វេបសាយ«The Washington Post»កាលពីពេល ថ្មីៗកន្លងមកផ្សាយថាអ្នករស់នៅតំបន់ប្រ៊ូកលីន ក្បែរក្រុងបូស្តុន រដ្ឋម៉ាសាឈូសេត សហរដ្ឋអាមេរិកឱ្យដឹងថា លោកយាយម្នាក់រស់នៅជាមួយសពប្អូនស្រី
វេបសាយ«The Washington Post»កាលពីពេល ថ្មីៗកន្លងមកផ្សាយថាអ្នករស់នៅតំបន់ប្រ៊ូកលីន ក្បែរក្រុងបូស្តុន រដ្ឋម៉ាសាឈូសេត សហរដ្ឋអាមេរិកឱ្យដឹងថា លោកយាយម្នាក់រស់នៅជាមួយសពប្អូនស្រីក្នុងផ្ទះមួយ អស់រយៈពេលជាច្រើនខែ ។
លោកយាយ Lynda Waldman អាយុ៧៤ឆ្នាំ និង Hope Wheaton អាយុ៦៧ឆ្នាំ ជាប្អូនស្រីរស់នៅក្នុងផ្ទះមានតម្លៃប្រហែល១,២លានដុល្លារ ។ ទោះបីជាផ្ទះមានតម្លៃថ្លៃបែបណាក៏ដោយ ប៉ុន្តែតាំងពីជាង១ឆ្នាំកន្លះកន្លងមក ស្មៅដុះជុំវិញផ្ទះហាក់ដូចជាគ្មានមនុស្សរស់នៅ ។
លោកស្រីហែរ៉េត អាឡែន អ្នកជិតខាងម្នាក់និងជាអ្នករាប់អាន២នាក់បងប្អូននោះធ្លាប់សួរនាំលោកយាយ Lynda ថាហេតុអ្វីបានជាមិនឃើញ Hope ជាប្អូនស្រី ប៉ុន្តែគាត់មិនឆ្លើយតបទេ ។
អ្នកជិតខាងបញ្ជាក់ថា ស្ត្រីទាំង២នាក់នោះ ជាអ្នករួសរាយរាក់ទាក់ ធ្លាប់និយាយលេងសើចសប្បាយរីករាយជាមួយអ្នកជិតខាង ។ ក្រោយមកពួកគាត់ស្រាប់តែលែងរាប់រកជាមួយអ្នកខាងក្រៅ ដោយមិនដឹងមូលហេតុទេ ។
សមត្ថកិច្ចបានស្រាវជ្រាវពីស្ត្រី២នាក់បងប្អូននោះ ដោយចូលឆែកឆេរក្នុងផ្ទះ ហើយជួបរឿងគួរឱ្យភ្ញាក់ផ្អើលមួយ គឺឃើញសពរបស់ស្ត្រីឈ្មោះ Hope ដេកនៅក្រោមតុក្នុងផ្ទះបាយ ។ អាជ្ញាធរមូលដ្ឋានឱ្យដឹងថា សាកសពស្ថិតក្នុងសភាពរលួយ ហើយរបស់របរក្នុងផ្ទះរប៉ាត់រប៉ាយ ។ ស្ត្រីនោះទំនងស្លាប់នៅរដូវក្តៅ២០១៦ ហើយលោកយាយ Lynda រស់នៅជាមួយសពរបស់ប្អូនស្រីតាំងពីពេលនោះមក ។
តាមការពិនិត្យសាកសពបញ្ជាក់ថា គ្មានរបួសស្នាមលើរាងកាយ ឬបង្កហេតុខុសច្បាប់អ្វីទេ ។ បច្ចុប្បន្នអាជ្ញាធរកំពុងដំណើរការស៊ើបអង្កេតបន្ត ៕
ចែករំលែកព័តមាននេះ