថ្មីៗនេះបានលេចឡើងបន្ទាប់ពីនាយកផ្នែកដំណើរការរបស់ហ្វេសប៊ុកគឺ Sheryl Sandberg រិះគន់លោក Trump ទាក់ទិននឹងគោលនយោបាយពន្លូតកូន ។
នាយកទាំងពីររបស់ហ្វេសប៊ុកភាគច្រើនបានរក្សាភាពស្ងៀមស្ងាត់ទាក់ទិននឹងលោក Trump តាំងពីជ័យលាភីរបស់លោកមកម្ល៉េះ និងមានពាក្យចចាមអារ៉ាមថា ពួកគេអាចនឹងមានចំណាប់អារម្មណ៍ឈរឈ្មោះសម្រាប់តំណែងនយោបាយ ប៉ុន្តែលោក Zuckerberg បាននិយាយនាពេលថ្មីៗនេះថា លោកគ្មានចំណាប់អារម្មណ៍ទេ ៕
ចែករំលែកព័តមាននេះ