ខេត្តឧត្តរមានជ័យ ៖ ស្ថានការណ៍ព្រំដែនកម្ពុជា-ថៃ នៅបរិវេណប្រាសាទតាមាន់ធំ និងតាក្របីក្នុងខេត្តឧត្តរមានជ័យ នៅមានលក្ខណៈធម្មតាទេ ទោះបីជាមានការដាក់ពង្រឹងកំលាំងនៅតាមទីតាំង បន្ទាប់ពីមានការបដិសេធចោល ការប៉ុនប៉ងមកជួសជុលប្រាសាទតាមាន់ធំពីសំណើភាគីសៀមយ៉ាងណាក្តី ។ កាលពីថ្ងៃទី២១ កញ្ញា កន្លងមក ស្ថានការណ៍នៅបរិវេណប្រាសាទតាមាន់ធំរបស់ខ្មែរជាប់ព្រំដែនកម្ពុជា-សៀម មិនទាន់មានការចល័តទ័ព ឬពង្រឹងទ័ពប្រឈមដាក់គ្នានោះទេ ហើយទាហានឈុតខ្មៅសៀមក្នុងកងពល៩៦០ នៅតែដាក់កំលាំងប្រចាំការនៅទីតាំងក្បែរប្រាសាទជាធម្មតា ។ ចំណែកកងទ័ពកម្ពុជា ក្នុងកងពល៤០២ នៃភូមិភាគ៤ នៅតែបន្តឈរជើងជាធម្មតា ។ តាមការផ្សាយសំលេងរបស់ទូរទស្សន៍ CTN នាព្រឹកថ្ងៃទី២១ កញ្ញា លោកនាក់ វង្ស មេបញ្ជាការរង និងជាសេនាធិការកងពលលេខ៤២ ប្រចាំតំបន់ប្រាសាទតាមាន់ធំមានប្រសាសន៍ថា យើងបានហាមឃាត់ការប៉ុនប៉ងជួសជុលប្រាសាទនេះ ព្រោះជាប្រាសាទរបស់ខ្មែរ សូម្បីតែការចង់ជួសជុលរបងក៏ត្រូវហាមឃាត់ដែរ ។ ទោះបីជាបែបណា លោកមានប្រសាសន៍ថា សភាពការណ៍ស្ងប់ស្ងាត់ល្អប្រសើរធម្មតាទេ មិនមានអ្វីគួរឱ្យកត់សំគាល់នោះឡើយ ។
ស្ថានការណ៍ព្រំដែនកម្ពុជា-សៀម នៅបរិវេណប្រាសាទតាមាន់ធំ ក្នុងពេលនេះមិនមានស្ថានភាពតានតឹងទេ ។ ទាំងទាហានកម្ពុជា និងទាហានសៀម ប្រតិបត្តិការនៅក្នុងព្រំដែនរៀងៗខ្លួន ហើយភ្ញៀវទេសចរនៅតែធ្វើដំណើរមកទស្សនាកំសាន្តប្រាសាទតាមាន់ធំជាប្រក្រតី ។ លោកនាយឧត្តមសេនីយ៍ ជា តារា មេបញ្ជាការរងនៃកងយោធពលខេមរភូមិន្ទដែលទទួលខុសត្រូវតំបន់ព្រំដែនកម្ពុជា-សៀមមានប្រសាសន៍ថា ប្រាសាទតាមាន់ធំ គឺស្ថិតនៅក្រោមបូរណភាពដែនដីរបស់កម្ពុជា ប្រសិនបើប្រទេសថៃចូលធ្វើការជួសជុល ចាត់ទុកថា ជាការឈ្លានពានលើដែនដីកម្ពុជា ដែលត្រូវធ្វើការតបតភ្លាមៗ និងប្រកបដោយប្រសិទ្ធភាព ។
ប្រាសាទតាមាន់ធំ ស្ថិតនៅលើខ្នងភ្នំដងរែក ក្នុងខេត្តឧត្តរមានជ័យ ជិតបង្គោលព្រំដែនលេខ២៣ ដែលបានធ្វើឡើងដោយបារាំង-សៀម ឆ្នាំ១៩០៤-១៩០៧ ត្រូវពួកសៀមវង្វេងប្រវត្តិសាស្ត្រកំពុងតែប្រើល្បិចកលក្នុងចេតនាទន្ទ្រានចូលកាន់កាប់ ។ បន្ទាប់ពីដើរអុកឡុកពេញពិភពលោក ចង់បានប្រាសាទព្រះវិហារខ្មែរ ដោយឥតកេរ្តិ៍ខ្មាស ត្រូវទទួលបរាជ័យ ពួកសៀមជ្រុលនិយមបានបន្តបង្កើតជំលោះមួយថ្មីទៀត គឺប៉ុនប៉ងឈ្លានពានយកប្រាសាទតាមាន់ធំរបស់ខ្មែរ ។ តាមទូរទស្សន៍ ASTV របស់ថៃបានផ្សាយដដែលៗថា ថៃនឹងបញ្ជូនក្រុមជំនាញថៃមកជួសជុលប្រាសាទតាមាន់ធំ នៅក្នុងទឹកដីរបស់ខ្មែរ ។ នេះជាចេតនាអាក្រក់របស់សៀម កំពុងបង្ហាញចិត្តព្រហើន ឥតខ្មាសចង់បានប្រាសាទបុរាណរបស់ខ្មែរ ។ យោងតាមសន្ធិសញ្ញា និងអនុសញ្ញាបារាំង-សៀម ឆ្នាំ១៩០៤-១៩០៨ ប្រជុំប្រាសាទតាមាន់តូច ប្រាសាទតាមាន់ធំខ្មែរ ស្ថិតនៅក្នុងអធិបតេយ្យភាពរបស់កម្ពុជា ចំពោះសៀមវិញ ដល់ពេលសមល្មមទទួលស្គាល់ការពិតហើយ ។ តែផ្ទុយទៅវិញ សៀមកំពុងតែអុជអាលអួតអាងប្រាប់ប្រជាជនខ្លួនថា បានបណ្តេញទាហានខ្មែរចេញពីប្រាសាទតាមាន់ធំជាច្រើនលើកមកហើយ លើកនេះ គេនឹងធ្វើការវាយប្រហារដោយអាវុធ បើខ្មែរនៅតែបន្តនៅក្នុងបរិវេណប្រាសាទតាមាន់ធំរបស់ខ្មែរនោះទៀត ។ ស្តាប់មើលទៅ ហាក់ដូចជាខ្លួនជាជនរងគ្រោះ ដោយប្រើល្បិចកលស្វាស៊ីបាយលាបមាត់ពពែ នេះជាការលាបពណ៌ដាក់កំហុសឱ្យខ្មែរ ដែលជាអ្នករងគ្រោះ ដោយការឈ្លានពានរបស់ចោរសៀម ។
គួរឱ្យអនិច្ចា ខ្មែរនៅក្នុងដីខ្លួន បែរជាពួកទាហានសៀមវង្វេងប្រវត្តិសាស្ត្រចូលមកឆាឆៅថា ជាដីរបស់សៀមវិញ ។ វាដូចទៅនឹងការប្រើលេសបង្ករឿងអំពីប្រាសាទព្រះវិហារខ្មែរ ពួកសៀមបង្កើតបញ្ហាថ្មីជានិច្ច ដើម្បីចិញ្ចឹមជំលោះឱ្យបានយូរជាមួយកម្ពុជា ប្រយោជន៍ចំណេញនយោបាយផ្ទៃក្នុងរបស់ខ្លួន ។ ដល់យូរៗទៅរកហេតុផលបង្កទំនាស់លែងបាន ក៏ទាមទារឱ្យប្តូរឈ្មោះព្រះវិហារខ្មែរ ទៅជាព្រះវិហានទៅវិញ ។ ចាំថា ដូនតាខ្មែរមិនបានកសាងប្រាសាទព្រះវិហានដែលពួកសៀមវង្វេងប្រវត្តិសាស្ត្រ បាននាំ គ្នានិយាយនោះទេ ប៉ុន្តែដូនតាខ្មែរបានកសាងប្រាសាទព្រះវិហារយ៉ាងល្អឯកនៅលើខ្នងភ្នំដងរែក ៕
ចែករំលែកព័តមាននេះ