ខេត្តតាកែវ ៖ រាជរដ្ឋាភិបាលបានទំលាក់លុយរាប់លានដុល្លារអាមេរិក ពីមួយឆ្នាំទៅមួយឆ្នាំដល់ ឃុំ សង្កាត់ទូទាំងប្រទេស ដើម្បីធ្វើការអភិវឌ្ឍន៍ហេត្ថារចនាសម្ព័ន្ធនានាក្នុងមូលដ្ឋានខ្លួន តាមរយៈការប្រកាសទទួលសំណើដេញថ្លៃជ្រើសរើសក្រុមហ៊ុនអ្នកទទួលការសាងសង់ ក្នុងឃុំសង្កាត់ ជាមួយនិងលក្ខខណ្ឌផ្លូវច្បាប់ជាច្រើន…
ខេត្តតាកែវ ៖ រាជរដ្ឋាភិបាលបានទំលាក់លុយរាប់លានដុល្លារអាមេរិក ពីមួយឆ្នាំទៅមួយឆ្នាំដល់ ឃុំ សង្កាត់ទូទាំងប្រទេស ដើម្បីធ្វើការអភិវឌ្ឍន៍ហេត្ថារចនាសម្ព័ន្ធនានាក្នុងមូលដ្ឋានខ្លួន តាមរយៈការប្រកាសទទួលសំណើដេញថ្លៃជ្រើសរើសក្រុមហ៊ុនអ្នកទទួលការសាងសង់ ក្នុងឃុំសង្កាត់ ជាមួយនិងលក្ខខណ្ឌផ្លូវច្បាប់ជាច្រើន ក្នុងនោះ អំពើស៊ុមគ្រលុំឃុបឃិតគ្នា រវាងម្ចាស់ក្រុមហ៊ុន ដែលទៅចូលរួមដេញថ្លៃក៏ត្រូវបានហាមឃាត់ដាច់ខាតផងដែរ ។
មិនខុសនោះទេ ច្បាប់នៅតែជាច្បាប់ ព្រោះរាល់គម្រោងអភិវឌ្ឍឃុំ សង្កាត់ ភាគច្រើនក្នុងខេត្តតាកែវ គឺត្រូវបានមើលឃើញថា ក្រុមហ៊ុនឃុបឃិតគ្នាដេញថ្លៃសុទ្ធសាធ ដោយដាក់តម្លៃចុះតិចតួចបំផុត ហើយក្រុមការងារលទ្ធកម្ម ឃុំ សង្កាត់ ក៏ដូចជាមន្ត្រីផែនការនិងវិនិយោគខេត្តនៅតែទទួលយកក្នុងហ៊ុនដែលដេញបាននោះដដែល ធ្វើដូចជាមិនដឹងគេឃុបឃិតចែកលុយគ្នាចាយសោះ ។
ប្រភពបែកធ្លាយពីក្រុមហ៊ុនដែលតែងតែទៅចូលរួមដេញថ្លៃបាននិយាយថា កាលណាគម្រោងដេញថ្លៃបានដោយការស៊ុមគ្រលុំឃុបឃិតគ្នា គឺត្រូវបែងចែកលុយទៅក្រុមហ៊ុននានាដែលទៅហែរហមដែរ ពិសេសគឺត្រូវតែបែងចែកទៅលោក ហេង វុទ្ធី ប្រធានផែនការនិងវិនិយោគខេត្តតាកែវ១០% មិនចឹងមិនអាចដំណើរការដោយរលូនបានទេ។
ចំពោះករណីលុយ១០% ចូលទៅលោកប្រធានផែនការនិងវិនិយោគខេត្តនេះ បើដូចដែលក្រុមហ៊ុនលើកឡើងមែននោះ ច្បាស់ណាស់ថា សមិទ្ធិផលដែលទទួលបានពីគម្រោងដេញថ្លៃសាងសង់ក្នុងឃុំ សង្កាត់ ដោយការឃុបឃិតគ្នា គឺពិតជាគ្មានគុណភាព គ្មានបទដ្ឋានតាមស្តង់ដាបច្ចេកទេសនោះទេ ។ ដូច្នេះ សូមលោក អ៊ូច ភា អភិបាលនៃគណៈអភិបាលខេត្តតាកែវ មេត្តាពិនិត្យមើលរាល់គម្រោងដេញថ្លៃតាមឃុំ សង្កាត់ ដែលមានរាល់ៗឆ្នាំនេះផង មិនចឹងលុយជាតិរាប់រយលានដុល្លារ និងត្រូវខាតបង់ជាមិនខាន ។
ម្សិលមិញនេះ មិនអាចទាក់ទងបានទេ តាមទូរស័ព្ទជាមួយលោកហេង វុទ្ធី ព្រោះនៅក្រៅតំបន់សេវា ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ